Delhi Malviya Nagar Fire : હોસ્પિટલના દર્દીઓની દેખરેખ રાખનારા 6 વિદેશી મહેમાનો આગની જ્વાળાઓમાં હોમાયા
Delhi Malviya Nagar Fire : દિલ્હીના માલવીય નગર (Malviya Nagar) વિસ્તારમાં બુધવારે સવારે એક ગોઝારી ઘટના બની છે. 'ફ્લરિશ સ્ટે' (Flurish Stay) હોટલમાં લાગેલી ભીષણ આગ (Hotel Fire) માં 21 લોકોના મોત થયા છે અને 37 લોકોને સલામત રીતે બચાવી લેવામાં આવ્યા છે. મૃતકોમાં 6 વિદેશી નાગરિકોનો સમાવેશ થાય છે, જેઓ સારવાર માટે આવેલા દર્દીઓના સહાયક તરીકે રોકાયા હતા. આ દુર્ઘટના સવારે 8:50 વાગ્યે હોટલના બેઝમેન્ટમાં આવેલા ગેરકાયદેસર રેસ્ટોરન્ટમાંથી શરૂ થઈ હતી, જે જોતજોતામાં સમગ્ર ઇમારતમાં ફેલાઈ ગઈ હતી.
Delhi Malviya Nagar Fire : બેદરકારીનો ભોગ બન્યા નિર્દોષો
પ્રાથમિક તપાસમાં ચોંકાવનારી વિગતો સામે આવી છે. હોટલ માલિક લવકેશ બજાજ (Hotel Owner Lavkesh Bajaj) પાસે રેસ્ટોરન્ટ ચલાવવાનું કોઈ લાઇસન્સ નહોતું. જે હોટલને માત્ર 6 રૂમની પરવાનગી હતી, ત્યાં ગેરકાયદેસર રીતે 25 રૂમ બનાવીને સંચાલન કરવામાં આવતું હતું. એટલું જ નહીં, હોટલ પાસે ફાયર એનઓસી (Fire NOC) પણ નહોતું. આગ લાગ્યા બાદ ઇમારતમાં એક જ એન્ટ્રી અને એક્ઝિટ હોવાને કારણે લોકો અંદર ફસાઈ ગયા હતા. જીવ બચાવવા માટે ઘણા લોકો બારીઓ તોડીને નીચે કૂદ્યા હતા, જેમાંથી ઘણા ગંભીર રીતે ઈજાગ્રસ્ત થયા છે. સ્થાનિક લોકોએ ગાદલા બિછાવીને લોકોને બચાવવાનો પ્રયાસ કર્યો હતો.
વહીવટીતંત્ર અને સરકાર દ્વારા સહાયની જાહેરાત
ઘટનાને પગલે ફાયર વિભાગના 17 ફાયર ટેન્ડરોએ ભારે જહેમત બાદ આગ પર કાબૂ મેળવ્યો હતો. પ્રધાનમંત્રી નરેન્દ્ર મોદી (Prime Minister Narendra Modi) એ આ ઘટના પર ઊંડું દુઃખ વ્યક્ત કર્યું છે અને મૃતકોના પરિવારજનો માટે પ્રધાનમંત્રી રાષ્ટ્રીય રાહત કોષ (PM National Relief Fund) માંથી ₹2 લાખ તથા ઘાયલો માટે ₹50,000 ની સહાય જાહેર કરી છે. દિલ્હીના મુખ્યમંત્રી રેખા ગુપ્તાએ પણ ઘટના પર શોક વ્યક્ત કરી પીડિત પરિવારોને શક્ય તમામ મદદની ખાતરી આપી છે.
માલિક હાલ ફરાર
માલિક લવકેશ બજાજ હાલ ફરાર છે અને પોલીસ તેની શોધખોળ કરી રહી છે. આ ઘટનાએ ફરી એકવાર દિલ્હીની હોટલોમાં સુરક્ષા માપદંડો (Safety Norms) અને ગેરકાયદેસર બાંધકામ પર ગંભીર સવાલો ઉભા કર્યા છે. હજુ પણ તપાસ ચાલુ છે અને આગામી સમયમાં આ મામલે કડક વહીવટી પગલાં લેવાય તેવી શક્યતા છે.