Doda Encounter : જમ્મુ અને કાશ્મીરના ડોડા જિલ્લાના ભાદરવાહ વિસ્તારમાં મંગળવારે રાત્રે ગોળીબારની ઘટનામાં એક વ્યક્તિનું મોત થયું હોવાનું સામે આવ્યું છે. ચાર સ્પેશિયલ ઓપરેશન ગ્રુપ (SOG)ના જવાનો ઈજાગ્રસ્ત થયા છે. જ્યારે મૃતકની ઓળખ કરવામાં આવી છે. જે આરિફ હુસૈન તરીકે થઈ છે, જે વ્યવસાયે ઓટો ડ્રાઈવર હતો.
ઉલ્લેખનીય છે કે પોલીસે આ ઘટના સંદર્ભે એક ધાર્મિક ઉપદેશકની અટકાયત કરી છે. આ ઘટના બાદ, મોબાઈલ ઇન્ટરનેટ સેવા સ્થગિત કરવામાં આવી છે અને સાવચેતીના પગલા તરીકે ભાદરવાહ શહેરમાં સુરક્ષા વધારી દેવામાં આવી છે.
Doda Encounter : જમ્મુમાં શંકાસ્પદનું મોત
પોલીસ અધિકારીઓના જણાવ્યા અનુસાર, SOG ટીમે જય ગંડોહ રોડ પર ઓચિંતો છાપો માર્યો હતો. આ વિસ્તાર ભાદરવાહ શહેરથી લગભગ 35 કિલોમીટર દૂર ઊંચાઈ પર સ્થિત છે. શંકાસ્પદ ગતિવિધિની માહિતી મળ્યા બાદ આ કાર્યવાહી હાથ ધરવામાં આવી હતી. લગભગ 2:30 વાગ્યે, ટીમે એક યુવાનને રોક્યો. એવો આરોપ છે કે યુવકે સૈનિકો પર હુમલો કર્યો અને તેમની સર્વિસ રાઇફલ છીનવી લેવાનો પ્રયાસ કર્યો.
અથડામણમાં 4 જવાન ઈજાગ્રસ્ત
આ ઉપરાંત પોલીસ અધિકારીએ જણાવ્યું કે આ અથડામણ દરમિયાન, એક સૈનિકે ગોળીબાર કર્યો. ગોળી વાગવાથી એક યુવાન ઘાયલ થયો હતો, જ્યારે ચાર પોલીસકર્મીઓ પણ આ અથડામણમાં ઈજાગ્રસ્ત થયા હતા. બધા ઈજાગ્રસ્તને શરૂઆતમાં ભાદરવાહની સબ-ડિસ્ટ્રિક્ટ હોસ્પિટલમાં લઈ જવામાં આવ્યા હતા. તેમની હાલત વધુ ખરાબ થતાં, તેમને વધુ સારવાર માટે ડોડાની સરકારી મેડિકલ કોલેજમાં ખસેડવામાં આવ્યા હતા. ત્યાં સારવાર દરમિયાન આરિફ હુસૈનનું મૃત્યુ થયું હતું. પોલીસે એક ધાર્મિક ઉપદેશકની અટકાયત કરી છે અને આ ઘટનાના સંદર્ભમાં તેની પૂછપરછ શરૂ કરી છે. જોકે, ઘટના સાથે તેનો સંબંધ હજુ સ્પષ્ટ નથી. વધુ તપાસ ચાલી રહી છે.
જો કે ઘટના બાદ, વિસ્તારમાં સુરક્ષા વધારી દેવામાં આવી છે. ભાદરવાહ શહેરમાં વધારાના CRPF અને પોલીસ કર્મચારીઓ તૈનાત કરવામાં આવ્યા છે. સેનાએ જય વિસ્તારમાં સર્ચ ઓપરેશન શરૂ કર્યું છે. સાવચેતી રૂપે, અફવાઓ ફેલાતી અટકાવવા માટે મોબાઇલ ઇન્ટરનેટ સેવાઓ પણ સ્થગિત કરવામાં આવી છે.
આ પણ વાંચો : NEET UG 2026 result declared : NEET-UG 2026નું પરિણામ જાહેર કરાયું, 11.21 લાખથી વધુ ઉમેદવારો ક્વોલિફાય થયા
