પૂર્વ IPS અધિકારીની ચાલુ ટ્રેનમાં ધરપકડ, જાણો શું છે સમગ્ર મામલો

• વર્ષ 1999 માં કરેલા કાંડની તપાસમાં પૂર્વ IPS ની ધરપકડ
• ખોટા દસ્તાવેજોના આધારે ચૂનો ચોપડ્યો હોવાનો આરોપ
• મુસાફરી દરમિયાન ધરપકડ કરીને, કોર્ટમાં રજૂ કરીને રિમાન્ડ મેળવાયા

Ex IPS Officer Amitabh Thakur Arrested In Train : લખનૌ પોલીસે બુધવારે ભૂતપૂર્વ IPS અધિકારી અમિતાભ ઠાકુરની ધરપકડ કરી હતી. લખનૌથી દિલ્હી જતી ટ્રેનમાં મુસાફરી કરતી વખતે તેમની ધરપકડ કરવામાં આવી હતી. આરોપ છે કે, 1999 માં, દેવરિયામાં પોલીસ અધિક્ષક તરીકે ફરજ બજાવતી વખતે, અમિતાભ ઠાકુરે કથિત રીતે તેમના પદનો દુરુપયોગ કર્યો હતો, અને નકલી ઓળખ તથા બનાવટી દસ્તાવેજોનો ઉપયોગ કરીને તેમની પત્નીના નામે ઔદ્યોગિક પ્લોટ મેળવ્યો હતો.

નકલી સરનામાનો ઉપયોગ કર્યો

પોલીસે જણાવ્યું કે, લખનૌના રાજાજીપુરમના રહેવાસી સંજય શર્માએ લખનૌના તાલકટોરા પોલીસ સ્ટેશનમાં ફરિયાદ નોંધાવી હતી. તેમની ફરિયાદમાં, તેમણે જણાવ્યું હતું કે, અમિતાભ ઠાકુરની પત્ની, નૂતન ઠાકુરે, નૂતન દેવી અને તેમના પતિનું નામ અભિજાત/અભિતાપ ઠાકુર તરીકે ખોટી ઓળખનો ઉપયોગ કર્યો હતો. તેમણે બિહારના સીતામઢીમાં પણ નકલી સરનામાનો ઉપયોગ કર્યો હતો. ફરિયાદમાં જણાવાયું હતું કે, તેમણે દેવરિયાના જિલ્લા ઉદ્યોગ કેન્દ્રમાં ઔદ્યોગિક પ્લોટ નંબર B2 મેળવ્યો હતો.

સરકારી વિભાગો સાથે છેતરપિંડી

સંજય શર્માએ તેમની ફરિયાદમાં જણાવ્યું હતું કે, આ કેસમાં સરકારી વિભાગો સાથે છેતરપિંડી કરવામાં આવી હતી, અને અરજી ફોર્મ, સોગંદનામા અને ટ્રેઝરી ઇન્વોઇસ સહિત અનેક નકલી દસ્તાવેજો તૈયાર કરવામાં આવ્યા હતા.

સપ્ટેમ્બર - 2025 માં નોંધાઇ ફરિયાદ

પોલીસે જણાવ્યું હતું કે અમિતાભ ઠાકુર, જે તે સમયે પોલીસ અધિક્ષક હતા, તેમણે તેમના સત્તાવાર પદનો દુરુપયોગ કર્યો હતો, અને આ ઔદ્યોગિક પ્લોટની બનાવટી ફાળવણીને સુરક્ષિત રાખી હતી. ત્યારબાદ પતિ-પત્નીએ તેમની વાસ્તવિક ઓળખનો ઉપયોગ કરીને પ્લોટ વેચી દીધો હતો, સરકારી વિભાગો, બેંકો અને આ કેસમાં અન્ય હિસ્સેદારો સાથે ઘણા વર્ષો સુધી છેતરપિંડી કરી હતી. સંજય શર્માની ફરિયાદના આધારે, 12 સપ્ટેમ્બર, 2025 ના રોજ તાલકટોરા પોલીસ સ્ટેશનમાં ભારતીય દંડ સંહિતાની વિવિધ કલમો હેઠળ FIR નોંધવામાં આવી હતી.

દેવરિયા અને બિહારમાં તપાસ

પોલીસે DCP પશ્ચિમ રાજકુમાર સિંહના નેતૃત્વમાં એક ટીમની રચના કરી હતી. આ ટીમે દેવરિયા અને બિહારમાં કેસની તપાસ કરી હતી, સાક્ષીઓની મુલાકાત લીધી અને દસ્તાવેજો એકત્રિત કર્યા હતા. પોલીસનું કહેવું છે કે, પૂરતા પુરાવા મળ્યા બાદ, પોલીસે સીતાપુર-મહોલી બોર્ડર પરથી અમિતાભ ઠાકુરની ધરપકડ કરી હતી. ફરિયાદ મુજબ, આ ઘટના દેવરિયામાં બની હતી, તેથી કાનૂની પ્રક્રિયા મુજબ, અમિતાભ ઠાકુરને દેવરિયા કોર્ટમાં રજૂ કરવામાં આવ્યા હતા. જ્યાં તેમને 14 દિવસના રિમાન્ડ પર મોકલી આપવામાં આવ્યા હોવાનું પ્રાથમિક સુત્રોએ જણાવ્યું છે.

આ પણ વાંચો -------  વિધાનસભામાં ધારાસભ્ય દીપડાના વેશમાં પહોંચ્યા, નવતર પ્રયોગ કરીને છવાયા