"મારી બેગમાં બોમ્બ છે" મુસાફરે આવું કહેતા જ મુંબઈ એરપોર્ટ પર મચ્યો હડકંપ

ફ્લાઇટ ટેક ઓફ થવાની પૂરી તૈયારીમાં હતી

ઘટનાની વિગતો મુજબ, મુંબઈથી દિલ્હી (Delhi) જતી ઇન્ડિગો (Indigo) ની ફ્લાઇટ ટેક ઓફ થવાની પૂરી તૈયારીમાં હતી. એરપોર્ટના બોર્ડિંગ ગેટ પર સુરક્ષા અધિકારીઓ દ્વારા મુસાફરોના સામાનની નિયમિત તપાસ કરવામાં આવી રહી હતી. આ દરમિયાન 55 વર્ષીય મુસાફર અનુજ સુવર્ણાને જ્યારે પૂછવામાં આવ્યું કે તેમના બેગમાં કોઈ પ્રતિબંધિત વસ્તુ કે વિસ્ફોટક સામગ્રી છે કે નહીં, ત્યારે તેમણે અત્યંત લાપરવાહીપૂર્વક જવાબ આપ્યો કે તેમના બેગમાં બોમ્બ (Bomb) છે.

તાત્કાલિક ધોરણે વિમાનને રોકી દેવામાં આવ્યું

આ એક વાક્ય સાંભળતા જ ત્યાં હાજર સુરક્ષા કર્મચારીઓના હોશ ઉડી ગયા હતા. ક્ષણનો પણ વિલંબ કર્યા વગર એરલાઇન સ્ટાફે સેન્ટ્રલ ઇન્ડસ્ટ્રિયલ સિક્યોરિટી ફોર્સ (CISF) ને આની જાણ કરી હતી. સુરક્ષા પ્રોટોકોલને અનુસરીને તાત્કાલિક ધોરણે વિમાનને રોકી દેવામાં આવ્યું અને તમામ મુસાફરોને નીચે ઉતારીને પ્લેનની સઘન તપાસ કરવામાં આવી હતી. બોમ્બ ડિસ્પોઝલ સ્કવોડ અને એજન્સીઓએ કલાકો સુધી ગાડીઓ, કાર્ગો અને પ્રવાસીઓના સામાનની ઝીણવટભરી તપાસ કરી હતી, જેમાં કોઈ પણ શંકાસ્પદ વસ્તુ મળી ન હતી.

Mumbai : આરોપી મુસાફર સામે કાયદેસરની કાર્યવાહી

તપાસ અંતે આ વાત માત્ર એક અફવા અને બેજવાબદાર મજાક સાબિત થઈ હોવા છતાં, સુરક્ષા એજન્સીઓએ આરોપી મુસાફર સામે કાયદેસરની કાર્યવાહી હાથ ધરી છે. સહાર પોલીસ સ્ટેશન (Sahar Police Station) માં ગુનો નોંધીને તેને કસ્ટડીમાં લેવામાં આવ્યો હતો. આરોપીએ પોલીસ સમક્ષ દાવો કર્યો હતો કે તેણે માત્ર મજાકમાં આ વાત કહી હતી, પરંતુ એરપોર્ટ જેવા અત્યંત સંવેદનશીલ સ્થળો પર આવા ચેડાં ક્યારેય સહન કરવામાં આવતા નથી. આ ઘટનાએ ફરી એકવાર સાબિત કરી દીધું છે કે સુરક્ષાના મુદ્દે કોઈપણ પ્રકારની બેદરકારી ગંભીર પરિણામો સર્જી શકે છે.

આ પણ વાંચો: Dahod: ગાડીઓમાંથી કાઢી GPS બાઈકમાં લગાવ્યા, દાહોદના પોલીસકર્મીએ અમદાવાદની ટ્રાવેલ્સ કંપનીને લગાવ્યો ચૂનો!