Ghaziabad માં પૈસાના વિવાદમાં હોટલ માલિકની ગોળી મારીને હત્યા, ભત્રીજો ઘાયલ

• પૈસાના વિવાદમાં હોટલ માલિકની ગોળી મારીને હત્યા
• હોટલ માલિકના ભત્રીજાને પણ પગમાં ગોળી વાગી
• નંદગ્રામ પોલીસ સ્ટેશનમાં FIR દાખલ

Ghaziabad Murder: ગાઝિયાબાદ જિલ્લાના નંદગ્રામ પોલીસ સ્ટેશન વિસ્તાર હેઠળના રાજનગર એક્સટેન્શનમાં પૈસાના વિવાદમાં એક હોટેલ માલિકની ગોળી મારીને હત્યા કરવામાં આવી હતી. આ ઘટનામાં હોટલ માલિકના ભત્રીજાને પણ ઈજા થઈ હતી, આ માહિતી પોલીસે સોમવારે આપી હતી. પોલીસના જણાવ્યા અનુસાર, રવિવારે મોડી રાત્રે હોટેલ માલિક રાહુલ ડાગર (32) ની ગોળી મારીને હત્યા કરવામાં આવી હતી, જ્યારે તેના ભત્રીજા, 26 વર્ષીય આશિષ ડાગરને પગમાં ગોળી વાગી હતી.

આ ઘટના હોટલની બહાર બની

પોલીસે જણાવ્યું કે હુમલાખોર અને પીડિત એકબીજાને ઓળખતા હતા. આ ઘટના રાજનગર એક્સટેન્શન વિસ્તારમાં એક હોટલની બહાર બની હતી. માહિતી મળતાં નંદગ્રામ પોલીસ ઘટનાસ્થળે પહોંચી ગઈ હતી અને રાહુલ અને આશિષને બે અલગ અલગ હોસ્પિટલમાં લઈ ગઈ હતી, જ્યાં ડોક્ટરોએ રાહુલને મૃત જાહેર કર્યો હતો. પોલીસે જણાવ્યું હતું કે હાલ આશિષની સારવાર ચાલી રહી છે અને તે ખતરાથી બહાર છે.

હુમલાખોરો સામે કેસ દાખલ

શહેર વિસ્તારના ડેપ્યુટી કમિશનર ઓફ પોલીસ (DCP) ધવલ જયસ્વાલે જણાવ્યું કે પાંચ નામાંકિત અને બે અજાણ્યા હુમલાખોરો સામે કેસ નોંધવામાં આવ્યો છે. તેમણે કહ્યું કે, એક આરોપી રિતેશ બિંદલની સોમવારે ધરપકડ કરવામાં આવી હતી. તેમણે કહ્યું કે નાગેન્દ્ર ચૌધરી, તેના ભાઈ મનીષ ચૌધરી, મોહિત ચૌધરી, રિતેશ બિંદલ, મંત્રી નામના યુવક અને બે અજાણ્યા લોકો સામે નંદગ્રામ પોલીસ સ્ટેશનમાં FIR નોંધવામાં આવી છે.

આ પણ વાંચો :  IMD Weather Alert 2025 : ઉત્તર પશ્ચિમ ભારતમાં ગાજવીજ સાથે વરસાદની આગાહી

લોકો એકઠા થતા આરોપીઓ ભાગી ગયા

પોલીસના જણાવ્યા પ્રમાણે, આ વિવાદ હલ્દવાનીમાં એક સંયુક્ત હોટલને લઈને છે. રાહુલ ડાગરના સંબંધી અવિનાશ સિરોહીએ આક્ષેપ કર્યો હતો કે નાગેન્દ્ર અને મોહિતે ચારથી પાંચ રાઉન્ડ ગોળીબાર કર્યો હતો, જેમાંથી એક ગોળી રાહુલને છાતીમાં વાગી હતી, જેના કારણે તેનું મૃત્યુ થયું હતું અને બીજી આશિષને પગમાં વાગી હતી. લોકોના ટોળેટોળા એકઠા થઈ જતાં આરોપીઓ ભાગી ગયા હતા. તેમણે કહ્યું કે મૃતદેહને પોસ્ટમોર્ટમ માટે મોકલવામાં આવ્યો છે, જેનો રિપોર્ટ આવવાનો બાકી છે. જયસ્વાલે કહ્યું કે પોલીસની ત્રણ ટીમ હુમલાખોરોના સંભવિત છુપાયેલા સ્થળો પર દરોડા પાડી રહી છે અને તેઓ ટૂંક સમયમાં પકડાઈ જશે.

આ પણ વાંચો :  CBI ની રેડમાં IRS અધિકારીના ઘરેથી મળ્યો ખજાનો