India Iran Trade Impact : તેલથી લઈને કેસર સુધી, ઈરાન જંગની ભારતની આયાત પર શું થશે અસર?
- India Iran Trade Impact : ભારતમાં મોંઘવારી વધવાના એંધાણ!
- મિડલ ઈસ્ટ તણાવથી ક્રૂડ ઓઈલ અને ટ્રાન્સપોર્ટ ખર્ચમાં જંગી વધારાની ભીતિ
- હોર્મુઝ માર્ગ ખોરવાતા ભારતની 50% તેલ આયાત પ્રભાવિત થવાનું જોખમ
- ઈરાનથી આવતા ડ્રાય ફ્રૂટ્સ, ખજૂર અને કેસરના ભાવમાં થઈ શકે છે તોતિંગ વધારો
- લોજિસ્ટિક્સ અને શિપિંગ વીમો મોંઘા થતા ભારતની નિકાસ પર પણ પડશે અસર
India Iran Trade Impact : મિડલ ઈસ્ટ (Middle East) માં સર્જાયેલી યુદ્ધની સ્થિતિએ ભારતની આયાત વ્યવસ્થા સામે મોટો પડકાર ઉભો કર્યો છે. ભારત પોતાની જરૂરિયાતની અનેક મહત્વની ચીજો માટે ઈરાન (Iran) પર નિર્ભર છે. જો આ તણાવ લાંબો ખેંચાય તો ભારતીય બજારોમાં અનેક જીવનજરૂરી ચીજવસ્તુઓના ભાવ આસમાને પહોંચી શકે છે.
India Iran Trade Impact : ક્રૂડ ઓઈલ અને ઉર્જા સંકટ
ભારત માટે ઈરાન હંમેશા તેલનો મુખ્ય સ્ત્રોત રહ્યો છે. જોકે અમેરિકી પ્રતિબંધોને લીધે સીધી આયાતમાં ઘટાડો થયો છે, પરંતુ ઈરાન તરફથી સપ્લાય ચેઈન (Supply Chain) માં આવતો કોઈ પણ અવરોધ આંતરરાષ્ટ્રીય બજારમાં તેલના ભાવ વધારી દે છે. પરિણામે ભારતમાં પેટ્રોલ, ડીઝલ અને નેચરલ ગેસ (Natural Gas) ના ભાવમાં વધારો થવો નિશ્ચિત છે, જે છેવટે ટ્રાન્સપોર્ટ ખર્ચમાં વધારો કરશે.
ડ્રાય ફ્રૂટ્સ અને ફળોની મોંઘવારી
ભારતીયોના રસોડા અને તહેવારોમાં વપરાતા ડ્રાય ફ્રૂટ્સ માટે ઈરાન સૌથી મોટું કેન્દ્ર છે. ભારત અહીંથી મોટા પ્રમાણમાં પિસ્તા (Pistachios), બદામ, ઉચ્ચ ગુણવત્તાવાળા ખજૂર (Dates) અને વિશ્વપ્રસિદ્ધ કેસર (Saffron) મંગાવે છે. આ ઉપરાંત, ઈરાનથી મોટા પાયે સફરજન (Apples) અને કીવી જેવા ફળો પણ ભારત આવે છે. જંગની સ્થિતિમાં આ ચીજોનો પુરવઠો અટકી જતાં તેના ભાવમાં 20% થી 30% નો ઉછાળો આવી શકે છે.
પેટ્રોકેમિકલ્સ અને ઔદ્યોગિક કેમિકલ્સ
ભારતીય ઉદ્યોગો માટે જરૂરી એવા ખાસ પ્રકારના પેટ્રોકેમિકલ્સ અને ઇન્ડસ્ટ્રિયલ કેમિકલ્સ પણ ઈરાનથી આયાત કરવામાં આવે છે. આ કેમિકલ્સનો ઉપયોગ પ્લાસ્ટિક, દવા (Pharmaceuticals) અને ખાતર (Fertilizer) બનાવવામાં થાય છે. જો આ આયાત ખોરવાય તો ભારતમાં ખેતીના ખર્ચથી લઈને દવાઓના મેન્યુફેક્ચરિંગ ખર્ચ સુધી બધું જ મોંઘું થઈ શકે છે.
કાચ અને અન્ય ચીજો
ભારત ઈરાન પાસેથી અમુક ખાસ પ્રકારના કાચ (Glassware) અને અન્ય માટીકામના કાચા માલની પણ આયાત કરે છે. જોકે તેનું પ્રમાણ તેલ જેટલું મોટું નથી, પરંતુ નાના અને મધ્યમ ઉદ્યોગો માટે તેની અછત મુશ્કેલી સર્જી શકે છે. હોર્મુઝની સામુદ્રધુની (Strait of Hormuz) માં જો અવરોધ ઉભો થાય, તો આ તમામ આયાતી માલનું ભાડું અને વીમો મોંઘા થતા સામાન્ય જનતા પર તેનો આર્થિક બોજ વધશે.
આ પણ વાંચો : Israel US Iran War: સુન્ની મુસ્લિમ દેશોની શિયા ઈરાન સાથે ગદ્દારી, યહૂદી ઈઝરાયલના બન્યા 'રક્ષક' !