IMD Monsoon Update 2026 : કેરળમાં મેઘરાજાના આગમનમાં વારંવાર વિલંબ, જાણો શું છે લેટેસ્ટ અપડેટ!
IMD Monsoon Update 2026 : ભારતમાં આ વર્ષે ચોમાસા (Monsoon) ના આગમનને લઈને સ્થિતિ કંઈક અંશે 'તારીખ પે તારીખ' જેવી બની ગઈ છે. ભારતીય હવામાન વિભાગ (India Meteorological Department - IMD) દ્વારા ચોમાસાના આગમન માટે અગાઉ ત્રણ વાર તારીખો જાહેર કરવામાં આવી હતી, પરંતુ ત્રણેય વખતે હવામાનના બદલાતા મિજાજને કારણે વાયદો ખોટો સાબિત થયો છે. હવે ચોથી નવી તારીખ ૩ જૂન જાહેર કરવામાં આવી છે, જેના પર સમગ્ર દેશના ખેડૂતો અને નાગરિકોની નજર ટકેલી છે.
IMD Monsoon Update 2026 : ચોમાસાના આગમનમાં શા માટે મોડું થઈ રહ્યું છે?
સામાન્ય રીતે જૂનના પ્રથમ સપ્તાહમાં કેરળમાં ચોમાસું સત્તાવાર રીતે દસ્તક દે છે, પરંતુ આ વર્ષે સ્થિતિ જટિલ છે. હવામાન વિભાગના જણાવ્યા અનુસાર, ચોમાસાના આગમન માટે ત્રણ મુખ્ય માપદંડો જરૂરી છે: કેરળના નિર્ધારિત વેધર સ્ટેશનો પર ૬૦ ટકા વરસાદ, અરબી સમુદ્રમાં પશ્ચિમી પવનોની ચોક્કસ ગતિ અને સેટેલાઇટમાં વાદળોનું મોટું જૂથ. હાલમાં કેરળના કિનારે પશ્ચિમી પવનોની ગતિ ખૂબ જ ધીમી છે, જે મુખ્ય અવરોધ બની રહી છે. સાથે જ, બંગાળની ખાડીમાં બનેલા ચક્રવાત (Cyclone) એ આ પવનોની ગતિને વધુ નબળી પાડી દીધી છે, જે ચોમાસાને આગળ વધતા રોકી રહ્યા છે. હવામાન વિભાગ હવે જૂનના પ્રથમ અઠવાડિયાથી પવનો મજબૂત થવાની આશા રાખી રહ્યું છે.
ખેડૂતોની ચિંતા અને વધતી ગરમી
ચોમાસામાં થઈ રહેલા આ વિલંબને કારણે દેશભરના ખેડૂતોમાં ચિંતાનું મોજું ફરી વળ્યું છે. જોકે, નિષ્ણાતોનું માનવું છે કે ૮ જૂન સુધીનું વિલંબ બહુ જોખમી નથી, પરંતુ જો આ સમયગાળો વધુ લંબાય તો ખરીફ પાકની વાવણી પર મોટી અસર પડી શકે છે. બીજી તરફ, દેશના અનેક રાજ્યો હજુ પણ કાળઝાળ ગરમીનો સામનો કરી રહ્યા છે અને ચોમાસાના આગમનથી જ લોકોને આ ગરમીમાંથી રાહત મળવાની શક્યતા છે. અલ નીનો (El Nino) ની અસરોને કારણે પણ આ વર્ષે હવામાન પેટર્નમાં અનેક ફેરફારો જોવા મળી રહ્યા છે.
3 જૂને થશે વરસાદ?
ચોમાસામાં થોડા દિવસોની રાહ જોવી કદાચ મોટી સમસ્યા નથી, પરંતુ તે ચોક્કસપણે ચિંતાનો વિષય છે કારણ કે આખું કૃષિ ચક્ર તેના પર નિર્ભર છે. હવે જોવું રહ્યું કે 3 જૂનનો આ નવો વાયદો સાચો સાબિત થાય છે કે નહીં. વરસાદના આગમનની રાહ જોતા લોકો માટે આવનારા કેટલાક દિવસો નિર્ણાયક સાબિત થશે.
આ પણ વાંચો : પશ્વિમ બંગાળમાં મમતા બેનર્જીએ બાગી નેતા સામે કરી કડક કાર્યવાહી, બે ધારાસભ્યોની કરી હકાલપટ્ટી