India Pakistan Conflict : આતંકવાદને પોષતા પાકિસ્તાનનો વરવો ચહેરો! સૌથી મોટા આતંકી મસુદને કરશે રોકડ સહાય
India Pakistan Conflict : પહેલગામમાં થયેલા આતંકવાદી હુમલા પછી ભારત અને પાકિસ્તાન વચ્ચે તણાવ વધુ ગહન બની ગયો છે. આતંકવાદ વિરોધી અભિયાન તરીકે ભારતીય સેનાએ “ઓપરેશન સિંદૂર” નામની કાર્યવાહી શરૂ કરી હતી, જેના અંતર્ગત કાશ્મીરમાં હત્યા કરવામાં આવેલા નિર્દોષ નાગરિકોના બદલા રૂપે પાકિસ્તાનના આતંકી ઠેકાણાઓને નિશાન બનાવી નષ્ટ કરવામાં આવ્યા હતા. આ સૈન્ય કાર્યવાહી બાદ, બંને દેશો વચ્ચે ઘર્ષણ જોવા મળ્યું હતું. ભારતે ઓપરેશન સિંદૂર અંતર્ગત જે પાકિસ્તાનની આતંકી ઠેકાણાઓને નષ્ટ કર્યા તે બાદ પાકિસ્તાનની સેના દ્વારા ભારત પર કાર્યવાહી કરવાની ધમકી મળવા લાગી હતી. જોકે, ભારતે તમામને પાકિસ્તાનને જડબાતોડ જવાબ આપ્યો છે. તાજેતરમાં નવી દિલ્હીમાં ફરજ બજાવી રહેલા એક પાકિસ્તાની અધિકારીને 24 કલાકની અંદર દેશ છોડવાનો નિર્દેશ આપવામાં આવ્યો છે. સરકાર દ્વારા આ અધિકારીને “પર્સોના નોન ગ્રેટા” જાહેર કરવામાં આવ્યો છે, કારણ કે તેમની પ્રવૃત્તિઓ તેમના કૂટનીતિક દરજ્જા સાથે અસંગત હોવાનું જાણવા મળ્યું હતું.
આતંકવાદને પોષતા પાકિસ્તાનનો વરવો ચહેરો! સૌથી મોટા આતંકી મસુદને કરશે રોકડ સહાય
May 14, 2025 2:21 pm
પાકિસ્તાન સરકાર તરફથી આતંકવાદીઓને ખુલ્લેઆમ સમર્થન મળી રહ્યું છે તેનું વધુ એક ઉદાહરણ પ્રકાશમાં આવ્યું છે. પાકિસ્તાન સરકાર જૈશ-એ-મોહમ્મદના મૌલાના મસૂદ અઝહરને વળતર આપશે. આ વળતર ઓપરેશન સિંદૂરમાં ભારતને થયેલા નુકસાનની ભરપાઈ કરવા માટે આપવામાં આવશે. મસૂદ અઝહરને 14 કરોડ પાકિસ્તાની રૂપિયા આપવામાં આવશે કારણ કે તેના પરિવારના 14 સભ્યો માર્યા ગયા છે. દરેક મૃતકને 1 કરોડ રૂપિયાનું વળતર આપવાની જાહેરાત કરવામાં આવી છે.
\\\'ઓપરેશન કેલર\\\'માં સુરક્ષાદળોને મોટી સફળતા
May 14, 2025 1:57 pm
જમ્મુ કાશ્મીરના શોપિયામાં સુરક્ષાદળોને મોટી સફળતા મળી છે. ઓપરેશન કેલર હેઠળ ગાઢ જંગલમાં છૂપાયેલા લશ્કર-એ-તૈયબાના ત્રણ આતંકીઓનો ખાત્મો બોલાવ્યા બાદ મોટા પ્રમાણમાં હથિયારનો જથ્થો જપ્ત કર્યો છે. સુરક્ષાદળોએ સર્ચ ઓપરેશન દરમિયાન રાઈફલ, હેન્ડ ગ્રેનડ અને કારતૂસ સહિતના હથિયાર જપ્ત કર્યા હતા. આ ઉપરાંત માર્યા ગયેલા આતંકીઓ પાસેથી રોકડ રકમ પણ મળી આવી હતી.
રાષ્ટ્રપતિ સાથે ત્રણેય સેના પ્રમુખોએ કરી મુલાકાત, જાણો શું થઇ ચર્ચા
May 14, 2025 1:39 pm
બુધવારે, 14 મે, 2025ના રોજ દિલ્હીના રાષ્ટ્રપતિ ભવનમાં ચીફ ઓફ ડિફેન્સ સ્ટાફ (CDS) જનરલ અનિલ ચૌહાણ, આર્મી ચીફ જનરલ ઉપેન્દ્ર દ્વિવેદી, વાયુસેના ચીફ એર ચીફ માર્શલ એ.પી. સિંહ અને નૌકાદળના વડા એડમિરલ દિનેશ કે. ત્રિપાઠીએ રાષ્ટ્રપતિ દ્રૌપદી મુર્મૂ સાથે મુલાકાત કરી. આ બેઠકમાં તેમણે ઓપરેશન સિંદૂરની વિગતો અને તેની સફળતા અંગે રાષ્ટ્રપતિને માહિતગાર કર્યા. રાષ્ટ્રપતિ ભવન દ્વારા જારી કરાયેલા એક નિવેદનમાં કહેવામાં આવ્યું છે કે, "રાષ્ટ્રપતિએ આતંકવાદનો સામનો કરવામાં ભારતીય સશસ્ત્ર દળોની બહાદુરી, સમર્પણ અને વ્યાવસાયિક કાર્યક્ષમતાની પ્રશંસા કરી. તેમણે કહ્યું કે સશસ્ત્ર દળોએ ફરી એકવાર સાબિત કર્યું છે કે રાષ્ટ્રની સુરક્ષા સર્વોપરી છે." રાષ્ટ્રપતિ મુર્મૂએ સોશિયલ મીડિયા પર આ મુલાકાતની તસવીર શેર કરતા લખ્યું કે, “સશસ્ત્ર દળોની હિંમત અને સમર્પણના કારણે ઓપરેશન સિંદૂર આતંકવાદ સામે ભારતનો જબરદસ્ત પ્રતિભાવ બન્યું.” તેમણે સેનાની બહાદુરી અને નિષ્ઠાની પ્રશંસા કરી.
Chiefs of Indian Armed Forces meet President Droupadi Murmu at Rashtrapati Bhavan, brief about Operation Sindoor
— ANI Digital (@ani_digital) May 14, 2025
Read @ANI Story | https://t.co/2BVKMpiI4C#DroupadiMurmu #RashtrapatiBhavan #IndianArmedForces pic.twitter.com/PlN9V2aWjZ
ફરી ઝૂક્યો પડોશી દેશ! પાકિસ્તાને BSF જવાન પૂર્ણમ કુમાર સાહુને મુક્ત કર્યો
May 14, 2025 1:27 pm
પહેલગામ આતંકવાદી હુમલાને લઈને ભારત અને પાકિસ્તાન (India and Pakistan) વચ્ચે ચાલી રહેલા તીવ્ર તણાવની વચ્ચે ભારતે એક મોટી રાજદ્વારી સફળતા (diplomatic success) હાંસલ કરી છે. ભારતના સતત દબાણના પરિણામે પાકિસ્તાને બોર્ડર સિક્યુરિટી ફોર્સ (BSF)ના જવાન પૂર્ણમ કુમાર સાહુને કસ્ટડીમાંથી મુક્ત કર્યા છે. આ ઘટના એવા સમયે બની જ્યારે બંને દેશો વચ્ચે સરહદી તણાવ ચરમસીમાએ છે. પૂર્ણમ કુમાર સાહુ (Purnam Kumar Sahu) ને 23 એપ્રિલ, 2025ના રોજ પાકિસ્તાની રેન્જર્સે આંતરરાષ્ટ્રીય સરહદ પરથી કસ્ટડીમાં લીધા હતા. ત્યારથી ભારત સરકાર અને BSF તેમની મુક્તિ માટે સતત પ્રયાસો કરી રહ્યા હતા. આખરે, આજે 14 મે, 2025ના રોજ, લગભગ 20 દિવસની કેદ બાદ પૂર્ણમ કુમાર સાહુ ભારત પરત ફર્યા.
બેઠકમાં ઓપરેશન સિંદૂરની સફળતા બદલ અભિનંદન આપવામાં આવ્યા
May 14, 2025 12:51 pm
PM મોદીની અધ્યક્ષતામાં મળેલી કેબિનેટ બેઠક સમાપ્ત થઈ ગઈ છે. બેઠકમાં, PM અને સશસ્ત્ર દળોને ઓપરેશન સિંદૂરની સફળતા બદલ અભિનંદન આપવામાં આવ્યા. સશસ્ત્ર દળોની બહાદુરીની પ્રશંસા કરવામાં આવી. કેબિનેટ બેઠકમાં ગૃહમંત્રીએ સરહદી વિસ્તારો અને પાકિસ્તાન સરહદને અડીને આવેલા ગામડાઓ અને શહેરોના રાજ્યોની સુરક્ષા પરિસ્થિતિ વિશે માહિતી આપી. મંત્રીમંડળને આંતરિક સુરક્ષા અંગે પણ માહિતી આપવામાં આવી હતી.
આજે મોદી કેબિનેટની બેઠક યોજાઇ
May 14, 2025 12:13 pm
ઓપરેશન સિંદૂર, હવાઈ હુમલા અને ભારત પાકિસ્તાન યુદ્ધવિરામ પછી, આજે મોદી કેબિનેટની બેઠક યોજાવા જઈ રહી છે. PM મોદીની અધ્યક્ષતામાં બેઠક શરૂ થઈ ગઈ છે અને આ પહેલા CCS બેઠક યોજાઈ હતી, જેમાં સંરક્ષણ પ્રધાન રાજનાથ સિંહ, NSA અજિત ડોભાલ અને ત્રણેય સેનાના વડાઓ હાજર રહ્યા હતા.
પાકિસ્તાનના પરમાણુ પ્રણાલી પર અમેરિકાનું નિવેદન
May 14, 2025 11:49 am
ભારત-પાકિસ્તાન યુદ્ધવિરામ પછી અમેરિકા સાથેનો કરાર પૂર્ણ કરાવવાનો શ્રેય ભારત લેવા માંગે છે. જ્યારે પાકિસ્તાનના પરમાણુ શસ્ત્રોની વાત આવી, ત્યારે અમેરિકાએ સત્તાવાર રીતે ઇનકાર કર્યો કે તેણે પાકિસ્તાનના કોઈપણ પરમાણુ સ્થળ પર લીકેજ બંધ કરવા માટે કોઈ વ્યવસ્થા કરી છે. આ નિવેદન વ્હાઇટ હાઉસ દ્વારા જારી કરવામાં આવ્યું છે.
સરહદ પર સેના ઘટાડવાની તૈયારીઓ
May 14, 2025 11:29 am
યુદ્ધવિરામ પછી, ભારત-પાકિસ્તાન સરહદ પર તૈનાત સૈનિકોની સંખ્યામાં ઘટાડો થઈ શકે છે. બંને દેશો આજે એકબીજા સાથે સૈનિકો ઘટાડવાની યોજના શેર કરી શકે છે. 'ઓપરેશન સિંદૂર' દરમિયાન સરહદ પર સૈનિકો અને હથિયારોની સંખ્યા વધારવામાં આવી હતી. સોમવારે સાંજે ભારત અને પાકિસ્તાનના લશ્કરી અધિકારીઓ (DGMOs) વચ્ચે થયેલી વાતચીતમાં નિર્ણય લેવામાં આવ્યો હતો કે સરહદો પર સૈનિકો અને હથિયારોની તૈનાતી ઘટાડીને અન્ય કામોમાં મદદ લઈ શકાય છે.
પંજાબના ફિરોઝપુરમાં સ્થિતિ સામાન્ય
May 14, 2025 11:14 am
ભારત-પાકિસ્તાન યુદ્ધવિરામના પાંચમા દિવસે, પંજાબના ફિરોઝપુરમાં આજે પરિસ્થિતિ સામાન્ય જણાઈ રહી છે. સવાર પડતાની સાથે જ લોકોએ પોતાના રોજિંદા કામ શરૂ કરી દીધા છે. બાળકો રાબેતા મુજબ શાળાએ જવા રવાના થયા. ડ્રોન કે ફાયરિંગના કોઈ સમાચાર નથી. મંગળવારે સવારે મામદોટમાં એક પાકિસ્તાની ડ્રોન જોવા મળ્યું, જેના પર BSF સૈનિકોએ લગભગ 250 રાઉન્ડ ગોળીબાર કર્યો, જેના કારણે ડ્રોન પાકિસ્તાન તરફ પાછું ફર્યું. ડ્રોનનો વીડિયો પણ બનાવવામાં આવ્યો છે.
જમ્મુ-કાશ્મીરમાં સ્થિતિ સામાન્ય
May 14, 2025 10:13 am
ભારત અને પાકિસ્તાન વચ્ચે યુદ્ધવિરામ થયા બાદ જમ્મુ અને કાશ્મીરમાં શાંતિ છે. લોકો હવે રસ્તાઓ પર ફરતા જોવા મળે છે. શહેરમાં પરિસ્થિતિ સામાન્ય હોવાથી લોકો રાબેતા મુજબ પોતાના રોજિંદા કામકાજ કરી રહ્યા છે. ગઈકાલે રાત્રે અહીં ડ્રોન, ગોળીબાર કે તોપમારાનો કોઈ અહેવાલ નથી. લોકો હવે સરહદને અડીને આવેલા ગામોમાં પાછા ફરવા લાગ્યા છે.
સરકાર હજુ પણ કઠોર નિર્ણયો લઈ રહી છે
May 14, 2025 9:41 am
બીજી તરફ, ભારત સરકારે પાકિસ્તાની અધિકારીઓ પર કડક કાર્યવાહી કરી છે અને તેમને 24 કલાકની અંદર દેશ છોડી દેવાનો આદેશ આપ્યો છે. બધા અધિકારીઓ દિલ્હીમાં પાકિસ્તાન હાઈ કમિશનમાં તૈનાત છે. પંજાબ પોલીસે ભટિંડા આર્મી કેન્ટમાંથી પાકિસ્તાની જાસૂસની ધરપકડ કરી છે. રાજસ્થાનના શ્રીગંગાનગરમાં પાકિસ્તાનના સ્થાનિક સિમ કાર્ડ પર પ્રતિબંધ મૂકવામાં આવ્યો છે. હવે આ આદેશ જેસલમેરમાં પણ લાગુ કરવામાં આવ્યો છે.
PAK ના મિત્ર તુર્કિયે પર ટ્રેડ સ્ટ્રાઇક
May 14, 2025 9:23 am
ભારત અને પાકિસ્તાન વચ્ચે ચાલી રહેલા તણાવની અસર હવે ફક્ત રાજદ્વારી ક્ષેત્ર સુધી મર્યાદિત નથી, પરંતુ તેની અસર દેશના વેપારી વર્ગ અને સામાન્ય લોકોના નિર્ણયોમાં પણ સ્પષ્ટપણે દેખાય છે. તુર્કીએ ખુલ્લેઆમ પાકિસ્તાનને ટેકો આપ્યા પછી, 'બાયકોટ તુર્કી' ઝુંબેશને દેશભરમાં વેગ મળ્યો છે. મહારાષ્ટ્રના પુણેથી લઈને રાજસ્થાનના ઉદયપુર સુધી, વેપારીઓએ તુર્કીથી આયાત થતા માલનો બહિષ્કાર કરીને આર્થિક મોરચે તુર્કીને જવાબ આપવાની જાહેરાત કરી છે.
જમ્મુ-કાશ્મીરમાં પોલીસે આતંકવાદીઓ સામે કડક ઝુંબેશ શરૂ કરી
May 14, 2025 9:02 am
પહેલગામ હુમલા બાદ જમ્મુ-કાશ્મીરમાં પોલીસે આતંકવાદીઓ સામે કડક ઝુંબેશ શરૂ કરી છે. પોલીસના જણાવ્યા અનુસાર, 22 એપ્રિલના રોજ થયેલા આતંકવાદી હુમલા પછી, 150 આતંકવાદીઓ અથવા તેમના સહયોગીઓના ઘરોમાં દરોડા પાડવામાં આવ્યા છે. આતંકવાદી પ્રવૃત્તિઓને ટેકો આપતા માળખાને નાબૂદ કરવાના ઉદ્દેશ્યથી આ પોલીસ કાર્યવાહી કરવામાં આવી રહી છે. આ અંતર્ગત ઘણી જગ્યાએ દરોડાની કાર્યવાહી વધુ તીવ્ર બનાવવામાં આવી છે.
પાકિસ્તાનના આતંકવાદ પર થયેલા સવાલ પર અમેરિકા ચુપ રહ્યું
May 14, 2025 8:43 am
આતંકવાદ પર અમેરિકાનું બેવડું ચરિત્ર દુનિયા સમક્ષ ખુલ્લું પડી ગયું છે. પાકિસ્તાનમાં આતંકવાદ પર પૂછાયેલા એક પ્રશ્ન પર અમેરિકા મૌન રહ્યું અને આ પ્રશ્નનો જવાબ આપવાને બદલે, તેના પ્રવક્તાએ ભારત અને પાકિસ્તાન વચ્ચે યુદ્ધવિરામ વિશે વાત કરવાનું શરૂ કર્યું. જણાવી દઈએ કે, આ પ્રશ્ન પૂછવામાં આવ્યો હતો કે 'શું પાકિસ્તાન સાથેની વાતચીત દરમિયાન અમેરિકાને કોઈ ખાતરી કે પ્રતિબદ્ધતા મળી હતી કે પાકિસ્તાન તેના આતંકવાદી માળખાને તોડી પાડશે અથવા દેશમાં આતંકવાદી જૂથોને ટેકો આપવાનું બંધ કરશે'... આના પર યુએસ સ્ટેટ ડિપાર્ટમેન્ટના ડેપ્યુટી પ્રિન્સિપલ પ્રવક્તા ટોમી પિગોટે કોઈ જવાબ આપ્યો નહીં, તેના બદલે તેમણે યુદ્ધવિરામ વિશે વાત કરવાનું શરૂ કર્યું.
ટ્રમ્પનો દાવો : ભારત-પાકિસ્તાન યુદ્ધવિરામ પાછળ મારી ભૂમિકા મહત્ત્વની
May 14, 2025 8:40 am
સાઉદી અરેબિયાના રિયાધમાં યોજાયેલી એક મહત્વપૂર્ણ મુલાકાત દરમિયાન અમેરિકાના પૂર્વ રાષ્ટ્રપતિ ડોનાલ્ડ ટ્રમ્પે ભારત અને પાકિસ્તાન વચ્ચેના યુદ્ધવિરામ અંગે પુનઃ એકવાર પોતાનું મહત્વપૂર્ણ દાવો કર્યો છે. અમેરિકાના રાષ્ટ્રપતિ ડોનાલ્ડ ટ્રમ્પે મંગળવારે (13 મે, 2025) ફરી એકવાર દાવો કર્યો કે તેમના વહીવટીતંત્રે ભારત અને પાકિસ્તાન વચ્ચે વધતા સંઘર્ષને રોકવા માટે 'ઐતિહાસિક યુદ્ધવિરામની સફળતાપૂર્વક મધ્યસ્થી' કરી છે. રિયાધમાં સાઉદી-યુએસ ઇન્વેસ્ટમેન્ટ ફોરમને સંબોધતા ટ્રમ્પે કહ્યું, 'જેમ મેં મારા ઉદ્ઘાટન સંબોધનમાં કહ્યું હતું કે, મારી સૌથી મોટી આશા શાંતિ નિર્માતા બનવાની અને એકતા લાવવાની છે. મને યુદ્ધ ગમતું નથી. બાય ધ વે, દુનિયાના ઈતિહાસમાં અમારી પાસે સૌથી મોટી સેના છે. તેમણે દાવો કર્યો, 'થોડા દિવસો પહેલા જ, મારા વહીવટીતંત્રે ભારત અને પાકિસ્તાન વચ્ચે વધતી હિંસાને રોકવા માટે ઐતિહાસિક યુદ્ધવિરામ સફળતાપૂર્વક કરાવ્યો હતો.' અમેરિકાના રાષ્ટ્રપતિ ડોનાલ્ડ ટ્રમ્પ ખાડી ક્ષેત્રની તેમની ચાર દિવસીય મુલાકાતના પહેલા તબક્કામાં સાઉદી અરેબિયામાં છે.
પાકિસ્તાન હાઇ કમિશનના અધિકારીને 24 કલાકમાં દિલ્હી છોડવાનો આદેશ
May 14, 2025 8:05 am
પહેલગામ આતંકવાદી હુમલા બાદ ભારત અને પાકિસ્તાન વચ્ચે તણાવ વધી ગયો હતો. ઓપરેશન સિંદૂર દ્વારા, ભારતીય સેનાએ પાકિસ્તાન દ્વારા કાશ્મીરમાં માર્યા ગયેલા નિર્દોષ લોકોનો બદલો લીધો અને આતંકવાદીઓના ઠેકાણાઓનો નાશ કર્યો. યુદ્ધવિરામ બાદ ભારતે પાકિસ્તાન સામે મોટી કાર્યવાહી કરી અને પાકિસ્તાન હાઇ કમિશનના અધિકારીને 24 કલાકની અંદર દિલ્હી છોડવાનો આદેશ આપ્યો. પાકિસ્તાન સામે બીજી એક મોટી કાર્યવાહીમાં, વિદેશ મંત્રાલય (MEA) એ જણાવ્યું હતું કે ભારત સરકારે નવી દિલ્હીમાં પાકિસ્તાન હાઈ કમિશનમાં ફરજ બજાવતા એક પાકિસ્તાની અધિકારીને ભારતમાં તેમના સત્તાવાર દરજ્જા સાથે અસંગત પ્રવૃત્તિઓમાં સામેલ થવા બદલ પર્સોના નોન ગ્રેટા જાહેર કર્યા છે. સરકારે પાકિસ્તાની અધિકારીને 24 કલાકની અંદર દેશ છોડી દેવાનો આદેશ આપ્યો છે. આ અંગે, પાકિસ્તાન હાઈ કમિશનના રાજદૂતને એક ડિમાર્ચ જારી કરવામાં આવ્યું હતું.