Kerala man old loan: 25 વર્ષ જૂનું કરજ ચૂકવવા કેરળથી તેલંગાણા પહોંચ્યો મિત્ર, ગૂગલની મદદથી શોધી કાઢ્યું મિત્રનું ઘર

Kerala man old loan: જૂની મિત્રતા અને કરજનો બોજ

કેરળના પલક્કડના રહેવાસી મોહમ્મદ ઈસ્માઈલ અને તેલંગાણાના જગિત્યાલ જિલ્લાના ધર્મપુરીના વતની એડલા લચ્છન્ન લગભગ ૨૫ વર્ષ પહેલાં સાઉદી અરબમાં સાથે કામ કરતા હતા. તે સમયે અંગત જરૂરિયાતને કારણે ઈસ્માઈલે મિત્ર લચ્છન્ન પાસેથી ઉછીના રૂપિયા લીધા હતા. ભારત પરત ફર્યા બાદ કરજ ચૂકવવાનું વચન તેમણે મિત્રને આપ્યું હતું. સમય જતાં બંને મિત્રો એકબીજાથી અલગ થઈ ગયા અને સંપર્ક તૂટી ગયો હતો. ઈસ્માઈલ પાસે લચ્છન્નનો ફોન નંબર કે ચોક્કસ સરનામું નહોતું, છતાં તેઓ વર્ષોથી કરજ ચૂકવવાની તકની રાહ જોઈ રહ્યા હતા.

Kerala man old loan: ગૂગલની મદદથી શોધખોળ

ઈસ્માઈલે આખરે પોતાનું વચન પૂરું કરવાનો નિર્ણય લીધો. તેમને માત્ર એટલી જ માહિતી હતી કે લચ્છન્નનું ગામ ધર્મપુરી છે. આ માહિતીને આધારે તેમણે ઈન્ટરનેટ પર શોધખોળ શરૂ કરી અને છેવટે તેલંગાણાના જગિત્યાલ જિલ્લા સુધી પહોંચ્યા. સ્થાનિક લોકો સાથે વાતચીત કરીને તેમણે સખત મહેનત પછી લચ્છન્નનું ઘર શોધી કાઢ્યું. ઈસ્માઈલ જ્યારે ત્યાં પહોંચ્યા ત્યારે લચ્છન્ન કામના અર્થે વિદેશમાં હતા.

ભાવુક મુલાકાત અને કરજની ચૂકવણી

ઈસ્માઈલે લચ્છન્ન પરિવારને મળીને પોતાનો પરિચય આપ્યો. પરિવારના સભ્યોએ ફોન પર લચ્છન્ન સાથે વાત કરાવી. શરૂઆતમાં લચ્છન્નને કરજની વાત યાદ નહોતી, પણ મિત્રનો અવાજ સાંભળીને તેઓ ખૂબ ભાવુક થઈ ગયા. જૂની યાદો તાજી થઈ અને બંનેએ એકબીજાનો હાલચાલ પૂછ્યો. અંતે ઈસ્માઈલે ૨૫૦૦૦ રૂપિયા લચ્છન્ન પરિવારને સુપરત કર્યા. તેમણે જણાવ્યું કે આ રકમ તેમના મન પર વર્ષોથી બોજ હતી. હવે તે ચૂકવવાથી તેમને ઘણી રાહત મળી છે. લચ્છન્ન પરિવારે મિત્રની આ ઈમાનદારીના ખૂબ વખાણ કર્યા. આ ઘટના આજે સમગ્ર વિસ્તારમાં ચર્ચાનો વિષય બની છે.

આ પણ વાંચો--- Agra Vigilance Raid: આગ્રામાં વિજિલન્સના દરોડા, પૂર્વ ARTOના ઘરમાં 'ખજાનાનો ભંડાર', દીવાલોમાંથી નીકળ્યું 13 કિલો સોનું!