Kerala Shocking case : સરકારી નોકરી (Government Job) મેળવવાનું સ્વપ્ન લાખો યુવાનો જોતા હોય છે અને તેના માટે વર્ષો સુધી મહેનત પણ કરતા હોય છે. જોકે ભરતી પ્રક્રિયામાં થતા વિલંબ અંગે વારંવાર પ્રશ્નો ઉઠતા રહે છે. પરંતુ કેરળ (Kerala)ના મલ્લપુરમ (Malappuram) જિલ્લામાંથી એક એવો ચોંકાવનારો કિસ્સો સામે આવ્યો છે, જેણે સમગ્ર ભરતી વ્યવસ્થાની કાર્યશૈલી પર સવાલો ઊભા કર્યા છે. અહીં એક વ્યક્તિને સરકારી નોકરી માટેનું નિમણૂક પત્ર (Appointment Letter) પરીક્ષા આપ્યાના 21 વર્ષ બાદ મળ્યું, પરંતુ ત્યા સુધી તે સરકારી સેવામાં જોડાવાની વય મર્યાદા (Age Limit) પાર કરી ચૂક્યો હતો.

21 વર્ષ પછી આવ્યો નોકરીનો મોકો

મલ્લપુરમ જિલ્લાના કાલિકાવુ (Kalikavu) ગામના રહેવાસી 61 વર્ષીય અબ્દુલ મજીદ (Abdul Majeed) આ અનોખા અને દુર્ભાગ્યપૂર્ણ ઘટનાના કેન્દ્રમાં છે. વર્ષ 2005માં તેમણે કેરળ પબ્લિક સર્વિસ કમિશન (Kerala Public Service Commission - PSC) દ્વારા જાહેર કરાયેલી ‘પાર્ટ-ટાઇમ જુનિયર અરબી શિક્ષક’ (Part-Time Junior Arabic Teacher)ની ભરતી પરીક્ષા આપી હતી. મજીદે સફળતાપૂર્વક પરીક્ષા પાસ કરી હતી અને તેમનું નામ મેરિટ રેન્ક લિસ્ટ (Rank List)માં પણ સામેલ કરવામાં આવ્યું હતું. આ યાદી 3 વર્ષ સુધી માન્ય રહી હતી અને 2008માં તેની સમયમર્યાદા પૂર્ણ થઈ ગઈ હતી. સામાન્ય રીતે આ સમયગાળા દરમિયાન લાયક ઉમેદવારોને નિમણૂક આપવામાં આવે છે, પરંતુ આ કિસ્સામાં એવું બન્યું નહીં.

18 વર્ષ સુધી ખાલી રહી પોસ્ટ (Kerala Shocking case)

માહિતી મુજબ, લાયક ઉમેદવારોના અભાવ અને વહીવટી પ્રક્રિયાઓના કારણે આ ભરતી સાથે સંબંધિત એક પદ (Post) લાંબા સમય સુધી ખાલી રહ્યું. આશ્ચર્યજનક રીતે, લગભગ 18 વર્ષ સુધી આ જગ્યા ભરાઈ જ નહોતી. તાજેતરમાં જ્યારે સંબંધિત વિભાગે વર્ષોથી ખાલી પડેલી પોસ્ટ અંગેની ફાઈલ ફરીથી ખોલી અને ભરતી પ્રક્રિયા આગળ વધારી, ત્યારે અબ્દુલ મજીદનું નામ ફરી સામે આવ્યું. ત્યારબાદ કેરળ PSC દ્વારા તેમને નિમણૂક માટેનો સલાહ પત્ર (Advice Letter) મોકલવામાં આવ્યો.

નિમણૂક પત્ર મળ્યો, પરંતુ મોડું થઈ ગયું

24 એપ્રિલ, 2026ના રોજ અબ્દુલ મજીદને સત્તાવાર રીતે નિમણૂક માટેનો પત્ર મળ્યો. સામાન્ય રીતે આ ક્ષણ કોઈપણ ઉમેદવાર માટે ખુશીની હોય છે, પરંતુ મજીદ માટે આ પત્ર ખુશી કરતાં વધુ નિરાશા લઈને આવ્યો. સરકારી દસ્તાવેજો અનુસાર મજીદ 27 મે, 2026ના રોજ 60 વર્ષની વયે પહોંચ્યા હતા. સરકારી સેવામાં જોડાવા માટેની મહત્તમ વય મર્યાદા પૂર્ણ થઈ જતાં તેઓ હવે નોકરી માટે અયોગ્ય બની ગયા છે. એટલે કે જે નોકરી માટે તેમણે 2 દાયકાથી વધુ સમય પહેલાં પરીક્ષા પાસ કરી હતી, તે નોકરી મળવાની તક હવે તેમના હાથમાંથી સરકી ગઈ છે.

વિલંબે મારી નોકરી છીનવી લીધી

આ સમગ્ર ઘટનાથી નિરાશ થયેલા અબ્દુલ મજીદે જણાવ્યું કે સંબંધિત પોસ્ટ 18 વર્ષ સુધી ખાલી રહી અને તંત્રના લાંબા વિલંબને કારણે તેઓ નોકરી મેળવવાનો અવસર ગુમાવી બેઠા. તેમના મતે જો ભરતી પ્રક્રિયા સમયસર પૂર્ણ થઈ હોત તો તેઓ વર્ષો પહેલાં સરકારી સેવામાં જોડાઈ શક્યા હોત. હવે મજીદ પાસે એક અંતિમ વિકલ્પ બચ્યો છે. તેમના SSLC પ્રમાણપત્ર (SSLC Certificate)માં જન્મ તારીખ 27 મે, 1966 દર્શાવવામાં આવી છે. જોકે મજીદનો દાવો છે કે શાળાના રેકોર્ડમાં ભૂલ થઈ હતી અને તેમનું વાસ્તવિક જન્મ વર્ષ 1967 છે. તેમનું કહેવું છે કે જો આ ભૂલ સુધારીને સાચી જન્મ તારીખ દાખલ કરવામાં આવે, તો તેઓ હજુ પણ ઓછામાં ઓછા 1 વર્ષ માટે સરકારી નોકરી માટે પાત્ર બની શકે છે. આશાની અંતિમ કિરણ તરીકે મજીદે કેરળના શિક્ષણ મંત્રી (Education Minister) તેમજ વકીલ એન. શમસુદ્દીન (N. Shamsudheen) સમક્ષ રજૂઆત કરી છે. હવે તેઓ સરકાર અને સંબંધિત અધિકારીઓના હસ્તક્ષેપની રાહ જોઈ રહ્યા છે.

આ પણ વાંચો : Strange News : ₹41 હજારનું ડિનર કરીને બિલ ચૂકવ્યા વગર 4 યુવકો ફરાર, હોટલ સ્ટાફ જોતો રહી ગયો