Olympic 2028 માટે ભારત સજ્જ, કેન્દ્રીય મંત્રી Mansukh Mandaviya એ આપ્યો 'મેડલ' જીતવાનો મંત્ર

• મનસુખ માંડવિયાનો માસ્ટર પ્લાન: ભારત બનશે સ્પોર્ટ્સ સુપર પાવર!
• નેશનલ સ્પોર્ટ્સ ફેડરેશન કોન્ફરન્સ 2026 માં 37 સંઘો સાથે મહામંથન
• એશિયન અને ઓલિમ્પિક ગેમ્સ માટે વૈજ્ઞાનિક તાલીમ પર મૂકવામાં આવ્યો ભાર
• ખેલાડીઓનું કલ્યાણ અને પારદર્શક વહીવટ સરકારની પ્રથમ પ્રાથમિકતા
• ડોપિંગને જડમૂળથી નાબૂદ કરવા માટે લેવાશે કડક કાયદાકીય પગલાં
• 2036 ઓલિમ્પિકની યજમાનીના લક્ષ્ય સાથે ઈન્ફ્રાસ્ટ્રક્ચર થશે મજબૂત

કેન્દ્રીય મંત્રી ડૉ. મનસુખ માંડવિયાએ નવી દિલ્હીમાં આયોજિત 'નેશનલ સ્પોર્ટ્સ ફેડરેશન કોન્ફરન્સ 2026' (National Sports Federation Conference) માં ભારતીય રમતગમત ક્ષેત્રના ભાવિ માટે એક સર્વગ્રાહી અને વ્યૂહાત્મક રોડમેપ રજૂ કર્યો છે. આ કોન્ફરન્સનો મુખ્ય ઉદ્દેશ્ય આગામી એશિયન ગેમ્સ 2026, કોમનવેલ્થ ગેમ્સ અને ખાસ કરીને લોસ એન્જલસ ઓલિમ્પિક 2028 (Olympics 2028) માટે ભારતની સજ્જતાને નવી ઊંચાઈએ લઈ જવાનો છે.

ખેલાડી કેન્દ્રિત અભિગમ

ડૉ. માંડવિયાએ તેમના સંબોધનમાં ભારપૂર્વક જણાવ્યું હતું કે રમતગમત સંઘોનો વહીવટ સંપૂર્ણપણે ખેલાડી કેન્દ્રિત (Athlete-centric) હોવો જોઈએ. તેમણે સ્પષ્ટ કર્યું કે રમતગમત જગતમાં સફળતા મેળવવા માટે ખેલાડીઓ, રમતગમત સંઘો અને સરકાર વચ્ચે મજબૂત સંકલન હોવું અનિવાર્ય છે. સંઘોમાં પારદર્શિતા, સમયસર ચૂંટણી અને જવાબદારી એ પ્રાથમિક શરતો છે. ખેલાડીઓનું કલ્યાણ (Athlete Welfare) એ ભારતના સ્પોર્ટ્સ ઇકોસિસ્ટમના કેન્દ્રમાં હોવું જોઈએ, જેથી તેઓ કોઈ પણ માનસિક દબાણ વગર દેશ માટે મેડલ જીતી શકે.

ડોપિંગ મુક્ત ભારતનું લક્ષ્ય

ભારતીય રમતગમતને વૈશ્વિક સ્તરે પ્રતિષ્ઠિત બનાવવા માટે મંત્રીએ 'ડોપિંગ' (Doping) સામે ઝીરો ટોલરન્સની નીતિ અપનાવવા આહ્વાન કર્યું છે. તેમણે કહ્યું કે રમતગમતમાંથી ડોપિંગને જડમૂળથી ઉખેડી નાખવું એ આપણા સૌની સામૂહિક જવાબદારી છે. આ માટે જાગૃતિ, શિક્ષણ અને જરૂર પડ્યે કડક કાયદાકીય પગલાં લેવામાં આવશે. સ્વચ્છ અને પારદર્શક ખેલ સંસ્કૃતિ (Clean Sports Culture) જ ભારતને રમતગમતની મહાસત્તા બનાવી શકે છે.

વૈજ્ઞાનિક તાલીમ અને આધુનિક ઈન્ફ્રાસ્ટ્રક્ચર

સરકાર 'ખેલો ઈન્ડિયા' (Khelo India) અને 'ફિટ ઈન્ડિયા' જેવા મિશન દ્વારા પાયાના સ્તરેથી પ્રતિભાઓને શોધી રહી છે. મંત્રીએ આગામી આંતરરાષ્ટ્રીય સ્પર્ધાઓમાં વિજય મેળવવા માટે વૈજ્ઞાનિક તાલીમ (Scientific Training) અને ડેટા-આધારિત પ્રદર્શન મૂલ્યાંકન પર ભાર મૂક્યો હતો. રમતગમતમાં ખાનગી ક્ષેત્રની ભાગીદારી અને સ્પોર્ટ્સ લીગને પ્રોત્સાહન આપીને ભારત 2036 ના ઓલિમ્પિકની યજમાનીના સપના તરફ મક્કમતાથી આગળ વધી રહ્યું છે.

માર્ગદર્શિકા પણ જાહેર કરાઈ

આ પ્રસંગે 'નેશનલ સ્પોર્ટ્સ ગવર્નન્સ એક્ટ 2025' ની માર્ગદર્શિકા પણ જાહેર કરવામાં આવી હતી, જેનો હેતુ રમતગમત માળખાને વધુ મજબૂત અને જવાબદાર બનાવવાનો છે. રમતગમત રાજ્ય મંત્રી રક્ષા ખડસેએ પણ દેશના રમતગમતના ભાવિને વિજ્ઞાન અને મજબૂત સંઘોના પાયા પર ટકી રહેલું ગણાવ્યું હતું.

આ પણ વાંચો : 40 વર્ષથી વધુ વયના કામદારોને મળશે મફત વાર્ષિક આરોગ્ય તપાસ, કેન્દ્રીય મંત્રી Mansukh Mandaviya એ કરી જાહેરાત