Monsoon : ભારે ચોમાસું દેશભરમાં તબાહી મચાવી રહ્યું છે, જ્યાં ઘણા રાજ્યોમાં ભારે વરસાદના કારણે પૂર જેવી સ્થિતિ સર્જાઈ છે. પશ્ચિમ બંગાળ, મધ્યપ્રદેશ, ઉત્તરાખંડ અને રાજસ્થાનમાં સતત ધોધમાર વરસાદે સામાન્ય જનજીવનને સંપૂર્ણપણે ખોરવી નાખ્યું છે. નદીઓ ઓવરફ્લો થઈ રહી છે, જ્યારે રસ્તાઓ જળમગ્ન થઈ ગયા છે. ઘણા વિસ્તારોમાં શાળાઓ અને ઘરો ટાપુઓ બની ગયા છે, જ્યાંથી વહીવટીતંત્ર દ્વારા લોકોને સુરક્ષિત બહાર કાઢવામાં આવી રહ્યા છે.
પશ્ચિમ બંગાળ : કોલકાતામાં પૂર જેવી સ્થિતિ
સોમવાર સાંજે માત્ર બે કલાકના ભારે વરસાદે પશ્ચિમ બંગાળની રાજધાની કોલકાતામાં તબાહી મચાવી દીધી હતી. ઉત્તર અને દક્ષિણ કોલકાતાના નીચાણવાળા વિસ્તારોમાં ઘૂંટણસમા પાણી ભરાઈ ગયા હતા. સેન્ટ્રલ એવન્યુ સહિત અનેક મુખ્ય માર્ગો પર પાણી ભરાઈ જવાના કારણે વાહનવ્યવહાર સંપૂર્ણપણે ઠપ્પ થઈ ગયો હતો અને લાંબો ટ્રાફિક જામ સર્જાયો હતો. ભારે પાણી ભરાવાને કારણે શેરી વિક્રેતાઓના સ્ટોલ વહેતા પાણીમાં તરતા નજરે પડ્યા હતા.
મધ્યપ્રદેશ : સિહોરમાં નદીનું પાણી વધ્યું, 10 લોકોનો બચાવ
મધ્યપ્રદેશના સિહોર જિલ્લાના અહમદપુરમાં ભારે વરસાદને કારણે ભીલાખેરી નદી ઓવરફ્લો થઈ ગઈ હતી. નદીની નજીક આવેલા એક ઘરમાં અચાનક પાણી ઘૂસી જતાં ૫ નાના બાળકો સહિત એક જ પરિવારના 10 સભ્યો ફસાઈ ગયા હતા. આ અંગેની માહિતી મળતા જ અહમદપુર પોલીસ અને સ્થાનિક ગ્રામજનોએ તાત્કાલિક રાહત અને બચાવ કામગીરી હાથ ધરી હતી. ભારે જહેમત બાદ તમામ 10 લોકોને હેમખેમ બચાવી લેવામાં આવ્યા હતા.
ઉત્તરાખંડ : હરિદ્વારમાં વરસાદનું તાંડવ
ઉત્તરાખંડના પછડાદુનમાં અતિશય વરસાદના કારણે નદીઓ અને નાળા તોફાની બન્યા છે. શિમલા બાયપાસ પર અચાનક આવેલા પૂરમાં ૪ મુસાફરોને લઈ જતી એક કાર તણાઈ ગઈ હતી. સભાવાલા આઉટપોસ્ટ પોલીસએ તાત્કાલિક કાર્યવાહી કરીને દોરડાની મદદથી ચારેય મુસાફરોના જીવ બચાવી લીધા હતા. આ ઉપરાંત, સ્થાનિક લોકોએ પોતાના જીવનની પરવા કર્યા વગર રામગઢ ફોર્ડ પર પાણીના તેજ પ્રવાહમાં તણાઈ રહેલા સ્કૂટર સવાર મહિલા અને બાઈક સવારને સુરક્ષિત બહાર કાઢ્યા હતા. બીજી તરફ, પવિત્ર નગરી હરિદ્વારમાં પણ સતત વરસાદના કારણે ભગતસિંહ ચોક અને રાણીપુર મોડ પર પાણી ભરાતા સાવન કાવડ યાત્રાના કાવડિયાઓ અને રાહદારીઓને ભારે હાલાકીનો સામનો કરવો પડી રહ્યો છે.
રાજસ્થાન : શાળાઓ બની ટાપુ, વાહનો પાણીમાં તણાયા
રાજસ્થાનના અનેક જિલ્લાઓમાં મેઘરાજાએ રૌદ્ર સ્વરૂપ ધારણ કર્યું છે. ઝાલાવાડમાં 24 કલાક સુધી ચાલેલા અનરાધાર વરસાદને કારણે રાયપુરના કાચરાખેડી ગામની સરકારી શાળા પાણીમાં ગરકાવ થઈ ગઈ હતી. શાળાની અંદર 40 જેટલા બાળકો અને શિક્ષકો ફસાયા હતા. જિલ્લા કલેક્ટર અને પોલીસ અધિક્ષકની ઉપસ્થિતિમાં SDRF અને NDRF ની ટીમોએ તાત્કાલિક રેસ્ક્યુ ઓપરેશન ચલાવીને તમામ બાળકો અને શિક્ષકોને સુરક્ષિત બહાર કાઢ્યા હતા.
બુંદીમાં માત્ર 55 મિનિટના વરસાદે આખા શહેરને પાણીની નદીમાં ફેરવી દીધું હતું. નાગડી બજાર અને મીરા ગેટ વિસ્તારમાં રસ્તાઓ પર પાણીનો પ્રવાહ એટલો ઝડપી હતો કે પાર્ક કરેલી બાઇકો તરણાઈની જેમ વહી ગઈ હતી. આ ઉપરાંત ભરતપુરમાં પણ પૂરની સ્થિતિ અને ગટર વ્યવસ્થાની ખરાબ હાલત સામે ગુસ્સે ભરાયેલા સ્થાનિક રહેવાસીઓએ વિરોધ પ્રદર્શન કર્યું હતું.
આ પણ વાંચો : Colombia Earthquake : કોલંબિયામાં 7.4 ની તીવ્રતાના ભૂકંપે મચાવી તબાહી, અત્યાર સુધી 132 લોકોના મોત
