નારાયણ સાંઈના છુટાછેડા, પત્ની 8 વર્ષથી લડતી હતી કાનૂની લડાઈ, આખરે આવ્યો અંત
વર્ષો સુધી ચાલેલી કાનૂની ખેંચતાણ બાદ આસારામના પુત્ર નારાયણ સાંઈના લગ્નજીવનનો કાયદેસર રીતે અંત આવ્યો છે. ઈન્દોરની અદાલતે માત્ર છૂટાછેડા જ નથી આપ્યા, પરંતુ પત્નીના ભવિષ્યને સુરક્ષિત કરવા માટે એક એવી રકમ ચૂકવવાનો આદેશ કર્યો છે જેની ચર્ચા હવે આખા દેશમાં થઈ રહી છે. જેલમાં બંધ નારાયણ સાંઈ માટે આ આદેશ નવી મુશ્કેલીઓ લાવશે કે કેમ તે જાણવું રસપ્રદ રહેશે.
Advertisement
- Narayan Sai અને પત્ની જાનકીના છૂટાછેડા મંજૂર
- ઈન્દોર ફેમિલી કોર્ટે એલીમની તરીકે 2 કરોડનો આદેશ આપ્યો
- પત્ની જાનકીએ ઉપેક્ષા અને અન્ય સંબંધોના લગાવ્યા હતા આક્ષેપ
- વર્ષ 2013થી અલગ રહેતા દંપતીની 8 વર્ષની કાનૂની લડાઈનો અંત
- 50 લાખની બાકી રકમની વસૂલાત માટે પણ કોર્ટની કાર્યવાહી શરૂ
- દુષ્કર્મ કેસમાં સજા કાપી રહેલા નારાયણ સાંઈને વધુ એક કાનૂની ફટકો
મધ્યપ્રદેશના ઈન્દોરની ફેમિલી કોર્ટે એક અત્યંત ચર્ચિત અને લાંબા સમયથી ચાલતા વૈવાહિક વિવાદમાં મહત્વનો ચુકાદો આપ્યો છે. સ્વયંભૂ ધર્મગુરુ આસારામના પુત્ર નારાયણ સાંઈ (Narayan Sai) અને તેની પત્ની જાનકી હરપાલાણી (Janaki Harpalani) ના લગ્નજીવનનો કાયદેસર રીતે અંત આવ્યો છે. કોર્ટે છૂટાછેડાની અરજી મંજૂર કરવાની સાથે નારાયણ સાંઈને તેની પત્નીને કાયમી ભરણપોષણ (Permanent Alimony) તરીકે 2 કરોડ રૂપિયા ચૂકવવાનો આદેશ આપ્યો છે.

