Pahalgam Terror Attack NIA Chargesheet: હુમલામાં હાફિઝ સઈદની ભૂમિકા
રાષ્ટ્રીય તપાસ એજન્સી NIA એ પહલગામ આતંકી હુમલાના કેસમાં પાકિસ્તાન સ્થિત આતંકવાદી હાફિઝ સઈદ વિરુદ્ધ જમ્મુની સ્પેશિયલ કોર્ટમાં સપ્લિમેન્ટ્રી ચાર્જશીટ દાખલ કરી છે. આ ચાર્જશીટમાં હાફિઝ સઈદને આ હુમલાનો મુખ્ય કાવતરાખોર ઠેરવવામાં આવ્યો છે. તેના પર આતંકવાદીઓને નિર્દેશિત કરવાનો અને ભારત વિરુદ્ધ જંગ છેડવાનો આરોપ છે. હાફિઝ સઈદને પ્રતિબંધિત સંગઠન લશ્કર-એ-તૈયબા અને તેના પ્રોક્સી સંગઠન ધ રેઝિસ્ટન્સ ફ્રન્ટના પ્રમુખ તરીકે દર્શાવવામાં આવ્યો છે. NIA એ તેના વિરુદ્ધ UAPA ની વિવિધ કલમો હેઠળ ગુનો નોંધ્યો છે. આ દસ્તાવેજ અગાઉ દાખલ કરવામાં આવેલી 1,597 પાનાની ચાર્જશીટનો જ એક મહત્વનો હિસ્સો છે. NIA એ 15 December 2025 ના રોજ પ્રથમ ચાર્જશીટ દાખલ કરી હતી, જેમાં સાજિદ જટ્ટ સહિત 6 આતંકીઓને આરોપી બનાવ્યા હતા.
Pahalgam Terror Attack NIA Chargesheet: આતંકી સાજિદ જટ્ટની સક્રિયતા
પહલગામ હુમલાનો માસ્ટરમાઇન્ડ લશ્કર-એ-તૈયબાનો આતંકવાદી સૈફુલ્લાહ ઉર્ફે સૈફુલ્લાહ સાજિદ જટ્ટ ઉર્ફે લંગડા છે. આતંકી સાજિદ જટ્ટ પાકિસ્તાનના લાહોરના કસૂર વિસ્તારમાં રહે છે. તે આતંકવાદીઓનો મુખ્ય હેન્ડલર હતો અને સતત તેમને રિયલ ટાઈમ ડાયરેક્શન આપતો હતો. હુમલા માટેની ચોક્કસ જગ્યા બેસરન વેલીની લોકેશન પણ સાજિદ જટ્ટે જ મોકલી હતી. હુમલા દરમિયાન પણ તે સતત આતંકીઓના સંપર્કમાં હતો અને તેમને સૂચનાઓ આપતો હતો.
Pahalgam Terror Attack NIA Chargesheet: સ્થાનિક ટૂરિસ્ટ ગાઈડની બેદરકારી
તપાસમાં સામે આવ્યું છે કે જો ટૂરિસ્ટ ગાઈડ પરવેઝ અહેમદ જોઠાર અને બશીર અહેમદ જોઠારે સમયસર માહિતી આપી હોત તો આ હુમલાને ટાળી શકાયો હોત. બંને ગાઈડે બેસરન વિસ્તારમાં આતંકીઓને જોયા હતા, પરંતુ સુરક્ષા એજન્સીઓને જાણ કરી ન હતી. હાલ બંને ગાઈડ પોલીસ કસ્ટડીમાં છે. હુમલાના એક દિવસ પહેલા આતંકીઓએ પરવેઝની ઝૂંપડીમાં જઈને ખાવાનું માંગ્યું હતું અને ત્યાં જમ્યા હતા. આતંકવાદીઓ જતી વખતે પોતાની સાથે વધારાની રોટલી અને શાકભાજી પણ લઈ ગયા હતા. આતંકીઓએ ફાયરિંગ કરતા પહેલા બેસરન ઘાટીમાં એક ઝાડ નીચે બેસીને ભોજન કર્યું હતું. હુમલા બાદ આતંકીઓએ ધાર્મિક નારા લગાવીને હર્ષ ફાયરિંગ પણ કર્યું હતું.
ટાર્ગેટેડ કિલિંગ અને પીડિતોની સંખ્યા
આ હુમલો ખાસ કરીને ધર્મના આધારે કરવામાં આવેલા ટાર્ગેટેડ મર્ડર તરીકે સામે આવ્યો છે. આ કમનસીબ ઘટનામાં 25 પ્રવાસીઓ અને 1 સ્થાનિક નાગરિકનું મોત નીપજ્યું હતું. 22 April 2025 ના રોજ આતંકીઓએ પહલગામમાં લોકોને તેમના ધર્મ પૂછીને નિશાન બનાવ્યા હતા. ઘટના બાદ પહલગામ પોલીસ સ્ટેશનમાં FIR નોંધાઈ હતી અને બાદમાં કેન્દ્રીય ગૃહ મંત્રાલયે આ મામલો NIA ને સોંપ્યો હતો. NIA આ હુમલામાં સામેલ તમામ આતંકીઓ, તેમના હેન્ડલર્સ, ફંડિંગ નેટવર્ક અને સરહદ પાર બેઠેલા કાવતરાખોરોની ઊંડાણપૂર્વક તપાસ કરી રહી છે.
આતંકવાદીઓનો ખાતમો અને ભારતીય સેનાનો જવાબ
પહલગામ હુમલામાં સામેલ પાકિસ્તાની આતંકી ફૈઝલ જટ્ટ ઉર્ફે સુલેમાન, હબીબ તાહિર ઉર્ફે જિબ્રાન ભાઈ અને હમઝા અફઘાનીને સુરક્ષા દળોએ 28 July 2025 ના રોજ ઠાર માર્યા હતા. આ આતંકીઓ પાસેથી એક ગો-પ્રો કેમેરા પણ મળી આવ્યો હતો. નોંધનીય છે કે, આ હુમલાની સામે ભારતે આક્રમક જવાબ આપ્યો હતો. ભારત સરકારે આ કાયરતાપૂર્ણ હુમલાનો જડબાતોડ જવાબ આપવા માટે ઓપરેશન સિંદૂર શરૂ કર્યું હતું. 6-7 May ની રાત્રે 1:05 વાગ્યે ભારતીય વાયુસેનાએ પાકિસ્તાન અને PoK માં એર સ્ટ્રાઈક કરી હતી. આ ઓપરેશનમાં 24 મિસાઈલોનો ઉપયોગ કરીને 9 આતંકી ઠેકાણાઓને તબાહ કરવામાં આવ્યા હતા. આ હુમલામાં 100 થી વધુ આતંકીઓ માર્યા ગયા હતા. તેમાં જૈશ-એ-મોહમ્મદના વડા મૌલાના મસૂદ અઝહરના પરિવારના 10 સભ્યો અને 4 સહયોગીઓનો પણ ખાતમો થયો હતો.
આ પણ વાંચો---- Ram Mandir donation theft: રામમંદિર દાન ચોરીનો વિવાદ, મહંત નૃત્ય ગોપાલ દાસે કહ્યું, 'આસ્થા સાથે ચેડા સહન નહીં થાય'
