• ચોમાસું 2025: IMDની આગાહી સાચી ઠરી!
• વરસાદનો રેકોર્ડ! અત્યાર સુધી 9% વધુ વરસાદ નોંધાયો
• હિમાચલ-કાશ્મીરમાં ભારે વરસાદે તબાહી મચાવી
• જમ્મુ-કાશ્મીરમાં વાદળ ફાટ્યું, 3ના મોત
• 2 રાજ્યોમાં 7 લોકોના મોત

Heavy Rain : ભારતમાં 2025નું ચોમાસું ભારતીય હવામાન વિભાગ (IMD)ની આગાહીને સાચું સાબિત કરી રહ્યું છે, જેમાં સામાન્ય કરતાં 108% વધુ વરસાદનું અનુમાન વ્યક્ત કરવામાં આવ્યું હતું. 26 જૂન સુધીના આંકડા દર્શાવે છે કે દેશભરમાં 146.6 મીમી વરસાદ નોંધાયો છે, જે સામાન્ય 134.3 મીમીની સરખામણીએ 9.1% વધુ છે. મેદાની વિસ્તારોમાં આ વરસાદ ગરમીથી રાહત આપી રહ્યો છે, પરંતુ પહાડી રાજ્યો જેવા કે જમ્મુ-કાશ્મીર, ઉત્તરાખંડ અને હિમાચલ પ્રદેશમાં ભારે વરસાદે તબાહી મચાવી છે. આ વિસ્તારોમાં ભૂસ્ખલન, વાદળ ફાટવાની ઘટનાઓ અને અચાનક પૂરને કારણે નદીઓ અને નાળાઓ છલકાઈ રહ્યા છે, જેનાથી જાનમાલને ભારે નુકસાન થયું છે. દિલ્હી-એનસીઆર એકમાત્ર એવો વિસ્તાર છે જ્યાં ચોમાસું હજુ સંપૂર્ણ રીતે પહોંચ્યું નથી, પરંતુ આગામી દિવસોમાં વરસાદની શરૂઆત થવાની શક્યતા છે.

દિલ્હી-એનસીઆરમાં ચોમાસાની શરૂઆત

દેશની રાજધાની દિલ્હી અને નજીકના નોઈડા, ગુરુગ્રામ જેવા વિસ્તારોમાં આજે, 27 જૂન, 2025થી ચોમાસાનો પ્રારંભ થઈ શકે છે. હવામાન વિભાગના જણાવ્યા અનુસાર, સાંજથી હવામાનમાં બદલાવ આવશે અને રાત્રે હળવો વરસાદ પડવાની શક્યતા છે. ગઈકાલે દિલ્હીમાં મહત્તમ તાપમાન 38 ડિગ્રી સેલ્સિયસ અને લઘુત્તમ તાપમાન 28.6 ડિગ્રી સેલ્સિયસ નોંધાયું હતું, જેમાં છેલ્લા 24 કલાકમાં 2થી 4 ડિગ્રીનો વધારો થયો છે. IMDએ 2 જુલાઈ સુધી દિલ્હી-એનસીઆરમાં તોફાની પવનો, ગાજવીજ અને વાવાઝોડા સાથે વરસાદની આગાહી કરી છે, જેનાથી ગરમીથી રાહત મળવાની આશા છે.

અન્ય રાજ્યોમાં ચોમાસાની સ્થિતિ

હવામાન વિભાગના અહેવાલ મુજબ, આગામી 7 દિવસમાં ઉત્તર-પશ્ચિમ, મધ્ય, પૂર્વ અને ઉત્તર-પૂર્વ ભારતના ઘણા ભાગોમાં ભારેથી અતિ ભારે વરસાદની શક્યતા છે. દક્ષિણ-પશ્ચિમ ચોમાસાએ રાજસ્થાન, હરિયાણા, પંજાબ અને અન્ય વિસ્તારોને આવરી લીધા છે અને આગામી 3-4 દિવસમાં દેશના બાકીના ભાગોમાં પણ પહોંચી જશે. કોંકણ, ગોવા, મધ્ય મહારાષ્ટ્ર, ગુજરાત, પંજાબ, હરિયાણા, ઉત્તરાખંડ, પૂર્વી અને પશ્ચિમી રાજસ્થાન તેમજ ઉત્તર પ્રદેશમાં 2 જુલાઈ સુધી 30-40 કિમી પ્રતિ કલાકની ઝડપે પવન સાથે વરસાદની ચેતવણી જારી કરવામાં આવી છે. મધ્ય પ્રદેશ, છત્તીસગઢ, ઓડિશા, ઝારખંડ, પશ્ચિમ બંગાળ, સિક્કિમ, બિહાર અને આંદામાન-નિકોબારમાં 30 જૂન સુધી 40-50 કિમી પ્રતિ કલાકની ઝડપે પવન અને ગાજવીજ સાથે વરસાદની આગાહી છે. કેરળ, તમિલનાડુ, દરિયાકાંઠાના આંધ્ર પ્રદેશ, તેલંગાણા, લક્ષદ્વીપ અને કર્ણાટકમાં આગામી 3 દિવસ સુધી 40-60 કિમી પ્રતિ કલાકની ઝડપે પવન અને ભારે વરસાદની સંભાવના છે. અરુણાચલ પ્રદેશમાં 30 જૂન સુધી અતિ ભારે વરસાદનું એલર્ટ જારી કરવામાં આવ્યું છે.

હિમાચલ પ્રદેશમાં વરસાદની તબાહી

હિમાચલ પ્રદેશના કાંગડા અને કુલ્લુ જિલ્લાઓમાં ભારે વરસાદ અને વાદળ ફાટવાની ઘટનાઓએ ભારે નુકસાન પહોંચાડ્યું છે. રાજ્યના મુખ્યમંત્રી સુખવિંદર સુખુએ પુષ્ટિ કરી કે વાદળ ફાટવાને કારણે આવેલા પૂરમાં 5 લોકોના મોત થયા છે. કાંગડામાં ખાનિયારા વિસ્તારના મનુની ખાડમાં અચાનક પૂર આવવાથી 8 કામદારો તણાઈ ગયા હતા, જેમાંથી 5ના મૃતદેહ બુધવાર અને ગુરુવારે બહાર કાઢવામાં આવ્યા. કુલ્લુમાં પણ પૂરને કારણે 10 ઘરો ધરાશાયી થઇ ગયા અને એક પાવર પ્રોજેક્ટ ધરાશાયી થયો, જેના કારણે ઘણા વિસ્તારોમાં અંધારપટ છવાઈ ગયો. IMDએ 27 જૂનથી 1 જુલાઈ દરમિયાન હિમાચલ પ્રદેશમાં ભારે વરસાદનું એલર્ટ જારી કર્યું છે, જેમાં 29 જૂન માટે ઓરેન્જ એલર્ટ છે. ઉના, બિલાસપુર, સોલન, શિમલા, કાંગડા, સિરમૌર, ચંબા, કુલ્લુ અને મંડીમાં ભારેથી અતિ ભારે વરસાદની આગાહી સાથે પૂર અને ભૂસ્ખલનની ચેતવણી જારી કરવામાં આવી છે.

જમ્મુ-કાશ્મીરમાં વરસાદનું તાંડવ

જમ્મુ-કાશ્મીરમાં ચોમાસાના ભારે વરસાદે પરિસ્થિતિ વણસી દીધી છે. રાજૌરી, પૂંછ, ડોડા અને કઠુઆ જિલ્લાઓમાં વાદળ ફાટવાની ઘટનાઓ અને પૂરને કારણે નદીઓ અને નાળાઓ છલકાઈ રહ્યા છે. આ ઘટનાઓમાં 2 બાળકો સહિત 3 લોકોના મોત થયા છે. રાજૌરીના કાલાકોટમાં નાળામાં પાણી ભરાવાથી એક પિતરાઈ ભાઈ અને બહેન ડૂબી જવાથી મૃત્યુ પામ્યા. અન્ય રાજ્યોમાં પણ વરસાદે નુકસાન પહોંચાડ્યું છે, જેમાં ઉત્તર પ્રદેશના દેવરિયામાં પ્રદીપ વર્મા અને ચંદનના મોત નોંધાયા છે. હવામાન વિભાગે 27 જૂનથી 29 જુલાઈ સુધી જમ્મુ-કાશ્મીરમાં ભારે વરસાદની આગાહી કરી છે, જેનાથી પરિસ્થિતિ વધુ ગંભીર બની શકે છે.

આ પણ વાંચો :  નાગપુર એરપોર્ટ પર મુસાફરો વરસાદમાં ભીંજાયા, ન મળી આ સુવિધા