Retail Inflation Data : ભારતમાં મોંઘવારીનો કહેર! RBI ની ચિંતા વધી

• ભારતમાં મોંઘવારીનો કહેર, 6% મર્યાદા વટાવી
• તહેવારોમાં મોંઘવારીનો ઝટકો: ખાદ્ય પદાર્થોના ભાવમાં તેજી
• ખાદ્ય મોંઘવારી 9.69% પર, સામાન્ય જનતાને જોરદાર ઝટકો
• છૂટક મોંઘવારી 14 મહિનાના ઉચ્ચ સ્તરે
• શાકભાજી, ફળના ભાવમાં ઉછાળો: મોંઘવારીમાં વધારો

ભારતની છૂટક મોંઘવારી (Retail Inflation) ના તાજેતરના આંકડાઓમાં મોટો વધારો નોંધાયો છે, જેમાં ઓક્ટોબર 2024 માં મોંઘવારીનો દર 6.21% પર પહોંચી ગયો છે. આ વધારો 14 મહિના બાદ પ્રથમવાર 6%ની મર્યાદાને વટાવી રહ્યો છે, જે ભારતીય રિઝર્વ બેંક (RBI) માટે ચિંતાજનક છે. RBI મોંઘવારી દરને 6% થી નીચે રાખવાનો પ્રયાસ કરે છે, પરંતુ આંકડાઓ દર્શાવે છે કે તહેવારોની સિઝનમાં જરૂરી વસ્તુઓના ભાવમાં થયેલા વધારાના કારણે આ મોંઘવારી જોવા મળી રહી છે. સપ્ટેમ્બરમાં મોંઘવારીનો દર 5.49% હતો, જે વધીને હવે 6.21% પર પહોંચી ગયો છે.

ખાદ્ય મોંઘવારીમાં તેજી

ખાદ્ય મોંઘવારી (Food Inflation) ઓક્ટોબરમાં વધીને 9.69% થઈ છે, જે સપ્ટેમ્બરમાં 9.24% હતી. આથી ખાદ્ય મોંઘવારીમાં પણ સતત વધારો જોવા મળી રહ્યો છે, જે સામાન્ય જનતાના જીવનમાં સીધી અસર પાડે છે. આકરા ભાવ વધારાનું મુખ્ય કારણ શાકભાજી, ફળો અને તેલ જેવા આવશ્યક ખાદ્ય પદાર્થોના ભાવમાં ઉછાળો છે. ટામેટા, ડુંગળી અને બટાકા જેવા રોજીંદા વપરાશના ખોરાકમાં ઉંચા ભાવને કારણે મોંઘવારી વધી રહી છે, જ્યારે દાળ, ઈંડા, ખાંડ અને મસાલાના ભાવમાં થોડો ઘટાડો થયો છે.

ગ્રામીણ અને શહેરી વિસ્તારોમાં મોંઘવારીના પ્રભાવ

અહીં મહાનગરો અને ગ્રામીણ વિસ્તારો બંનેમાં મોંઘવારીના દરમાં વધારો જોવા મળ્યો છે. ગ્રામીણ મોંઘવારી સપ્ટેમ્બરના 5.87% કરતા વધીને 6.68% થઈ છે, જ્યારે શહેરી મોંઘવારી 5.05% થી વધીને 5.62% પહોંચી છે. આ ઉછાળો મુખ્યત્વે ખાદ્ય મોંઘવારીના કારણે છે. ગ્રામીણ વિસ્તારોમાં ખાદ્ય મોંઘવારી 10.69% પર છે, જ્યારે શહેરી વિસ્તારોમાં તે 11.09% પર પહોંચી ગઈ છે, જેના કારણે સામાન્ય જનતાના ખિસ્સા પર તેની સીધી અસર પડી રહી છે.

મોંઘવારીમાં વધારો થવા પાછળના કારણો

મોંઘવારીના આ ઊંચા દરનું મુખ્ય કારણ ખાદ્ય પદાર્થોના ઊંચા ભાવ છે. ખાસ કરીને શાકભાજી અને તેલના ભાવમાં નોંધપાત્ર ઉછાળો આવ્યો છે. ટામેટા, બટાકા અને ડુંગળીના ભાવ આખા મહિના દરમિયાન સતત વધતા રહ્યા, અને ઓક્ટોબરમાં ડુંગળીના જથ્થાબંધ ભાવ 40-60 રૂપિયા પ્રતિ કિલોથી વધીને 70-80 રૂપિયા પ્રતિ કિલો સુધી પહોંચ્યા છે, જે ચિંતાનું કારણ બની છે. આકસ્મિક તીવ્ર વૃદ્ધિથી મોંઘવારીના આંકડાઓ પર નકારાત્મક અસર પડી છે.

આ પણ વાંચો:  Price hike: ચા, બિસ્કિટથી લઇને શેમ્પૂ સુધીની આ વસ્તુઓ થશે મોંઘી,જાણો કારણ