Share Market Today: સોમવારે સવારે શેરબજારના પ્રારંભિક આંકડા
બજાર ખુલ્યા બાદ પ્રારંભિક મિનિટોમાં ભારે ઉતાર-ચઢાવ જોવા મળ્યો હતો. બોમ્બે સ્ટોક એક્સચેન્જનો સેન્સેક્સ 47.96 અંક (0.06%) ના સામાન્ય ઘટાડા સાથે 77052.51 ના સ્તર પર ટ્રેડ કરતો જોવા મળ્યો હતો. બીજી તરફ નિફ્ટી ઇન્ડેક્સનું પ્રદર્શન થોડું સારું રહ્યું હતું. નિફ્ટી 13.55 અંક (0.06%) ની હળવી બઢત સાથે 24069.55 પર ખૂલ્યો હતો અને ટૂંક જ સમયમાં 24100 ની સપાટી પણ વટાવી ગયો હતો. આ અસ્થિર વાતાવરણ વચ્ચે 'ઇટરનલ' અને 'ટ્રેન્ટ' ના શેર ટોપ ગેનર્સની યાદીમાં મોખરે રહ્યા હતા.
Share Market Today: બજારની ઠંડી શરૂઆત પાછળના મુખ્ય વૈશ્વિક કારણો
સ્થાનિક બજારના આ સાવચેતીભર્યા વલણ પાછળ આંતરરાષ્ટ્રીય ઘટનાક્રમ જવાબદાર છે. વીકેન્ડ દરમિયાન અમેરિકા અને ઈરાન વચ્ચે સરહદી અને રાજદ્વારી તણાવ ફરી એકવાર વધી ગયો છે. આ ભૌગોલિક-રાજકીય અસ્થિરતાના લીધે આંતરરાષ્ટ્રીય બજારમાં કાચા તેલની કિંમતોમાં સાધારણ ઉછાળો આવ્યો હતો. ઉર્જાના ભાવો વધવાની આશંકાએ રોકાણકારોને મોટા સોદા કરતા અટકાવ્યા હતા, જેના લીધે સોમવારે સવારે બજારની ગતિ ધીમી પડી ગઈ હતી.
બજારના નિષ્ણાતોનો આગામી સમયનો આશાવાદી અંદાજ
સપ્તાહની શરૂઆત ભલે નબળી રહી હોય પરંતુ શેરબજારના વિશ્લેષકો ભારતીય ઇક્વિટી માર્કેટ માટે હજુ પણ હકારાત્મક વલણ ધરાવે છે. એક્સપર્ટ્સના મતે ટૂંકા ગાળામાં બજારનો ટ્રેન્ડ પોઝિટિવ રહેશે. અને નિફ્ટી 24000 ના મજબૂત સ્તરને ટકાવી રાખશે. આ મજબૂતાઈ પાછળ ત્રણ મુખ્ય પરિબળો કામ કરશે, જેમાં આગામી દિવસોમાં વૈશ્વિક તણાવ ઓછો થવાની આશા, ક્રૂડ ઓઈલના ભાવમાં સંભવિત ઘટાડો અને ભારતીય ચલણ રૂપિયાની મજબૂત સ્થિતિનો સમાવેશ થાય છે.
વૈશ્વિક શેરબજારોમાંથી મળી રહેલા સંકેતો
આંતરરાષ્ટ્રીય મોરચે નજર કરીએ તો ભારતીય બજાર માટે અન્ય વૈશ્વિક બજારોમાંથી એકંદરે સારા સંકેતો મળી રહ્યા છે. અમેરિકાના S&P 500 ફ્યુચર્સમાં 0.5% નો સુધારો જોવા મળ્યો હતો. એશિયન બજારોમાં હોંગકોંગનો હેંગસેંગ ઇન્ડેક્સ સૌથી વધુ 1.9% ના શાનદાર વધારા સાથે કારોબાર કરી રહ્યો હતો. આ સિવાય ચીનનો શાંઘાઈ કમ્પોઝિટ 0.2% અને ઓસ્ટ્રેલિયાનો S&P/ASX 200 ઇન્ડેક્સ પણ 0.2% પ્લસ હતા. જાપાનનો ટોપિક્સ ઇન્ડેક્સ ફ્લેટ રહ્યો હતો જ્યારે યુરોપિયન માર્કેટમાં યુરો સ્ટોક્સ 50 ફ્યુચર્સ 0.2% ના વધારા સાથે ગ્રીન ઝોનમાં ટ્રેડ થઈ રહ્યા હતા.
આ પણ વાંચો--- Petrol Diesel Prices : પેટ્રોલ-ડીઝલના ભાવમાં ભડકો, હૈદરાબાદ અને મુંબઈમાં કિંમતો આસમાને!
