• ઉત્તરપ્રદેશમાં રાજકારણમાં ગરમાવો
• RSSPના રાષ્ટ્રીય અધ્યક્ષ પર હુમલો
• બે યુવકોએ માળા પહેરવાના બહાને મારો લાફો
• સમગ્ર ઘટનાનો વીડિયો સોશિયલ મીડિયા પર વાયરલ

Swami Prasad Maurya attack: ઉત્તર પ્રદેશમાં રાજકીય હલચલ મચાવતી એક ઘટનામાં, રાષ્ટ્રીય શોષિત સમાજ પાર્ટી (RSSP)ના રાષ્ટ્રીય અધ્યક્ષ અને પૂર્વ મંત્રી સ્વામી પ્રસાદ મૌર્ય (Swami Prasad Maurya ) પર રાયબરેલીમાં હુમલો થયો છે. બુધવારે, 6 ઓગસ્ટ 2025ના રોજ, રાયબરેલીના સારસ ચોક ખાતે તેમના સ્વાગત સમારોહ દરમિયાન બે યુવકોએ માળા પહેરાવવાના બહાને તેમને થપ્પડ મારી.

આ સનસનાટીપૂર્ણ ઘટના કેમેરામાં કેદ થઈ ગઈ છે, જે બાદ મૌર્યના સમર્થકોએ ગુસ્સે થઈને હુમલાખોરોને પકડીને તેમની જોરદાર મારઝૂડ કરી. આ હુમલાએ યોગી સરકારની કાયદો અને વ્યવસ્થા પર ગંભીર સવાલો ઊભા કર્યા છે.

શું બન્યું હતું?

લખનઉથી ફતેહપુર જતા સમયે સ્વામી પ્રસાદ મૌર્ય રાયબરેલીના સારસ ચોક પર રોકાયા હતા, જ્યાં તેમના સમર્થકો ફૂલ-માળા લઈને સ્વાગત માટે એકઠા થયા હતા. આ દરમિયાન, બે યુવકો ભીડમાં ઘૂસીને મૌર્યની નજીક પહોંચ્યા. માળા પહેરાવવાના બહાને એક યુવકે પાછળથી મૌર્યના માથા પર થપ્પડ મારવાનો પ્રયાસ કર્યો. જોકે, થપ્પડ હળવી રીતે મૌર્યને વાગી અને બાજુમાં ઊભેલા એક કાર્યકર્તાને પણ તેનો ધક્કો લાગ્યો. વીડિયોમાં સ્પષ્ટ દેખાય છે કે હુમલાખોર ભાગવાનો પ્રયાસ કરે છે, પરંતુ મૌર્યના સમર્થકોએ તેને પકડી લીધો.

પોલીસની હાજરીમાં સમર્થકોનો ગુસ્સો (Swami Prasad Maurya attack)

હુમલા બાદ મૌર્યના સમર્થકોનો ગુસ્સો ભયંકર રીતે ભડક્યો હતો. તેમણે બંને હુમલાખોરોને દોડાવી-દોડાવીને લાત-ઘૂંસા અને લાકડીઓથી માર માર્યો. આ મારામારીમાં ઇન્સ્પેક્ટર અજય રાયના યુનિફોર્મ પર પણ લોહીના ડાઘ લાગી ગયા હતા. પોલીસે હુમલાખોરોને અટકાયતમાં લીધા, પરંતુ સમર્થકોનો ગુસ્સો શાંત થયો નહીં. એક સમર્થકે આ ઘટનાને પૂર્વ આયોજિત હુમલો ગણાવી અને કહ્યું કે મૌર્ય પછાત સમાજનો અવાજ છે, તેથી તેમને નિશાન બનાવવામાં આવ્યા છે.

આ પણ વાંચો: ચોમાસું બન્યું આફત: ઉત્તરાખંડમાં વાદળ ફાટ્યુ, કેદારનાથ યાત્રા સ્થગિત; હિમાચલમાં 449 રસ્તા બંધ

સ્વામી પ્રસાદ મૌર્યએ સરકારને ઘેરી

હુમલા બાદ સ્વામી પ્રસાદ મૌર્યએ યોગી સરકાર પર આકરા પ્રહારો કર્યા. તેમણે કહ્યું કે, "કરણી સેનાના ગુંડાઓ કાયદાનો ભંગ કરી રહ્યા છે અને સરકાર મૂંગી, બહેરી અને આંધળી બનીને તમાશો જોઈ રહી છે." મૌર્યએ આને રાજકીય કાવતરું ગણાવ્યું અને કહ્યું કે આવા હુમલા તેમની વાતને દબાવી શકશે નહીં. તેમને કોઈ ગંભીર ઈજા થઈ નથી અને તેઓ સંપૂર્ણપણે સુરક્ષિત છે.

પોલીસ તપાસ ચાલુ

પોલીસે બંને હુમલાખોરોની ધરપકડ કરીને આ મામલે તપાસ શરૂ કરી છે. સૂત્રોના જણાવ્યા અનુસાર, આ હુમલો મૌર્યના વિવાદાસ્પદ નિવેદનો અને તેમની નવી પાર્ટી RSSPની વધતી રાજકીય સક્રિયતા સાથે જોડાયેલો હોઈ શકે છે. પોલીસ એ પણ તપાસ કરી રહી છે કે શું આ હુમલો કરણી સેના કે અન્ય કોઈ સંગઠનની યોજનાનો ભાગ હતો.

સ્વામી પ્રસાદ મૌર્યનો રાજકીય પ્રવાસ

સ્વામી પ્રસાદ મૌર્ય, જેમણે 2024માં સમાજવાદી પાર્ટી (SP) છોડીને પોતાની નવી પાર્ટી RSSP બનાવી, તેઓ લાંબા સમયથી OBC અને દલિત સમાજ માટે અવાજ ઉઠાવી રહ્યા છે. રામચરિતમાનસ અને હિન્દુ ધર્મ પર તેમના નિવેદનોએ ઘણી વાર વિવાદ ઊભો કર્યો છે. 2023માં તેમના પર જૂતા ફેંકવાની ઘટના અને હવે આ થપ્પડની ઘટના, તેમની વધતી જતી રાજકીય પડકારને દર્શાવે છે. આ હુમલો ન માત્ર તેમની સુરક્ષા પર સવાલ ઊભા કરે છે, પરંતુ ઉત્તર પ્રદેશના રાજકારણમાં નવી હલચલ પેદા કરી શકે છે. પોલીસ તપાસ બાદ જ હુમલાખોરોનો હેતુ સ્પષ્ટ થશે.

આ પણ વાંચો:  PM મોદીએ કર્યું Kartavya Bhavan નું ઉદ્ઘાટન, જાણો શું છે ખાસિયત