હાવડાના ઉદયનારાયણપુરમાં પોલીસનો સપાટો, કપડાની દુકાનમાંથી પકડાયા નેતાજી
પશ્ચિમ બંગાળના હાવડા જિલ્લા હેઠળ આવતા ઉદયનારાયણપુર પોલીસ સ્ટેશન વિસ્તારના બિલાસપુરમાં રવિવારે ભારે હોબાળો મચી ગયો હતો. સ્થાનિક ટીએમસી નેતા બ્રહ્માનંદ ચક્રવર્તી વિરુદ્ધ પોલીસને સતત ફરિયાદો મળી રહી હતી. જ્યારે પોલીસની ટીમ તેમની ધરપકડ કરવા માટે ઘટનાસ્થળે પહોંચી, ત્યારે નેતાજી ફિલ્મી ઢબે ભાગીને બાજુની એક કપડાની દુકાનના સ્ટોરરૂમમાં ઘુસી ગયા હતા. પોલીસથી બચવા માટે તેમણે સાડીઓના મોટા બંડલો પોતાની ઉપર ગોઠવી દીધા હતા જેથી કોઈને શંકા ન જાય.
કટ મની અને 2021ની ચૂંટણી હિંસા સહિતના ગંભીર આરોપો
"સ્થાનિક લોકોએ બ્રહ્માનંદ ચક્રવર્તી પર સરકારી આવાસ યોજનાના ફંડમાંથી ગેરકાયદેસર રીતે 'કટમની' (કમિશન) લેવા અને ધાક-ધમકી આપીને જબરન વસૂલાત કરવાના ગંભીર આરોપો લગાવ્યા છે." - સ્થાનિક પોલીસ સૂત્ર
પોલીસ અધિકારીઓના જણાવ્યા અનુસાર, પકડાયેલા તૃણમૂલ કોંગ્રેસના નેતા માત્ર આર્થિક કૌભાંડમાં જ નહીં, પરંતુ વર્ષ ૨૦૨૧ માં પશ્ચિમ બંગાળ વિધાનસભા ચૂંટણી પછી થયેલી ભયાનક રાજકીય હિંસાના મામલામાં પણ વોન્ટેડ હતા. પોલીસ લાંબા સમયથી તેમની શોધખોળ ચલાવી રહી હતી.
પોલીસે એક-એક કરીને સાડીઓ હટાવી, વીડિયો સોશિયલ મીડિયા પર વાયરલ
દુકાનમાં સર્ચ ઓપરેશન દરમિયાન પોલીસ કર્મચારીઓને સ્ટોરરૂમમાં સાડીઓના અસામાન્ય ઢગલા પર શંકા ગઈ હતી. પોલીસે જ્યારે એક પછી એક સાડીઓના બંડલ હટાવવાનું શરૂ કર્યું ત્યારે અંદરથી ટીએમસી નેતા બ્રહ્માનંદ ચક્રવર્તી મળી આવ્યા હતા. પોલીસે તાત્કાલિક તેમની ધરપકડ કરી લીધી હતી. આ સમગ્ર ઓપરેશનનો વીડિયો ત્યાં હાજર કોઈ વ્યક્તિએ કેમેરામાં કેદ કરી લીધો હતો, જે હવે ઇન્ટરનેટ પર જોરદાર ટ્રેન્ડ થઈ રહ્યો છે. વિપક્ષી પક્ષો આ વીડિયો શેર કરીને બંગાળ સરકાર પર આકરા પ્રહારો કરી રહ્યા છે.
આ પણ વાંચો : Delhi MCD Action : 21 મોત બાદ MCD એક્શન મોડમાં! 94 મિલકતો તોડી પડાઈ
