એનાલોગ પનીરના દૂષણને ડામવા માટે તંત્ર સક્રિય, નવસારી અને પોરબંદરમાં તપાસના ધમધમાટ

ડેરીઓ તથા રેસ્ટોરન્ટમાં દરોડા પાડવામાં આવ્યા

પ્રાપ્ત વિગતો અનુસાર, પોરબંદરમાં મનપાના ફૂડ વિભાગ અને જિલ્લા ફૂડ એન્ડ ડ્રગ્સ વિભાગ દ્વારા સંયુક્ત રીતે ડેરીઓ તથા રેસ્ટોરન્ટમાં દરોડા પાડવામાં આવ્યા હતા. આ તપાસ દરમિયાન પોરબંદરના 'હેલ્થી ફૂડ રેસ્ટોરન્ટ'માંથી 75 કિલો અને 'ગીરીરાજ થાળ'માંથી પનીર સહિત 10 કિલો જેટલો વાસી તથા અખાદ્ય જથ્થો મળી આવ્યો હતો, જેને તંત્ર દ્વારા તાત્કાલિક જપ્ત કરવામાં આવ્યો છે. જોકે, આ જ અભિયાન અંતર્ગત પારસ ડેરી અને વિજય ડેરી ખાતે પનીરની તપાસ કરવામાં આવતા કોઈ પણ પ્રકારનો વાંધાજનક જથ્થો ન હોવાનું સામે આવ્યું હતું.

Analog Paneer Raid Gujarat: દૂષણને ડામવા માટે તંત્ર સંપૂર્ણપણે સક્રિય

બીજી બાજુ, નવસારી જિલ્લામાં પણ એનાલોગ પનીરના દૂષણને ડામવા માટે તંત્ર સંપૂર્ણપણે સક્રિય બન્યું છે. શહેરની વિવિધ હોટલો અને રેસ્ટોરન્ટોમાં આકસ્મિક તપાસ હાથ ધરીને વાનગીઓમાં નકલી કે એનાલોગ પનીર વાપરવા સામે કડક કાર્યવાહીના સંકેત આપવામાં આવ્યા છે. તંત્ર દ્વારા હોટલોમાંથી પનીરના 20થી વધુ સેમ્પલ ગુણવત્તા ચકાસવા માટે લેબમાં મોકલી આપવામાં આવ્યા છે. ફૂડ વિભાગે સ્પષ્ટ કર્યું છે કે લેબ રિપોર્ટ આવ્યા બાદ કાયદાકીય નિયમોનું ઉલ્લંઘન કરનાર ગુનેગારો સામે કડકમાં કડક કાયદાકીય પગલાં લેવામાં આવશે.

જૂનાગઢમાં પ્રતિબંધિત પનીર અને ચીઝ સામે મોટી કાર્યવાહી

જૂનાગઢમાં મનપાની ફૂડ શાખા અને જિલ્લા FDC ટીમ દ્વારા શહેરની 14 વેપારી પેઢીઓમાં સઘન ચેકિંગ હાથ ધરીને રૂ. 2.04 લાખથી વધુ કિંમતનો 584.5 કિલોગ્રામ પ્રતિબંધિત પનીર અને ચીઝ એનાલોગનો જથ્થો જપ્ત કરવામાં આવ્યો છે. આ કાર્યવાહી દરમિયાન અમાન સેલ્સમાંથી 496 કિલો, શ્રીજી ફેન્સી ઢોંસામાંથી 50 કિલો, યશ ટ્રેડિંગમાંથી 24 કિલો અને ગામઠી રેસ્ટોરન્ટમાંથી 14.5 કિલો શંકાસ્પદ જથ્થો મળી આવ્યો હતો, જે તમામનો સ્થળ પર જ નાશ કરવામાં આવ્યો છે. નાગરિકોના સ્વાસ્થ્ય સાથે ચેડાં કરનારા તત્વો સામે તંત્ર દ્વારા આગામી દિવસોમાં પણ આ પ્રકારની સઘન કાર્યવાહી ચાલુ રહેશે.

આ પણ વાંચો: ઓગડ મઠ કેસમાં નવો વળાંક: મહંત બળદેવનાથને પોલીસ સ્ટેશનમાંથી જ મળ્યા જામીન!