Dahod: ગાંગરડીના તળાવમાંથી મળેલો મૃતદેહ કોનો? પોલીસ દ્વારા તપાસનો ધમધમાટ

Dahod: મૃતદેહ બહાર કાઢી ઓળખ કરવા કવાયત શરૂ કરી

મળતી જાણકારી અનુસાર આજે 3 એપ્રિલે સવારે વહેલી સવારે ગાંગરડી ગામના પાદરે આવેલા મહુનાળા તળાવમાં અજાણ્યા પુરુષનો મૃતદેહ તળાવામાં તરતો જોવા મળ્યો હતો. મૃતદેહ જોવા લોકોના ટોળેટોળા ઉમટી પહડ્યા હતા. જે બાદ સ્થાનિકોએ પોલીસને જાણ કરી હતી. ઘટનાની જાણ થતાં જ ગરબાડા પોલીસનો કાફલો ઘટનાસ્થળે દોડી આવ્યો હતો. રબાડા પોલીસે સ્થાનિક તરવૈયાઓની મદદથી અજાણ્યા પુરુષના મૃતદેહને તળાવમાંથી બહાર કઢાવ્યો હતો. જે બાદ પોલીસે મૃતદેહનો કબજો મેળવી પંચનામું કર્યા બાદ તેને પોસ્ટમોર્ટમ અર્થે નજીકની સરકારી હોસ્પિટલમાં ખસેડ્યો હતો. પ્રાથમિક દ્રષ્ટિએ મૃતક યુવકની વય અને તેની ઓળખ અંગે કોઈ પુરાવા સ્થળ પરથી મળ્યા નથી. આ યુવક કોણ છે, ક્યાંનો રહેવાસી છે અને આ નિર્જન સ્થળે તે કેવી રીતે પહોંચ્યો તે પોલીસ માટે હાલ એક મોટો પ્રશ્ન છે.

હત્યા કે આત્મહત્યા?

આ ઘટનાને પગલે અનેક તર્ક-વિતર્ક સર્જાઈ રહ્યા છે. યુવક તળાવમાં પડી જવાથી ડૂબી ગયો છે કે પછી કોઈ અગમ્ય કારણોસર તેણે આત્મહત્યા કરી છે? કોઈ અજાણ્યા શખ્સોએ યુવકની હત્યા કર્યા બાદ પુરાવાનો નાશ કરવા માટે મૃતદેહને તળાવમાં ફેંકી દીધો હોવાની શક્યતા પર પણ તપાસ કેન્દ્રિત કરવામાં આવી છે. હાલમાં મૃત્યુનું સચોટ કારણ જાણી શકાયું નથી. હાલ પોલીસે અકસ્માતે મોતનો ગુનો નોંધી આસપાસના લોકોની પૂછપરછ શરૂ કરી છે અને તપાસનો ધમધમાટ તેજ કર્યો છે.

અહેવાલઃ રાહુલ ગારી, ગરબાડા

આ પણ વાંચોઃ કડીમાં Love Marriage ની સજા લોહીથી લખાઈ: પરિણીતા પર પિયર પક્ષનો હુમલો, સાસુ-જેઠાણીને પણ ન છોડ્યા!