Dwarka News: પ્રતિબંધિત ગ્લુ ટ્રેપનું વેચાણ કરતા 2 વેપારી સામે SOG ની કાર્યવાહી

Dwarka News: દેવભૂમિ દ્વારકા જિલ્લા કલેક્ટર દ્વારા પ્રાણીઓની સુરક્ષા અને પર્યાવરણીય જોખમોને ધ્યાનમાં રાખીને ગ્લુ ટ્રેપ (ગુંદર ધરાવતા ઉંદર પકડવાના સાધન) ના વેચાણ અને ઉપયોગ પર કડક પ્રતિબંધ ફરમાવતું જાહેરનામું બહાર પાડવામાં આવ્યું હતું. આ પ્રતિબંધનો મુખ્ય હેતુ પક્ષીઓ અને અન્ય જીવજંતુઓને થતી હાનિ અટકાવવાનો છે. જોકે, ખંભાળિયામાં કેટલાક વેપારીઓ દ્વારા આ નિયમોને નેવે મૂકીને ગેરકાયદેસર રીતે આ પ્રોડક્ટનું વેચાણ કરવામાં આવતું હોવાની બાતમી સ્થાનિક SOG પોલીસને મળી હતી.

SOG પોલીસના દરોડા

બાતમીના આધારે, SOG પોલીસની ટીમે ખંભાળિયાના વિવિધ વિસ્તારોમાં આકસ્મિક દરોડા પાડ્યા હતા. આ કાર્યવાહી દરમિયાન બે વેપારીઓને ત્યાંથી મોટી સંખ્યામાં પ્રતિબંધિત જથ્થો મળી આવ્યો હતો. પોલીસે ઘટનાસ્થળેથી કુલ 426 નંગ ગ્લુ ટ્રેપ જપ્ત કર્યા છે. વહીવટીતંત્રના આદેશોનું પાલન કરાવવા માટે પોલીસ દ્વારા આ ઓપરેશન અત્યંત ત્વરિત રીતે પાર પાડવામાં આવ્યું હતું, જેનાથી સ્થાનિક વેપારીઓમાં ફફડાટ ફેલાયો છે.

25,200 ની કિંમતનો મુદ્દામાલ  જપ્ત

દરોડા દરમિયાન પોલીસે અંદાજે રૂ. 25,200ની કિંમતનો મુદ્દામાલ કબજે કર્યો છે. સરકારી જાહેરનામાનો અનાદર કરવા બદલ પોલીસે બંને વેપારીઓ વિરુદ્ધ BNS ની કલમ 223 હેઠળ ગુનો નોંધી આગળની તપાસ હાથ ધરી છે.

 ગ્લુ ટ્રેપ માત્ર ઉંદર જ નહીં, પણ અન્ય જીવો માટે પણ ઘાતક

 ગ્લુ ટ્રેપ માત્ર ઉંદર જ નહીં, પણ અન્ય નાના જીવો માટે પણ ઘાતક સાબિત થાય છે. જિલ્લા પોલીસ અને વહીવટીતંત્રની આ કામગીરીથી પર્યાવરણ પ્રેમીઓમાં સંતોષની લાગણી જોવા મળી છે. હવે આગામી દિવસોમાં અન્ય વિસ્તારોમાં પણ આવી તપાસ હાથ ધરવામાં આવશે તેવી શક્યતાઓ છે.

આ પણ વાંચોઃ Gandhinagar News: સોલાર પેનલના કામમાં લાંચ લેતા ક્લાસ-1 અધિકારી ઝડપાયા, AB ચૌધરીની કારમાંથી મળ્યા રુપિયા