King of Sarangpur ના મેળવાયા કોપીરાઈટ, તમામ સર્ટિફિકેટ હનુમાનજીના ચરણોમાં અર્પણ

દાદાના ચરણોમાં પ્રમાણપત્રો સમર્પિત

આ વિશેષ કાનૂની પ્રક્રિયા અંતર્ગત શ્રી કષ્ટભંજન દેવ હનુમાનજી મહારાજના વિવિધ દિવ્ય સ્વરૂપો, વિશિષ્ટ ચિત્રાત્મક અભિવ્યક્તિઓ, સર્જનાત્મક કૃતિઓ તથા ભક્તોમાં અત્યંત લોકપ્રિય બનેલી ઓળખરૂપ "કિંગ ઓફ સાળંગપુર" (King of Sarangpur) સહિતના વિવિધ કૉપીરાઇટ (Copyright), ટ્રેડમાર્ક (Trademark) અને અન્ય બૌદ્ધિક સંપત્તિ હકોની નોંધણીઓ સફળતાપૂર્વક મેળવી લેવામાં આવી છે.

આ કાનૂની સંરક્ષણ મેળવવાનો મુખ્ય હેતુ પવિત્ર ધામની આગવી ઓળખ, ગૌરવ અને આધ્યાત્મિક વારસાનું અનાધિકૃત ઉપયોગથી સંરક્ષણ કરવાનો છે. આ આધ્યાત્મિક અવસરે પ્રાપ્ત થયેલા તમામ કાયદેસરના પ્રમાણપત્રો આજે પૂર્ણ ભાવપૂર્વક હનુમાનજી મહારાજના પવિત્ર ચરણોમાં અર્પણ કરીને ધન્યતા અનુભવવામાં આવી હતી.

આધુનિક કાયદા દ્વારા ધાર્મિક ધરોહરનું રક્ષણ

આ જટિલ અને મહત્વપૂર્ણ કાનૂની પ્રક્રિયાને દેશની અગ્રણી લો ફર્મ ડી. એન. આહ્યા એન્ડ કંપની (D N AHYA & CO.) દ્વારા પૂર્ણ કરવામાં આવી હતી. આ સમગ્ર કાર્ય આઈ.પી. (IP) ક્ષેત્રના જાણીતા નિષ્ણાત દર્શિત આહ્યા (Darshit Ahya) ના કુશળ માર્ગદર્શન અને નેતૃત્વ હેઠળ સફળતાપૂર્વક સંપન્ન થયું હતું.

આ પ્રસંગે મંદિરના કોઠારી વિવેકસાગર સ્વામી (Kothari Shri Viveksagar Swami) એ જણાવ્યું હતું કે, ભારતની સમૃદ્ધ આધ્યાત્મિક, સાંસ્કૃતિક અને ધાર્મિક ધરોહરને આધુનિક બૌદ્ધિક સંપત્તિ કાયદાઓ દ્વારા સુરક્ષિત કરવી એ વર્તમાન સમયની મોટી આવશ્યકતા છે. શ્રી કષ્ટભંજન દેવ હનુમાનજી મહારાજના આશીર્વાદથી ભક્તિ, સેવા અને સંસ્કૃતિના આ દિવ્ય વારસાનું સંરક્ષણ અને સંવર્ધન આગામી વર્ષોમાં પણ આ જ રીતે સતત ચાલુ રહેશે.

આ પણ વાંચો: Salangpur : દાદાને શ્રી દ્વારકાધીશ સ્વરૂપનો કરાયો વિશેષ શણગાર, કેરી અને છપ્પન ભોગનો અન્નકૂટ ધરાવાતા ભકતોમાં ખુશીનો માહોલ