Morbi BJP News: બધે ટિકિટ માટે પડાપડી, પણ આ શહેરમાં ભાજપને ઉમેદવાર જ મળતા નથી! શું છે કારણ?

મોરબી જિલ્લા ભાજપ (Morbi BJP) માટે ચિંતાજનક સ્થિતિ

સૂત્રો અનુસાર, ભાજપ દ્વારા હાથ ધરાયેલી સેન્સ પ્રક્રિયા દરમિયાન માળીયા શહેરમાંથી એકપણ કાર્યકર અથવા નેતા દાવેદારી નોંધાવવા માટે આગળ આવ્યું નથી. આ પરિસ્થિતિ એ સ્પષ્ટ કરે છે કે શહેરમાં ભાજપનું સંગઠન માત્ર નામ પૂરતું જ સીમિત રહી ગયું છે. સ્થાનિક સ્તરે સંગઠનની નબળાઈ અને કાર્યકરોમાં ઉત્સાહનો અભાવ પાર્ટી માટે પડકારરૂપ બની રહ્યો છે.

કોંગ્રેસ (Congress) ના મજબૂત ગઢમાં ભાજપ (BJP) માટે કપરા ચઢાણ

માળીયા શહેર વર્ષોથી કોંગ્રેસનો મજબૂત ગઢ માનવામાં આવે છે. અહીં કોંગ્રેસની પકડ મજબૂત હોવાને કારણે ભાજપને હંમેશા જોરદાર ટક્કર આપવા મુશ્કેલી પડી છે. હાલની સ્થિતિ એ દર્શાવે છે કે ભાજપ હજુ સુધી માળીયામાં પોતાનું મજબૂત સ્થાન બનાવી શક્યું નથી. ગત ચૂંટણીમાં પણ કોંગ્રેસે અહીંની તમામ 24 બેઠકો પર કબજો કરી ક્લીન સ્વીપ કરી હતી.

જિલ્લા ભાજપ પ્રમુખ જયંતિ રાજકોટિયાનો દાવો

જોકે આ પરિસ્થિતિ વચ્ચે જિલ્લા ભાજપ પ્રમુખ જયંતિ રાજકોટિયાનો દાવો કર્યો છે કે, “ઉમેદવારો ચોક્કસ મેદાનમાં ઉતરશે અને પાર્ટી સજ્જ રીતે ચૂંટણી લડશે.” તેમના નિવેદનથી સ્પષ્ટ થાય છે કે પાર્ટી અંતિમ સમયે ઉમેદવારો જાહેર કરીને ચૂંટણીમાં ઝંપલાવવાની તૈયારીમાં છે.

હવે જોવાનું એ રહેશે કે ભાજપ માળીયા નગરપાલિકામાં કેવી રીતે પોતાનું અસ્તિત્વ જાળવી રાખે છે અને કોંગ્રેસના ગઢમાં કઈ રીતે પડકાર ઉભો કરે છે.

અહેવાલ: નિલેશ પટેલ

આ પણ વાંચો:  Vav Tharad News: પ્રેમની ભયાનક સજા! અમદાવાદથી પ્રેમી પંખીડાનું અપહરણ કર્યું અને પછી....