છેલ્લા બે વર્ષથી તેઓ શુદ્ધ પાણી માટે સંઘર્ષ
ગામમાં પીવાના પાણી માટે સંપ બનાવવામાં આવ્યો હોવા છતાં તેમાં દૂષિત પાણી ભળતું હોવાથી તેનો ઉપયોગ શક્ય બન્યો નથી. ગ્રામજનોના જણાવ્યા મુજબ છેલ્લા બે વર્ષથી તેઓ શુદ્ધ પાણી માટે સંઘર્ષ કરી રહ્યા છે. હાલ સ્થિતિ એવી છે કે ગામના લોકોને લગભગ બે કિલોમીટર દૂર આવેલા મહાદેવ મંદિરેથી પાણી લાવવું પડે છે.
મહિલાઓ અને વિદ્યાર્થીઓ પર સૌથી વધુ અસર
પાણી માટે દૂર જવાની ફરજ પડતાં મહિલાઓ, વૃદ્ધો અને બાળકોને ભારે હાલાકી વેઠવી પડે છે. ખાસ કરીને શાળા અને કોલેજમાં અભ્યાસ કરતાં વિદ્યાર્થીઓને પાણી લેવા જવું પડતું હોવાથી તેમના અભ્યાસ પર સીધી અસર પડી રહી છે. વિદ્યાર્થીઓને એસટી બસનો સમય સાચવવામાં મુશ્કેલી પડે છે અને અભ્યાસ કાર્ય પણ બગડી રહ્યું હોવાનું ગ્રામજનોએ જણાવ્યું છે.
માર્ગની ઊંચાઈ બન્યું મુશ્કેલીનું કારણ
ઇસરોડિયા ગામમાં બનાવાયેલા માર્ગની ઊંચાઈ વધારે હોવાથી વરસાદી પાણીનો જમાવડો થઈ રહ્યો છે. બસ સ્ટેન્ડ આગળ તેમજ ગામના મુખ્ય માર્ગ પર લાંબા સમય સુધી પાણી ભરાઈ રહેતાં વાહનચાલકો અને રાહદારીઓને ભારે મુશ્કેલી પડે છે. અકસ્માતનો ભય સતત રહે છે અને ગંદકીના કારણે મચ્છરોનો ઉપદ્રવ પણ વધી ગયો છે.
પ્રાથમિક શાળા સુધી પહોંચ્યું દૂષિત પાણી
ગટર લાઈનના અભાવે દૂષિત પાણીનો નિકાલ થઈ શકતો નથી. પરિણામે ગંદુ પાણી ગામની પ્રાથમિક શાળાના કમ્પાઉન્ડ સુધી પહોંચી ગયું છે. શાળા આસપાસ પાણી ભરાઈ રહેતાં બાળકોના આરોગ્ય અંગે ચિંતા ઉભી થઈ છે. ગ્રામજનોમાં રોગચાળો ફાટી નીકળવાની દહેશત પણ જોવા મળી રહી છે.
કૂવાના પાણીમાં ક્ષારનું પ્રમાણ વધુ
સ્થાનિકોના જણાવ્યા મુજબ ગામના કુવામાં ક્ષારનું પ્રમાણ વધારે હોવાથી તે પાણી રોજિંદા ઉપયોગ માટે યોગ્ય નથી. કેટલાક લોકો સ્નાન કરવાથી ચર્મરોગ જેવી સમસ્યાઓ થતી હોવાની ફરિયાદ પણ કરી રહ્યા છે. તેથી ગામમાં શુદ્ધ અને કાયમી પીવાના પાણીની વ્યવસ્થા કરવાની માંગ વધુ ઉગ્ર બની છે.
દબાણ દૂર કરવા પણ ઉઠી માગ
ગ્રામજનોએ પોતાના આવેદનપત્રમાં જણાવ્યું છે કે ગામમાં ગટર લાઈનનું કામ શક્ય બને તે માટે રસ્તા પર થયેલા ગેરકાયદેસર દબાણોનું સર્વે કરી કાયદેસરની કાર્યવાહી દ્વારા તેને દૂર કરવામાં આવે. સાથે જ વરસાદી પાણીના નિકાલ માટે યોગ્ય વ્યવસ્થા ઉભી કરવાની પણ માગ કરવામાં આવી છે.
અધિકારીઓએ સ્થળ તપાસની ખાતરી આપી
ઇસરોડિયા ગામના ગ્રામજનોની રજૂઆત અંગે નાયબ જિલ્લા વિકાસ અધિકારીએ જણાવ્યું છે કે ગામમાં પીવાના પાણી, વરસાદી પાણીના નિકાલ અને ગટર લાઈન સંબંધિત પ્રશ્નોની સ્થળ પર જઈ તપાસ કરવામાં આવશે. દબાણ અંગે સર્વે કરીને યોગ્ય કાર્યવાહી હાથ ધરવામાં આવશે અને ગ્રામજનોને પડતી મુશ્કેલીઓ દૂર કરવાનો પ્રયાસ કરવામાં આવશે.
આ પણ વાંચોઃ સોશિયલ મીડિયા સ્ટાર Kirti Patel ની ફરી ધરપકડ, જાણો હવે કયા કેસમાં થઈ કાર્યવાહી?
આ પણ વાંચોઃ Surendranagar Crime: તારંગા ધામમાંથી પૂજારી અને પત્નીના મૃતદેહ મળતાં ચકચાર, જાણો સમગ્ર મામલો
