Patan Rain: પાટણમાં બીજા દિવસે પણ વરસાદનો કહેર, સોસાયટીઓમાં પાણી ઘૂસ્યા, રેલવે ગરનાળાનો માર્ગ બંધ

રેલવે ગરનાળાનો માર્ગ બંધ, વેપારીઓ મુશ્કેલીમાં

ભારે વરસાદ બાદ પાટણના રેલવે ગરનાળામાં પાણી ભરાઈ જતા અવરજવરનો માર્ગ સંપૂર્ણપણે બંધ થઈ ગયો છે. જેના કારણે વેપારીઓને હાઈવે તરફ જવા માટેનો મહત્વનો રસ્તો પણ બંધ થઈ ગયો છે. સ્થાનિકોના જણાવ્યા અનુસાર દર વર્ષે સામાન્ય વરસાદમાં પણ આ જ સમસ્યા સર્જાય છે, છતાં કાયમી ઉકેલ લાવવામાં આવ્યો નથી. પરિણામે વેપારીઓ અને સ્થાનિક રહેવાસીઓને ભારે હાલાકીનો સામનો કરવો પડી રહ્યો છે.

સાતથી વધુ સોસાયટીઓમાં પાણી

માહી, દિયાના અને સોપાન સોસાયટી સહિત શહેરની સાત જેટલી સોસાયટીઓમાં વરસાદી પાણી ભરાઈ જતાં રહેવાસીઓ પરેશાન બન્યા છે. કેટલાક વિસ્તારોમાં પાણી ઘરોની અંદર સુધી ઘૂસી જતાં ઘરવખરીને પણ નુકસાન પહોંચ્યાની ફરિયાદો સામે આવી છે. પાણી નિકાલની કામગીરી અધૂરી રહેતા સ્થિતિ વધુ ગંભીર બની છે. બીજી તરફ શહેરના અનેક રસ્તાઓ પર મોટા ખાડા પડી જતાં વાહનચાલકો માટે અકસ્માતનો ભય પણ ઉભો થયો છે.

રાધનપુર, સાંતલપુર અને હારીજમાં પણ વરસાદની અસર

જિલ્લાના રાધનપુર અને સાંતલપુર પંથકમાં પણ સારો વરસાદ નોંધાયો છે. હારીજમાં સતત બીજા દિવસે વરસાદી માહોલ યથાવત રહેતા જલિયાણ, હસ્તિનાપુર અને ચામુંડા નગર સોસાયટીમાં પાણી ભરાઈ ગયા હતા. વરસાદી પાણી ઘરોમાં પ્રવેશતા સ્થાનિકોને ભારે મુશ્કેલીઓનો સામનો કરવો પડ્યો હતો. સ્થાનિકોએ પાલિકામાં અનેક રજૂઆતો કરી હોવા છતાં કોઈ અધિકારીઓ સ્થળ પર પહોંચ્યા ન હોવાનો આક્ષેપ કર્યો છે.

આ પણ વાંચોઃSabarkantha: ઈડરના ચિત્રોડીમાં ડીપ બ્રિજ પર મોટી દુર્ઘટના, બે બાઈક સવાર યુવકો તણાયા, એક ગુમ, એકનો બચાવ

આ પણ વાંચોઃ Navsari માં પૂર વચ્ચે મેગા રેસ્ક્યુ, ભાટ ગામેથી 30 થી વધુ લોકોને એર લિફ્ટ કરાયા