Operation Mule Hunt 2.0: તમારું બેંક ખાતું તો ભાડે નથી આપ્યું ને? રાધનપુરમાં 196 કરોડના સાયબર ફ્રોડનો પર્દાફાશ

શ્રમિકોને બનાવ્યા મોહરા

મળતી જાણકારી અનુસાર આ ફ્રોડ કરવા આરોપીઓએ અત્યંત ચાલાકીથી આર્થિક રીતે નબળા શ્રમિક વર્ગના લોકોના નામે બેંક ખાતાઓ (Bank Accounts) ખોલાવ્યા હતા. આરોપીઓ દર મહિને ₹10,000 ના કમિશનની લાલચ આપીને ભોળા શ્રમિકોને વિશ્વાસમાં લેતા હતા. આ ખાતાઓ ખોલાવ્યા બાદ, આરોપીઓ તેમની પાસેથી બેંકની ચેકબુક, પાસબુક, ડેબિટ કાર્ડ અને ખાતા સાથે જોડાયેલા રજિસ્ટર્ડ સિમકાર્ડ પોતાની પાસે જપ્ત કરી લેતા હતા. આ રીતે, શ્રમિકોને પોતાની જાણ બહાર જ એક મોટા ગુનાહિત સાધનના માધ્યમ બનાવી દેવામાં આવ્યા હતા.

ગેરકાયદેસર પ્રવૃત્તિઓનું નેટવર્ક

તપાસમાં સામે આવ્યું છે કે, આ ભાડે લીધેલા બેંક ખાતાઓનો ઉપયોગ ઓટીપી ફ્રોડ (OTP Fraud), ફિશિંગ લિંક્સ (Phishing Links), ઓનલાઈન જુગાર (Online Gambling), સટ્ટાબાજી (Betting) અને ગેરકાયદેસર નાણાકીય લેવડ-દેવડ (Money Laundering) માટે કરવામાં આવતો હતો. પોલીસની ઝીણવટભરી તપાસમાં આ ખાતાઓ મારફતે રૂ. 196.29 કરોડના શંકાસ્પદ વ્યવહારો થયાનું સ્પષ્ટ થયું છે. એટલું જ નહીં, આ બેંક એકાઉન્ટ્સનું કનેક્શન સમગ્ર દેશમાં નોંધાયેલી 38 ગંભીર સાયબર ફ્રોડની ફરિયાદો (Cyber Fraud Complaints) સાથે જોડાયેલું હોવાનું પણ ખુલ્યું છે.

પોલીસની કડક કાર્યવાહી

રાધનપુર પોલીસ સ્ટેશન ખાતે ભારતીય ન્યાય સંહિતા (BNS) અને આઈટી એક્ટ (IT Act) ની કલમો હેઠળ 3 શખ્સો સામે ગુનો દાખલ કરી વધુ કાર્યવાહી હાથ ધરી છે.  જેઓ આ સમગ્ર નેટવર્કનું સંચાલન કરતા હતા. પોલીસ દ્વારા આ ફ્રોડમાં સામેલ અન્ય શખ્સો અને નેટવર્કના મૂળ સુધી પહોંચવા માટે વધુ તપાસ હાથ ધરવામાં આવી છે.

આ પણ વાંચોઃ Operation Mule Hunt 2.0: સાયબર ફ્રોડ કરનારાઓ ચેતી જજો! આજથી રાજ્યમાં 'ઓપરેશન મ્યુલ હંટ 2.0' નો પ્રારંભ

આ પણ વાંચોઃ Bharuch News: ભરૂચ ડિસ્ટ્રિક્ટ બેંકમાં નકલી ખાતા કૌભાંડ, 40 નકલી એકાઉન્ટ ઝડપાયા