Porbandar: પ્રેમલગ્નનો ભયાનક અંત, પતિએ લગ્ન પ્રમાણપત્ર ન આપતાં 20 વર્ષીય યુવતીએ ગળેફાંસો ખાધો, ઘટના જાણી હચમચી જશો

મેરેજ સર્ટિફિકેટ ન આપતા ભર્યું આત્મઘાતી પગલું

ઘટનાની વિગત એવી છે કે, છાયાના સાંઢીયાવાડ વિસ્તારમાં રહેતા વેપારી અશોકભાઈ મોદીની પુત્રી અંજલી મોદી નર્સિંગનો અભ્યાસ (Nursing Studies) કરતી હતી. અંજલીએ પરિવારની જાણ બહાર છાયાના નવાપરા વિસ્તારમાં રહેતા ઋષિક ચૌહાણ નામના યુવાન સાથે પ્રેમલગ્ન કર્યા હતા. આ બંનેએ મહાનગરપાલિકામાં લગ્નની સત્તાવાર નોંધણી (Marriage Registration) પણ કરાવી હતી. પરંતુ, લગ્ન બાદ ઋષિક અંજલીને લગ્નનું પ્રમાણપત્ર (Marriage Certificate) આપતો ન હતો. અંજલીએ અનેક વખત પોતાના પતિ પાસે આ પ્રમાણપત્રની માંગણી કરી હતી અને વિનંતી કરી હતી.

હાથમાંથી લોહી નીકળતો વીડિયો પતિને મોકલ્યો હતો

અંજલી આ પ્રમાણપત્ર મેળવવા માટે એટલી હદે માનસિક તણાવમાં હતી કે તેણે પતિને ચેતવણી આપી હતી કે જો તે પ્રમાણપત્ર નહીં આપે તો તે જીવતી નહીં રહે. એટલું જ નહીં, તેણે પોતાના હાથમાંથી લોહી નીકળતો વીડિયો પણ પતિને મોકલીને પોતાની ગંભીરતા દર્શાવી હતી. છતાં પતિનું દિલ પીગળ્યું ન હતું. આખરે માનસિક ત્રાસથી કંટાળીને 23 જૂનના રોજ અંજલીએ પોતાના ઘરમાં પંખા સાથે ચૂંદડી વડે ગળેફાંસો ખાઈ આત્મહત્યા કરી લીધી હતી.

પોલીસે આત્મહત્યાની દુષ્પ્રેરણાનો ગુનો નોંધ્યો

શરૂઆતમાં આ મામલે અકસ્માત મોતનો ગુનો નોંધી તપાસ શરૂ કરવામાં આવી હતી. પરંતુ તપાસ દરમિયાન કમલાબાગ પોલીસને મરવા મજબૂર કરવાનો મામલો જણાયો હતો. મૃતકના પિતા અશોકભાઈ મોદીએ કમલાબાગ પોલીસ સ્ટેશનમાં (Kamlabag Police Station) ફરિયાદ નોંધાવી હતી. આ ફરિયાદના આધારે પોલીસે પતિ ઋષિક રાજેશભાઈ ચૌહાણ સામે આત્મહત્યાની દુષ્પ્રેરણાનો ગુનો નોંધી તેની ધરપકડ કરી લીધી હતી.

આરોપી પતિને કોર્ટે જેલહવાલે કર્યો

પ્રેમલગ્ન, લગ્નનું પ્રમાણપત્ર અને ત્યારબાદ થયેલી આત્મહત્યાની આ ઘટનાએ પોરબંદરમાં અનેક સવાલો ઊભા કર્યા છે. કમલાબાગ પોલીસે આરોપી પતિ ઋષિક ચૌહાણને કોર્ટમાં (Court) રજૂ કર્યો હતો, જ્યાંથી તેને જેલહવાલે (Jail) કરવાનો હુકમ કરાયો છે. હાલ પોલીસ આ કેસ સાથે જોડાયેલા તમામ પાસાઓની ઊંડાણપૂર્વક તપાસ કરી રહી છે.

આ પણ વાંચોઃ Porbandar: માછીમારો માટે મોટા સમાચાર, હવે ઊંડા દરિયામાં જવા આ પાસ થયો ફરજિયાત!