વધુ એક ભરતી ચર્ચામાં,રાજકોટ મનપામાં જુનિયર ક્લાર્કની ભરતીમાં છબરડો

ભરતી અને વિવાદ એકબીજાના પર્યાય થઈ ગયા હોય તેવી સ્થિતિનું નિર્માણ થયું છે. હેડકલાર્કની પરીક્ષામાં પેપરલીકની  ઊર્જા વિભાગમાં ભરતી કૌભાંડ બાદ હવે વધુ એક ભરતી વિવાદોમાં આવી છે. રાજકોટ મહાનગરપાલિકામાં 127 જુનિયર ક્લાર્કની ભરતીમાં નાપાસ થયેલા ઉમેદવારોને હાજર થવાના ઓર્ડર અપાતા વિવાદ ઉભો થયો છે. 127 જુનિયર ક્લાર્કની ભરતીમાં ગેરરીતિ થવાના ઉમેદવારોએ આક્ષેપ કર્યા છે. CPTની પરીક્ષામાં નાપાસ થયેલા 27 પરીક્ષાર્થીઓને હાજર થવાના ઓર્ડર અપાતા અન્ય વિદ્યાર્થિઓમાં રોષ ફાટી નિકળ્યો છે. સોશિયલ મીડિયાના માધ્યમ થકી ઉમેદવારોએ પોતાની નારાજગી વ્યક્ત કરી હતી. ત્યારે પરીક્ષાર્થીઓના ભારે વિરોધ બાદ મનપા તંત્ર સફાળુ જાગ્યું હતું. રાજકોટ મનપાની જુનિયર ક્લાર્કની પરીક્ષામાં 27 લોકોને નિયમો વિરુદ્ધ શરતી નિમણૂંક અપાઈ છે. અને 122 વિદ્યાર્થીઓએ CPT ની પરીક્ષા પાસ કરી છે કે કેમ તેનો કોઈ ઉલ્લેખ થયો નથી. આ મુદ્દે મેયર ડો.પ્રદિપ ડવે બચાવ કરતા કહ્યું કે,CPTની પરીક્ષા માટે હાજર થનાર ઉમેદવારોને છ મહિનાનો સમય આપવામાં આવ્યો હતો.

અમિત અરોરા, મ્યુનિ.કમિશનર,રાજકોટ 

27 ઉમેદવારે CPT ની પરીક્ષા નથી આપી અથવા નાપાસ છે, છતાં તેમને નોકરી આપવામાં આવી છે. CPT નાપાસ ઉમેદવારને શરતી નિમણૂક અપાતા વિવાદ ઉઠ્યો હતો. ત્યારે સમગ્ર મામલાને રાજકોટ મહાનગરપાલિકા ઠંડો પાડવાનો પ્રયાસ કરી રહી હતી. ભારે વિવાદ બાદ રાજકોટ મનપાએ ફાઈનલ ઓર્ડરની યાદીમાં સુધારો કર્યો. જેમાં મુખ્ય પરીક્ષા અને CPTની પરીક્ષામાં પાસ હોય તેવા જ અરજદારોનો યાદીમાં સમાવેશ કરવામાં આવ્યો છે. કેટલાક અરજદારોએ મેયર અને કમિશનરને મળીને રજૂઆત કરી હતી. ઉમેદવારોના વિરોધ બાદ મેયર પ્રદિપ ડવે તાત્કાલિક રિઝલ્ટમાં સુધારો કરવાની સૂચના આપી હતી. બાદમાં સુધારવામાં આવેલું રિઝલ્ટ મુક્યું હતું જેમાં CPTના માર્ક્સ ગણવામાં આવ્યા છે.