Edible Oil Price Hike: સાતમ-આઠમ પહેલા જનતાને મોંઘવારીનો ડામ, સિંગતેલ અને કપાસિયા તેલના ભાવમાં મોટો ભડકો

સિંગતેલ અને કપાસિયા તેલના ભાવમાં ધરખમ વધારો

ખાદ્યતેલ બજારમાં (Oil Market) સિંગતેલના 15 કિલોના ડબ્બામાં સીધો 50 રૂપિયાનો વધારો ઝીંકાયો છે. આ વધારા સાથે સિંગતેલના નવા ભાવ 2820 રૂપિયાની સપાટીએ પહોંચી ગયા છે. માત્ર સિંગતેલ જ નહીં, પરંતુ મધ્યમ વર્ગના પરિવારોમાં સૌથી વધુ વપરાતા કપાસિયા તેલના (Cottonseed Oil) ભાવમાં પણ 30 રૂપિયાનો તોતિંગ વધારો થયો છે, જેને કારણે કપાસિયા તેલનો ડબ્બો હવે 2670 રૂપિયા થઈ ગયો છે. તહેવારોના દિવસોમાં જ જીવનજરૂરી તેલના ભાવ વધતા ગ્રાહકોમાં ભારે નારાજગી જોવા મળી રહી છે.

અન્ય તેલો પણ મોંઘા થયા અને નાફેડ પાસે આશા

બજારમાં માત્ર સિંગતેલ કે કપાસિયા જ નહીં, પરંતુ પામોલીન તેલ (Palm Oil), સૂર્યમુખી તેલ (Sunflower Oil) અને મકાઈના તેલના (Corn Oil) ભાવમાં પણ નોંધપાત્ર વધારો જોવા મળ્યો છે. વેપારીઓનું માનવું છે કે જો સરકાર હસ્તકની સંસ્થા નાફેડ (NAFED ) દ્વારા પોતાના ગોડાઉનોમાંથી મગફળીનો અનામત જથ્થો ખુલ્લા બજારમાં વેચવા માટે મૂકવામાં આવે, તો જ સિંગતેલના ભાવ નિયંત્રણમાં આવી શકે છે અને સ્થિર થઈ શકે છે. જો આગામી દિવસોમાં નાફેડ દ્વારા કોઈ સત્તાવાર પગલાં લેવામાં નહીં આવે, તો તહેવારો દરમિયાન ભાવ હજુ વધુ ભડકે બળે તેવી આશંકા સેવાઈ રહી છે.

આ પણ વાંચો: Gold Rate Today : સોના-ચાંદીના ભાવમાં 3 દિવસથી કડાકો, જાણો અમદાવાદ, સુરતમાં શું છે ભાવ