Jasdan Patari GI Tag: ગુજરાતના હસ્તકલા ક્ષેત્રે એક નવા અધ્યાયનો પ્રારંભ થયો છે. રાજકોટ જિલ્લાના જસદણની સદીઓ જૂની અને અત્યંત લોકપ્રિય ‘જસદણ પટારી’(પરંપરાગત સુશોભિત પેટી) હસ્તકલાને આંતરરાષ્ટ્રીય રક્ષણ મળ્યું છે. ભારત સરકારે સોમવારે જાહેરાત કરી કે જસદણ પટારીની પરંપરાગત હસ્તકલાને 2025-26 માટે GI રજિસ્ટ્રી દ્વારા ભૌગોલિક સંકેત (GI) નોંધણી માટે મંજૂરી આપવામાં આવી છે.
‘જસદણ પટારી’ હસ્તકલાને મળ્યું આંતરરાષ્ટ્રીય રક્ષણ
આ માન્યતા મળવાથી જસદણની આ પરંપરાગત પેટી/પટારા બનાવવાની કળાને હવે રાષ્ટ્રીય અને આંતરરાષ્ટ્રીય સ્તરે કાયદાકીય સુરક્ષા મળી ગઈ છે. આ ગૌરવપૂર્ણ સિદ્ધિ પાછળ નાબાર્ડ (NABARD) ની મહત્વની ભૂમિકા રહી છે. નાબાર્ડની 'ગ્રામ્ય વિકાસ નિધિ' યોજના અંતર્ગત આ કલાને જીઆઈ ટેગ અપાવવા માટે જરૂરી આર્થિક અને વહીવટી સહયોગ પૂરો પાડવામાં આવ્યો હતો. આ પ્રક્રિયામાં સેન્ટર ફોર એન્વાયરમેન્ટ એજ્યુકેશન (CEE) દ્વારા કારીગરોને માર્ગદર્શન આપીને કલાનું ઐતિહાસિક દસ્તાવેજીકરણ પૂર્ણ કરવામાં આવ્યું હતું.
GI ટેગ મળવાથી શું થશે ફાયદો?
નિષ્ણાતોના મતે, GI ટેગ મળવાથી હવે જસદણની પટારીનું બ્રાન્ડિંગ મજબૂત થશે. બજારમાં નકલી માલના વેચાણ પર રોક લાગશે અને મૂળ કારીગરોને તેમના ઉત્પાદનનો યોગ્ય ભાવ મળી રહેશે. આ નિર્ણયથી માત્ર કારીગરોની આજીવિકા જ નહીં સુધરે, પરંતુ નવી પેઢી પણ આ વારસા તરફ આકર્ષાશે. ઉલ્લેખનીય છે કે, અગાઉ પણ નાબાર્ડે કચ્છની અજરખ પ્રિન્ટ અને નવસારીના ચીકુને જીઆઈ ટેગ અપાવવામાં સફળતા મેળવી છે. આ ટેગ મળવાથી જસદણની પટારી હવે વિશ્વભરમાં પોતાની આગવી ઓળખ સાથે વેચાશે.
આ પણ વાંચો: Yusuf Pathan land dispute: યુસુફ પઠાણને જમીન વિવાદમાં રાહત, હાઈકોર્ટે પુરાવા રજૂ કરવા 4 સપ્તાહનો આપ્યો સમય
