Rajkot Accident News: ગોંડલ-કોટડા સાંગાણી રોડ પર આજે એક ગમખ્વાર અકસ્માત સર્જાતા બે નિર્દોષ કિશોરોએ પોતાના જીવ ગુમાવ્યા છે. કાર અને એક્ટિવા વચ્ચે થયેલી આ ભયાનક ટક્કરમાં સગા મામા-ફોઈના બે ભાઈઓના ઘટનાસ્થળે જ કમકમાટીભર્યા મોત નિપજતા સમગ્ર પંથકમાં શોકનું મોજું ફરી વળ્યું છે.
ગોંડલ-કોટડા સાંગાણી રોડ પર ગમખ્વાર અકસ્માતમાં બેના મોત
મળતી માહિતી મુજબ, મૃતક કિશોરોમાં કોટડા સાંગાણીનો 15 વર્ષીય દર્શીત રાજેશભાઈ ચૌહાણ અને ગોંડલના સહજાનંદ નગરમાં રહેતો ૧૨ વર્ષીય હેમેન્દ્ર ઇન્દ્રજીતભાઈ પરમારનો સમાવેશ થાય છે. દર્શીત ગોંડલ ખાતે કમ્પ્યુટર ક્લાસ પૂર્ણ કરીને પોતાના મામાના ઘરે ગયો હતો. ત્યાંથી તે તેના 12 વર્ષીય ભાઈ હેમેન્દ્ર સાથે એક્ટિવા પર પરત કોટડા સાંગાણી જવા નીકળ્યો હતો. દરમિયાન, ગોંડલ-કોટડા સાંગાણી રોડ પર સામેથી આવતી કારે તેમના એક્ટિવાને ધડાકાભેર ટક્કર મારી હતી. આ અકસ્માત એટલો ભયાનક હતો કે બંને કિશોરોના ઘટનાસ્થળે જ મોત નીપજ્યા હતા.
એકનો એક દીકરો ગુમાવતા પરિવારમાં આક્રંદ
આ અકસ્માતમાં મોતને ભેટેલા 12વર્ષીય હેમેન્દ્ર પરમાર પરિવારનો એકનો એક પુત્ર હતો, જ્યારે 15 વર્ષીય દર્શીત ચૌહાણ બે ભાઈઓમાં મોટો હતો. આ બે વહાલસોયા દીકરાઓના અકાળે મોતથી બંને પરિવારોમાં આક્રંદ છવાઈ ગયો છે. અકસ્માતની જાણ થતાં જ 108 એમ્બ્યુલન્સની ટીમ અને ગોંડલ ડિવિઝનના DYSP કે.જી. ઝાલા સહિતનો પોલીસ કાફલો તાત્કાલિક ઘટનાસ્થળે દોડી આવ્યો હતો. પોલીસે ટ્રાફિક વ્યવસ્થા પૂર્વવત કરાવી બંને કિશોરોના મૃતદેહોને પોસ્ટમોર્ટમ માટે હોસ્પિટલ ખસેડી આગળની કાર્યવાહી હાથ ધરી છે.
આ પણ વાંચો: Ahmedabad News: સાણંદના પ્રસિદ્ધ ઊમિયા માતા મંદિરમાં તસ્કરોનો હાથફેરો, 3.5 કિલો ચાંદીની મૂર્તિ અને છત્રની ચોરી
