ACP Rajkot: જુગાર રેડમાં આરોપીને મદદ કરવી ભારે પડી! ગૃહ વિભાગે ACP ને કર્યા ઘરભેગા!

Gujarat police officer suspended: ગુજરાત રાજ્યના ગૃહ વિભાગ (Home Department) દ્વારા પોલીસ વિભાગમાં શિસ્ત અને પ્રમાણિકતા જાળવી રાખવા માટે એક મોટો અને કડક નિર્ણય લેવામાં આવ્યો છે. રાજકોટ (Rajkot) માં આસિસ્ટન્ટ કમિશનર ઓફ પોલીસ એટલે કે એસીપી (ACP) તરીકે ફરજ બજાવતા વી.જી. પટેલ (V.G. Patel) ને તેમની ગંભીર બેદરકારી અને ગેરરીતિ બદલ તાત્કાલિક અસરથી ફરજ પરથી ડિસમિસ (Dismiss) એટલે કે ઘરભેગા કરી દેવામાં આવ્યા છે. ગૃહ વિભાગના આ આકરા પગલાંથી સમગ્ર પોલીસ બેડામાં ભારે ખળભળાટ મચી ગયો છે.

વડોદરાના જુગાર કેસમાં આરોપીને મદદ કરવાનો આરોપ

મળતી માહિતી મુજબ, આ સમગ્ર મામલો વડોદરા (Vadodara) શહેર સાથે જોડાયેલો છે. વડોદરામાં પોલીસ વિભાગ દ્વારા પાડવામાં આવેલી એક જુગાર રેડ (Gambling Raid) દરમિયાન એસીપી વી.જી. પટેલે કાયદાની રક્ષા કરવાના બદલે સામે પક્ષે રહીને મુખ્ય આરોપીને કાયદાકીય પકડમાંથી બચવા માટે મદદગીરી કરી હોવાના ગંભીર આક્ષેપો ઉઠ્યા હતા. આ મામલે થયેલી પ્રાથમિક તપાસમાં તેમની સંડોવણી અને શિસ્તભંગના સચોટ પુરાવા મળ્યા બાદ સરકાર દ્વારા આ આકરો નિર્ણય લેવામાં આવ્યો છે.

શિસ્તભંગ મુદ્દે સરકારનું ઝીરો ટોલરન્સ વલણ

ગુજરાત સરકાર (Government of Gujarat) અને પોલીસ વિભાગ (Police Department) દ્વારા છેલ્લા કેટલાક સમયથી નૈતિકતા અને શિસ્તભંગના મુદ્દે અત્યંત કડક વલણ અપનાવવામાં આવી રહ્યું છે. જનતાની સુરક્ષા અને કાયદો-વ્યવસ્થા જાળવવાની જેમના શિરે જવાબદારી છે, તેવા ઉચ્ચ અધિકારીઓ જ જ્યારે આવી ગેરકાયદેસર પ્રવૃત્તિઓમાં સામેલ થાય ત્યારે વિભાગની છબી ખરડાય છે. વી.જી. પટેલ સામેની આ કાર્યવાહી એ સાબિત કરે છે કે ગમે તેટલા મોટા હોદ્દા પર બેઠેલા અધિકારીની આવી લાલિયાવાડી સાંખી લેવામાં નહીં આવે.

પોલીસ તંત્રમાં ફફડાટનો માહોલ

એક ઉચ્ચ કક્ષાના ક્લાસ-1 અધિકારીને સીધા નોકરીમાંથી બરતરફ કરી દેવાની રાજ્ય સરકારની આ સપાટાબંધીથી અન્ય ભ્રષ્ટ કે બેદરકાર અધિકારીઓમાં ફફડાટ વ્યાપી ગયો છે. આ કડક એક્શન બાદ હવે પોલીસ તંત્રમાં એક સ્પષ્ટ સંદેશો ગયો છે કે ફરજમાં કોઈપણ પ્રકારની આળસ, બેદરકારી કે ગુનેગારો સાથેની મિલીભગત ચલાવી લેવામાં આવશે નહીં.

આ પણ વાંચો: Gujarat Police માટે નવા કડક નિયમો: હવે આરોપીઓને જાહેરમાં ઉઠક-બેઠક કરાવી તો ખેર નથી