Rajkot Double Murder: રાજકોટ શહેરના ગોપાલ ચોક વિસ્તારમાં 20 જુલાઈની મધરાતે 9 કરોડ રૂપિયાની વિવાદિત જમીનના નાણાકીય વિવાદ અને લેતી-દેતીના મામલે થયેલા બે સગા ભાઈઓની હત્યાના ચકચારી કેસમાં યુનિવર્સિટી પોલીસે વધુ એક મોટી સફળતા મેળવી છે. આ ડબલ મર્ડર પ્રકરણે હત્યાના પ્રયાસની ફરિયાદ નોંધાઈ હતી, જેમાં સંડોવાયેલો અને ઘટના બાદથી છેલ્લા આઠ દિવસથી ફરાર શિવા ડોંડા નામના આરોપીને પોલીસે દબોચી લીધો છે.
Rajkot ગોપાલ ચોક હત્યાકાંડ મામલે પોલીસના સકંજામાં વધુ એક આરોપી
પોલીસ સૂત્રો પાસેથી પ્રાપ્ત વિગતો અનુસાર, 28 જુલાઈએ આરોપી શિવા ડોંડા પોતાના ઘર પાસે આવવાનો હોવાની ચોક્કસ બાતમી યુનિવર્સિટી પોલીસ મથકના સ્ટાફને મળી હતી. આ બાતમીના આધારે પોલીસે ત્વરિત કાર્યવાહી કરી વોચ ગોઠવીને શિવા ડોંડાની ધરપકડ કરી લીધી હતી. પોલીસ હવે આરોપીને કોર્ટમાં રજૂ કરી તેના રિમાન્ડ મેળવવાની તજવીજ હાથ ધરી રહી છે. રિમાન્ડ દરમિયાન આરોપી આઠ દિવસ દરમિયાન ક્યાં-ક્યાં છુપાયો હતો, તેને કોણે આશરો આપ્યો હતો અને આ સમગ્ર ઘાતક હુમલામાં તેની ચોક્કસ ભૂમિકા શું હતી તે અંગે સઘન પૂછપરછ કરવામાં આવશે.
મૃતકોનો ભાણેજ જ નીકળ્યો આરોપી
પોલીસ તપાસમાં એવા ચોંકાવનારા તથ્યો બહાર આવ્યા છે કે પકડાયેલો આરોપી શિવા ડોંડા ડબલ મર્ડરની આ ઘટનામાં મૃતક સગા ભાઈઓનો ભાણેજ થાય છે. એટલું જ નહીં, આ કેસમાં અગાઉ હથિયાર સાથે ઝડપાયેલા આરોપી લાખાનો પણ તે ફઈનો દીકરો ભાઈ થાય છે. આ કૌટુંબિક સંબંધો અને પૈસાની ભાગબટાઈમાં થયેલા લોહિયાળ સંઘર્ષની કડીઓ જોડવા માટે પોલીસે તપાસનો વ્યાપ વધાર્યો છે.
શું હતો સમગ્ર મામલો?
ઉલ્લેખનીય છે કે, પૈસાની લેતી-દેતી અને ભાગબટાઈ બાબતે મુખ્ય આરોપી હાર્દિક ધોળકિયાએ પોતાના કૌટુંબિક કાકાઓ સુરેશ અને રાજેશની નિર્દયતાપૂર્વક હત્યા કરી નાખી હતી. આ ઝઘડા અને મારામારીની સમગ્ર ઘટનામાં આરોપી હાર્દિક ધોળકિયા પોતે પણ ઇજાગ્રસ્ત થયો હતો. બાદમાં હાર્દિક દ્વારા જ સામી હત્યાના પ્રયાસની ફરિયાદ નોંધાવવામાં આવી હતી. આ કેસમાં અગાઉ આરોપીઓની ધરપકડ બાદ હવે શિવા ડોંડાની પોલીસ ધરપકડથી આ હત્યાકાંડના અન્ય વણઉકેલાયેલા રહસ્યો અને મહત્ત્વના તથ્યો બહાર આવે તેવી પૂરી શક્યતા છે.
આ પણ વાંચો: 2030 Commonwealth Games ની યજમાની માટે Gujarat તૈયાર, Glasgow પહોંચ્યા DyCM Harshbhai Sanghavi
