Rajkot: પુત્ર યુવતીને ભગાડી જતાં માતાનું અપહરણ, પોલીસે 3 મહિલા સહિત 6 આરોપીને પકડ્યા

Rajkot: પ્રેમ પ્રકરણની અદાવત

ઘટનાની વિગતો મુજબ જેતપુર (Jetpur) ના બોખલા દરવાજા (Bokhla Darwaja) વિસ્તારમાં રહેતા હનીફભાઈ ગફારભાઈ ગરાણાનો પુત્ર અબ્દુલ કાદિર ઉર્ફે અબુ મેંદરડાની મુસ્કાન રફાઈ સાથે પ્રેમ સંબંધમાં હતો. આ બંને પ્રેમીપંખીડા ઘરેથી ક્યાંક ભાગી ગયા હતા, જેની દાઝ રાખીને યુવતીના પરિવારે હનીફભાઈના ઘરે જઈ ધમકીઓ આપી હતી.

જાહેરમાં મારકૂટ

આરોપીઓએ પહેલા હનીફભાઈના ઘરે જઈ 'જો અમારી દીકરી નહીં મળે તો તારા દીકરાને મારી નાખીશું' તેવી ધમકી આપી હતી. ત્યારબાદ, હનીફભાઈના પત્ની મુમતાઝબેન જ્યારે વોરા સમાજની વાડીએ રસોઈના કામ માટે ગયા હતા, ત્યારે આરોપીઓએ ત્યાં પહોંચી તેમની સાથે બોલાચાલી કરી હતી. જાહેરમાં લાફા મારી, બળજબરીથી વાહનમાં બેસાડી તેમનું અપહરણ કરી લેવામાં આવતા સમગ્ર પંથકમાં ચકચાર મચી ગઈ હતી.

પોલીસને મળી સફળતા

અપહરણની ગંભીરતાને જોતા રાજકોટ રેન્જ આઈજી નિર્લિપ્ત રાય અને એસપી વિજયસિંહ ગુર્જરની સૂચનાથી જેતપુર, રાજકોટ અને જૂનાગઢ એલસીબી (LCB) ની ટીમો કામે લાગી હતી. ટેકનિકલ સર્વેલન્સ અને હ્યુમન ઇન્ટેલિજન્સની મદદથી પોલીસે જૂનાગઢ (Junagadh) પાસેથી ફિલ્મી ઢબે નાકાબંધી કરી અપહૃત મુમતાઝબેન (Mumtazben) ને હેમખેમ મુક્ત કરાવ્યા હતા.

ઝડપાયેલા આરોપીઓ અને મુદ્દામાલ

પોલીસે આ ગુનામાં સામેલ 3 મહિલાઓ સહિત કુલ 6 આરોપીઓની ધરપકડ કરી છે.

અરબાઝ નાસીરભાઈ રફાઈ - મેંદરડા
સોનાબેન નાસીરભાઈ રફાઈ - મેંદરડા
નાઝીમ નાસીરભાઈ રફાઈ - મેંદરડા
રૂકસાર મુસ્તાકભાઈ ઈબ્રાહીમ - મેંદરડા
હીનાબેન જાહિદભાઈ ચૌહાણ- માળિયા હાટીના
સમીર ઉર્ફે બાદશાહ ઈસુભાઈ સીરમાન- જેતપુર

પોલીસે આરોપીઓ પાસેથી 4 મોબાઈલ અને 2 બાઈક સહિત કુલ 80 હજારનો મુદ્દામાલ કબજે કરી કાયદેસરની કાર્યવાહી હાથ ધરી છે.

અહેવાલ: હરેશ ભાલિયા

આ પણ વાંચોઃ Gandhinagar: બિલ્ડર પુત્ર આત્મહત્યા કેસમાં ફરાર કલ્પેશ તલાટી પોલીસ સમક્ષ હાજર, જાણો મામલો