Rajkot Civil Hospital માં ઉંદરોનો આતંક, હંતા વાયરસના ખતરા વચ્ચે ગંભીર બેદરકારી
- Rajkot Civil Hospital માં ઉંદરોના ત્રાસ
- ગુજરાત ફર્સ્ટના રિયાલિટી ચેકમાં ખુલી પોલ
- OPD વોર્ડમાં ઉંદરોના ફફડાટથી દર્દીઓ પરેશાન
- ઉંદરો દર્દીઓનું જમવાનું ખાઈ જતા હોવાની ફરિયાદ
- અહેવાલ બાદ સિવિલ તંત્ર આવ્યું એક્શન મોડમાં
Rajkot Civil Hospital: રાજકોટ (Rajkot) ની પી.ડી.યુ. સિવિલ હોસ્પિટલ ફરી એકવાર વિવાદોના વમળમાં ફસાઈ છે. હંમેશા કોઈને કોઈ કારણોસર ચર્ચામાં રહેતી આ હોસ્પિટલમાં હવે ઉંદરોનો ત્રાસ (Rat Menace) એટલી હદે વધી ગયો છે કે દર્દીઓના સ્વાસ્થ્ય સામે ગંભીર ખતરો ઊભો થયો છે. ગુજરાત ફર્સ્ટ (Gujarat first) દ્વારા કરવામાં આવેલા રિયાલિટી ચેક (Reality Check) માં હોસ્પિટલના ઓપીડી (OPD) વોર્ડમાં ઉંદરોનો ત્રાસ કેમેરામાં કેદ થયો છે, જે તંત્રની સફાઈ પાછળના લાખોના ખર્ચ સામે સવાલ ઊભા કરે છે.
Rajkot Civil Hospital માં ઉંદરોનું સામ્રાજ્ય
વર્તમાન સમયમાં જ્યારે હંતા વાયરસ (Hantavirus) નો કહેર વધી રહ્યો છે, ત્યારે હોસ્પિટલ જેવી સંવેદનશીલ જગ્યાએ ઉંદરોનું હોવું અત્યંત જોખમી સાબિત થઈ શકે છે. હંતા વાયરસ મુખ્યત્વે ઉંદરો દ્વારા ફેલાય છે, અને હોસ્પિટલમાં દાખલ નબળી રોગપ્રતિકારક શક્તિ ધરાવતા દર્દીઓ માટે આ જીવલેણ બની શકે છે. આવી ભયાનક સ્થિતિ વચ્ચે પણ સિવિલના સત્તાધીશો આ બાબતને સામાન્ય ગણી રહ્યા હોય તેવું જણાય છે.
દર્દીઓની વ્યથા: જમવાનું પણ સુરક્ષિત નથી
ઓપીડી વોર્ડમાં સારવાર લઈ રહેલા દર્દીઓ અને તેમના સબંધીઓએ ભારે રોષ સાથે ફરિયાદ કરી છે કે ઉંદરોનો ત્રાસ એટલો છે કે જો જમવાની વસ્તુ પર ધ્યાન ન રાખવામાં આવે તો ઉંદરો તેને ખાઈ જાય છે. ગંદકીના સામ્રાજ્ય (Empire of Filth) વચ્ચે દર્દીઓ કઈ રીતે સાજા થશે તે એક મોટો પ્રશ્ન છે. અગાઉ આ હોસ્પિટલમાં રખડતા શ્વાન (Stray Dogs) ના વીડિયો વાયરલ થયા હતા અને હવે ઉંદરોના વીડિયોએ તંત્રની પોલ ખોલી નાખી છે.
અહેવાલ બાદ સિવિલ તંત્ર એક્શન મોડમાં
ગુજરાત ફર્સ્ટ દ્વારા આ ગંભીર મુદ્દાને ઉઠાવ્યા બાદ હોસ્પિટલ વહીવટી તંત્ર જાગ્યું છે. એક્શન મોડ (Action Mode) માં આવેલા તંત્રએ તાત્કાલિક અસરથી વોર્ડમાં ઉંદર પકડવા માટે પીંજરું (Rat Trap) મૂકવાની કામગીરી શરૂ કરી છે. જોકે, સ્થાનિક લોકોમાં એ ચર્ચા છે કે શું તંત્ર હંમેશા કોઈ મોટો અહેવાલ કે વીડિયો વાયરલ થાય તે પછી જ જાગશે? સફાઈના ટેન્ડર પાસ થવા છતાં ગ્રાઉન્ડ લેવલ પર પરિણામ શૂન્ય કેમ છે તે તપાસનો વિષય છે.
સત્તાધીશો સામે વેધક સવાલો
હોસ્પિટલની આ ગંભીર લાપરવાહી (Gross Negligence) સામે જનતામાં ભારે રોષ જોવા મળી રહ્યો છે. લોકો પૂછી રહ્યા છે કે શું ગરીબ દર્દીઓના જીવની કોઈ કિંમત નથી? લાખો રૂપિયાના સફાઈ ખર્ચ પછી પણ જો હોસ્પિટલ ઉંદરોનું ઘર બની જતી હોય, તો તે જવાબદારી કોની?
આ પણ વાંચો: Junagadh news: ઘરમાં વૃદ્ધા એકલા હતા ને હત્યારાઓએ ખેલ્યો મોતનો ખેલ, કોણ છે હત્યારા?