Man ki Baat : મુંબઇ એટેકથી લઇ લગ્નની ખરીદી સુધીની વાત કરી PM MODI એ...!

વડાપ્રધાન નરેન્દ્ર મોદીએ રવિવારે 26 નવેમ્બરે દેશવાસીઓ સાથે 'મન કી બાત' કરી હતી. તેમણે 107મી વખત રેડિયો દ્વારા દેશવાસીઓને સંબોધિત કર્યા. મન કી બાત કાર્યક્રમમાં પીએમ મોદીએ સૌપ્રથમ 2008ના મુંબઈ આતંકી હુમલાની 15મી વરસી પર મૃત્યુ પામેલા લોકોને શ્રદ્ધાંજલિ આપી હતી. પીએમ મોદીએ કહ્યું કે આજે પણ દેશવાસીઓ આ આતંકવાદી હુમલાને ભૂલી શક્યા નથી. મન કી બાતમાં પીએમએ દેશવાસીઓને લગ્નની ખરીદી અંગે પણ અપીલ કરી હતી.

આપણે એ દુ:ખ ભૂલી શક્યા નથી

PM મોદીએ મન કી બાત કાર્યક્રમમાં કહ્યું કે 15 વર્ષ પહેલા આ દિવસે આપણા લોકોએ મુંબઈમાં આતંકવાદી હુમલો સહન કર્યો હતો. આજે પણ આપણે એ દુ:ખ ભૂલી શક્યા નથી.

26મી નવેમ્બર બીજી ઘટનાની પણ સાક્ષી

પીએમ મોદીએ પોતાના સંબોધનમાં વધુમાં કહ્યું કે આજનો દિવસ બીજી ઘટનાનો પણ સાક્ષી છે. આજે દેશની બંધારણ સભામાં બંધારણ મૂકવામાં આવ્યું હતું. બંધારણને બનાવવામાં 2 વર્ષ, 11 મહિના અને 18 દિવસનો સમય લાગ્યો હતો. તે 60 થી વધુ દેશોના બંધારણ વાંચ્યા પછી બનાવવામાં આવ્યું હતું. ભીમરાવ આંબેડકરજીએ આ કાર્યમાં મહત્વપૂર્ણ યોગદાન આપ્યું હતું.

અત્યાર સુધીમાં 106 સુધારા

પીએમ મોદીએ વધુમાં કહ્યું કે, દેશના બંધારણે ભારતને આગળ લઈ જવા માટે એક મહત્વપૂર્ણ કડીનું કામ કર્યું છે. જોકે, સમય જતાં બંધારણમાં પણ સુધારો કરવામાં આવ્યો હતો. બંધારણમાં અત્યાર સુધીમાં 106 જેટલા સુધારા કરવામાં આવ્યા છે. પીએમ મોદીએ આમાં 44મા સુધારાનો પણ ઉલ્લેખ કર્યો હતો. કહ્યું કે આ તે સમય છે જ્યારે દેશમાં ઈમરજન્સીની ભૂલ સુધારવામાં આવી હતી.

લગ્નની ખરીદીમાં સ્થાનિક પર ધ્યાન આપો

વડાપ્રધાન નરેન્દ્ર મોદીએ 'સ્વચ્છ ભારત અભિયાન' અને 'વોકલ ફોર લોકલ' અભિયાનની પ્રશંસા કરી હતી. તેમણે કહ્યું, “સ્થાનિક ઉત્પાદનોનો ઉપયોગ કરવાની આ ઈચ્છા માત્ર તહેવારો સુધી મર્યાદિત ન હોવી જોઈએ. હું તમને વિનંતી કરું છું કે લગ્નની ખરીદીમાં પણ સ્થાનિક ઉત્પાદનોને મહત્વ આપો કારણ કે લગ્નની સિઝન આવવાની છે. પીએમ મોદીએ લોકોને તમામ પેમેન્ટ માટે UPIનો ઉપયોગ કરવાનું ચાલુ રાખવા જણાવ્યું હતું. તેમણે કહ્યું કે "છેલ્લા મહિનાઓમાં UPI ચુકવણીઓ વધી છે અને હું તમને વિનંતી કરું છું કે માત્ર UPI ચૂકવણી કરો અને તમારા અનુભવ વિશે મને લખો."

આ પણ વાંચો----MUMBAI TERROR ATTACK : 26/11 આતંકવાદી હુમલા પછીના તે નિર્ણયો, જેણે ભારતનું સુરક્ષા કવચ બદલી નાખ્યું