Sabarkantha: મધ્યાહ્ન ભોજનમાં ગરોળી મામલે નવો વળાંક, શિક્ષક અને આચાર્યના બચાવમાં શૈક્ષણિક સંઘ મેદાનમાં

10 ઓગસ્ટે ભોજનમાંથી ગરોળી નીકળતાં તંત્રએ કરી હતી કાર્યવાહી

ગત 10 ઓગસ્ટના રોજ સાબરકાંઠા પંથકની શાળામાં પી.એમ. પોષણ યોજના (PM Poshan Scheme) અંતર્ગત બાળકોને પીરસવામાં આવેલા મધ્યાહ્ન ભોજનમાંથી ગરોળી નીકળી હોવાનો ગંભીર મામલો સામે આવ્યો હતો. આ ઘટનાને પગલે વહીવટી તંત્ર દ્વારા તાત્કાલિક ધોરણે પગલાં ભરીને સંબંધિત શિક્ષકને ફરજમુક્ત કરી દેવામાં આવ્યા હતા તેમજ શાળાના આચાર્યને વહીવટી ક્ષતિ અંગે કારણદર્શક નોટિસ ફટકારવામાં આવી હતી.

રસોઈ બનાવવાની જવાબદારી એજન્સીની હોય છે

શૈક્ષણિક સંઘે આવેદનપત્રમાં સ્પષ્ટતા કરતાં જણાવ્યું છે કે, સરકારની પી.એમ. પોષણ યોજના અંતર્ગત શાળાઓમાં ભોજન બનાવવાનું, રાંધવાનું અને સામગ્રીની સ્વચ્છતા રાખવાનું સમગ્ર કામ સ્થાનિક રસોઈયા અને અલગ એજન્સી કે મહિલા મંડળોને સોંપાયેલું હોય છે. શાળાના શિક્ષકોની ભૂમિકા માત્ર નિયત સમયપત્રક મુજબ ભોજનની સામાન્ય દેખરેખ રાખવા પૂરતી સીમિત હોય છે. રસોઈ બનાવવાની પ્રક્રિયા દરમિયાન થતી ક્ષતિ કે ગેરરીતિ માટે સીધેસીધા શિક્ષક કે આચાર્યને જવાબદાર ઠેરવીને તેમની સામે દંડાત્મક પગલાં ભરવા તદ્દન અન્યાયી અને અયોગ્ય છે.

શિક્ષકને પુનઃ ફરજ પર લેવા અને નોટિસ રદ કરવા માગ

પ્રાથમિક શૈક્ષણિક સંઘે કલેક્ટર સમક્ષ રજૂઆત કરી છે કે, નિર્દોષ શિક્ષક પરથી ફરજમુક્તિનો આદેશ પાછો ખેંચી તેમને તાત્કાલિક પુનઃ ફરજ પર લેવામાં આવે અને આચાર્યને આપવામાં આવેલી વહીવટી નોટિસ રદ કરવામાં આવે. સંઘે ચેતવણી આપી છે કે જો શિક્ષકો પર થતી આવી એકતરફી કાર્યવાહી બંધ કરવામાં નહીં આવે તો આગામી દિવસોમાં રાજ્યવ્યાપી આંદોલનની રણનીતિ ઘડવામાં આવશે.

આ પણ વાંચો: સાણંદ પંથકમાં દીપડાનો ફફડાટ: મોટી દેવતી રોડ પર દીપડો દેખાયાની ચર્ચાથી ગ્રામજનોમાં ભય