• મુંબઈ T20 લિગની ધમાકેદાર શરૂઆત
• સૂર્યકુમાર યાદવની અડધી સદી બાદ પણ તેની ટીમ હારી ગઈ
• વરુણ અને સિરાજની જોડીથી ઇગલ થાણે સ્ટ્રાઈકર્સનો વિજય

Suryakumar Yadav in T20 Mumbai League : IPL 2025માં રોયલ ચેલેન્જર્સ બેંગલુરુ (RCB) એ પંજાબ કિંગ્સને 6 રનથી હરાવીને ટાઇટલ પોતાના નામે કર્યું, અને તેની સાથે જ ચાહકોનો ઉત્સાહ ચરમસીમાએ હતો. આ ઉત્સાહની વચ્ચે, મુંબઈ T20 લીગ 2025ની શરૂઆત 4 જૂનથી થઈ ગઇ છે, જેમાં સૂર્યકુમાર યાદવ ટ્રાયમ્ફ્સ નાઈટ્સ MNEની ટીમનું નેતૃત્વ કરી રહ્યો છે. જોકે, લીગની પ્રથમ જ મેચમાં સૂર્યાની ટીમને ઇગલ થાણે સ્ટ્રાઈકર્સ સામે 5 વિકેટથી હારનો સામનો કરવો પડ્યો, જેમાં સિરાજ પાટીલે શાનદાર પ્રદર્શન કરીને પોતાની ટીમને જીત અપાવી.

ટ્રાયમ્ફ્સ નાઈટ્સનું બેટિંગ પ્રદર્શન

મેચમાં ટ્રાયમ્ફ્સ નાઈટ્સ MNEએ પ્રથમ બેટિંગ કરતાં 20 ઓવરમાં 179 રનનો સ્કોર ઉભો કર્યો હતો. કેપ્ટન સૂર્યકુમાર યાદવે આક્રમક અડધી સદી ફટકારી, 27 બોલમાં 50 રન બનાવ્યા, જેમાં 8 ચોગ્ગા અને 1 છગ્ગો સામેલ હતો. તેની સાથે જીગર સુરેન્દ્ર રાણાએ પણ 53 રનની શાનદાર ઇનિંગ રમી, જ્યારે પરીક્ષિત વલસંગકરે 29 રન અને જય સંજય જૈને 24 રનનું યોગદાન આપ્યું. આ ખેલાડીઓના પ્રદર્શનને કારણે ટીમે મજબૂત સ્કોર બનાવ્યો, પરંતુ તે ઇગલ થાણે સ્ટ્રાઈકર્સને રોકવા માટે પૂરતું નહોતું.

ઇગલ થાણે સ્ટ્રાઈકર્સની જીત

જવાબમાં, ઇગલ થાણે સ્ટ્રાઈકર્સે 19.2 ઓવરમાં 181 રન બનાવીને લક્ષ્ય હાંસલ કરી લીધું. વરુણ લવાંડેએ 57 રનની ઝડપી ઇનિંગ રમી, જ્યારે સિરાજ પાટીલે 22 બોલમાં 47 રનની વિસ્ફોટક બેટિંગ કરી, જેમાં 3 ચોગ્ગા અને 4 છગ્ગા સામેલ હતા. સિરાજની આ ઇનિંગે ટીમને છેલ્લી ઓવરમાં જીત અપાવી, જેના માટે તેને ‘પ્લેયર ઓફ ધ મેચ’નો એવોર્ડ મળ્યો. અનિશ મુકુંદ ચૌધરીએ 37 રનનું યોગદાન આપ્યું, જેના કારણે ઇગલ થાણે સ્ટ્રાઈકર્સે આ મેચમાં શાનદાર વિજય મેળવ્યો.

સૂર્યકુમાર યાદવનું IPL 2025 પ્રદર્શન

IPL 2025માં સૂર્યકુમાર યાદવે મુંબઈ ઇન્ડિયન્સ માટે શાનદાર પ્રદર્શન કર્યું હતું. તેણે સમગ્ર ટુર્નામેન્ટમાં 717 રન ફટકાર્યા, જેમાં 5 અડધી સદીનો સમાવેશ થાય છે. જોકે, તેની ટીમ ક્વોલિફાયર-2માં પંજાબ કિંગ્સ સામે 5 વિકેટથી હારી ગઈ અને ફાઇનલમાં પહોંચી શકી નહીં. આ હાર છતાં, સૂર્યાનું વ્યક્તિગત પ્રદર્શન ખૂબ સારું રહ્યું, જેનો ઉત્સાહ તે મુંબઈ T20 લીગમાં લઈને આવ્યો. પરંતુ, લીગની પ્રથમ મેચમાં તેની ટીમને હારનો સામનો કરવો પડ્યો.

આ પણ વાંચો :  મને બોલવા દો! મારી પાસે વધુ સમય નથી... ચિન્નાસ્વામી સ્ટેડિયમમાં ફેન્સે વિરાટ કોહલીને બોલવા ન દીધા