Ronaldo Retirement FIFA World Cup 2026: બહેને આપ્યા સંન્યાસના સંકેત
ટોરોન્ટો સ્ટેડિયમની બહાર એક સ્પોર્ટ્સ ટીવી ચેનલ સાથે વાતચીત કરતી વખતે કાતિયા એવેઇરોએ જણાવ્યું કે, હવે રોનાલ્ડો ખેલજગતને અલવિદા કહી શકે છે. ભલે તે આજે સંન્યાસ ન લે, પરંતુ નેશનલ ટીમ સાથે આ તેની છેલ્લી સફર છે. સૂત્રોની માહિતી અનુસાર 2026 વર્લ્ડ કપ જ તેની છેલ્લી ટૂર્નામેન્ટ હશે. જોકે રોનાલ્ડો અથવા પોર્ટુગલ ફૂટબોલ ફેડરેશન તરફથી સંન્યાસને લઈને હજી સુધી કોઈ સત્તાવાર જાહેરાત કરવામાં આવી નથી.
Ronaldo Retirement FIFA World Cup 2026: 41 ની ઉંમરે રચ્યો નવો ઈતિહાસ
આ ખુલાસો એવા સમયે થયો છે જ્યારે 41 વર્ષીય રોનાલ્ડો સતત નવા રેકોર્ડ બનાવી રહ્યો છે. ક્રોએશિયા સામે રમાયેલા નોકઆઉટ મુકાબલામાં રોનાલ્ડોએ બીજા હાફમાં પેનલ્ટી પર શાનદાર ગોલ કરીને પોર્ટુગલને 2-1 થી રોમાંચક જીત અપાવી હતી. આ સાથે જ તે 41 વર્ષ 147 દિવસની ઉંમરે ફિફા વર્લ્ડ કપ નોકઆઉટ મેચમાં ગોલ કરનારો સૌથી મોટી ઉંમરનો ખેલાડી બની ગયો છે. તેણે આ મામલામાં લિઓનલ મેસીનો રેકોર્ડ તોડી નાખ્યો છે. 6 વર્લ્ડ કપ રમી ચૂકેલા રોનાલ્ડોના કરિયરનો નોકઆઉટ મેચમાં આ પ્રથમ ગોલ હતો.
મેદાન પર ઉતરતાની સાથે જ નવો રેકોર્ડ
મેચ શરૂ થતાની સાથે જ રોનાલ્ડોએ એક અનોખો ઈતિહાસ પોતાના નામે કર્યો હતો. તે ફિફા વર્લ્ડ કપ નોકઆઉટ મેચમાં રમનારો સૌથી મોટી ઉંમરનો આઉટફિલ્ડ ખેલાડી બન્યો હતો. આ મેચમાં ક્રોએશિયા તરફથી લુકા મોડ્રિચ પણ રમી રહ્યો હતો. ફૂટબોલ ઇતિહાસમાં આ પ્રથમ વખત બન્યું છે જ્યારે કોઈ મેચમાં બંને ટીમો તરફથી 40 વર્ષથી વધુ ઉંમરના આઉટફિલ્ડ ખેલાડીઓ મેદાન પર ઉતર્યા હોય. રોનાલ્ડોની આ 26 મી વર્લ્ડ કપ મેચ હતી.
ટકોર કરનારા ટીકાકારોને આપ્યો જડબાતોડ જવાબ
ટૂર્નામેન્ટની શરૂઆતમાં ડીઆર કાંગો સામે રોનાલ્ડો એક પણ શૉટ ટાર્ગેટ પર લગાવી શક્યો ન હતો. આ ખરાબ પ્રદર્શન બાદ સોશિયલ મીડિયા પર તેની ઘણી ટીકા થઈ હતી. જોકે આ દિગ્ગજ સ્ટ્રાઈકરે જોરદાર વાપસી કરીને ઉઝબેકિસ્તાન સામે 2 ગોલ કર્યા અને ક્રોએશિયા સામે નિર્ણાયક ગોલ કરીને ટીકાકારોના મોં બંધ કરી દીધા હતા. તેની બહેને પણ બચાવ કરતા કહ્યું કે જે લોકો ફૂટબોલને સાચી રીતે સમજે છે તેઓ રોનાલ્ડોને પ્રેમ કરે છે. તે છેલ્લા 20 થી વધુ વર્ષોથી દુનિયા પર રાજ કરી રહ્યો છે.
આંકડા દર્શાવે છે રોનાલ્ડોનો વિક્રમ
ઉલ્લેખનીય છે કે, ક્રિસ્ટિયાનો રોનાલ્ડો અત્યાર સુધી પોર્ટુગલ માટે કુલ 232 આંતરરાષ્ટ્રીય મેચ રમી ચૂક્યો છે અને તેમાં તેણે 146 ગોલ કર્યા છે. તે પુરુષ આંતરરાષ્ટ્રીય ફૂટબોલ ઈતિહાસમાં દુનિયામાં સૌથી વધુ ગોલ કરનારો ખેલાડી છે. જો તેની બહેનનો દાવો સાચો સાબિત થશે, તો 2026 ફિફા વર્લ્ડ કપ બાદ ફૂટબોલ જગતના એક સુવર્ણ યુગનો અંત આવી જશે.
આ પણ વાંચો--- Aaron Summers Cricketer Convicted: ઓસ્ટ્રેલિયાના આ ફાસ્ટ બોલરનું કરિયર ખતમ!, સગીરાના યૌન શોષણમાં દોષિત
