FIFA World Cup 2026 ના રાઉન્ડ ઓફ 32 (Round of 32) માં ડિફેન્ડિંગ ચેમ્પિયન આર્જેન્ટીનાએ (Argentina) રોમાંચક જીત નોંધાવી હતી, પરંતુ આ જીતે ટીમની કેટલીક નબળાઈઓ પણ ઉજાગર કરી દીધી છે. વિશ્વ ફૂટબોલના દિગ્ગજ લિયોનેલ મેસી (Lionel Messi) ની આગેવાની હેઠળની ટીમને માત્ર આશરે 5 લાખની વસ્તી ધરાવતા નાના દેશ કેપ વર્ડે (Cape Verde) સામે જીતવા માટે પૂરા 120 મિનિટ સુધી સંઘર્ષ કરવો પડ્યો હતો. અંતિમ ક્ષણ સુધી એ સ્પષ્ટ નહોતું કે 3 વખતની વિશ્વ ચેમ્પિયન ટીમ આગામી રાઉન્ડમાં પહોંચશે કે નહીં.
મેસીએ અપાવી શરૂઆતની લીડ
શનિવાર, 4 જુલાઈએ રમાયેલા આ મુકાબલામાં મિયામી (Miami) ના લગભગ 65 હજાર દર્શકોથી ભરેલા સ્ટેડિયમમાં મેસીના દરેક ટચ પર તાળીઓનો ગડગડાટ સંભળાતો હતો. આર્જેન્ટીનાએ પણ મેચની શરૂઆતથી જ આક્રમક રમત દાખવી અને પ્રથમ હાફમાં મેસીએ શાનદાર ગોલ ફટકારી પોતાની ટીમને 1-0 ની લીડ અપાવી. જોકે, કેપ વર્ડે દબાણમાં આવ્યું નહીં. બીજા હાફની 60મી મિનિટે ડેરોય ડુઆર્ટે (Deroy Duarte) એ અદભૂત ગોલ કરીને સ્કોર 1-1 થી બરાબર કરી દીધો. ત્યારબાદ નિર્ધારિત 90 મિનિટ સુધી બંને ટીમો વચ્ચે કોઈ નિર્ણાયક ગોલ થયો નહીં અને મેચ એક્સ્ટ્રા ટાઈમ (Extra Time) સુધી પહોંચી.
એક્સ્ટ્રા ટાઈમમાં પણ જંગ યથાવત રહ્યો
એક્સ્ટ્રા ટાઈમ શરૂ થતાં જ લિસાન્ડ્રો માર્ટિનેઝ (Lisandro Martinez) એ ગોલ કરીને આર્જેન્ટીનાને ફરી 2-1 ની લીડ અપાવી. તે સમયે એવું લાગી રહ્યું હતું કે હવે મેચ આર્જેન્ટીનાના પક્ષમાં ખતમ થશે. પરંતુ કેપ વર્ડેએ ફરી એકવાર જોરદાર વાપસી કરી અને મુકાબલાને વધુ રોમાંચક બનાવી દીધો. થોડી જ મિનિટોમાં સિડની લોપેસ કેબ્રાલ (Sidney Lopes Cabral) એ બોક્સની બહારથી જોરદાર શોટ ફટકાર્યો, જે સીધો ટોપ કોર્નરમાં ગયો. આ શાનદાર ગોલને હવે ટૂર્નામેન્ટના 'ગોલ ઓફ ધ ટૂર્નામેન્ટ' (Goal of the Tournament) માટે સૌથી મોટો દાવેદાર માનવામાં આવી રહ્યો છે. કેબ્રાલના આ અદ્ભુત ગોલને જોઈને મેસી પણ ક્ષણભર માટે આશ્ચર્યચકિત થઈ ગયા હતા.
ઓન ગોલ બન્યો મેચનો ટર્નિંગ પોઇન્ટ
મેચ પેનલ્ટી શૂટઆઉટ (Penalty Shootout) તરફ આગળ વધી રહ્યો હતો ત્યારે આર્જેન્ટીનાને કોર્નર (Corner) મળ્યો. મેસીના ચોક્કસ ક્રોસ પર ક્રિસ્ટિયન રોમેરો (Cristian Romero) એ હેડર કર્યો, પરંતુ બોલ કેપ વર્ડેના ડિફેન્ડર ડાઈની બોર્ગેસ (Diney Borges) ને અથડાઈને સીધો જ ગોલપોસ્ટમાં ગયો. આ ગોલ ઓન ગોલ મેચનો સૌથી નિર્ણાયક ક્ષણ સાબિત થયો અને આર્જેન્ટીનાએ 3-2 ની લીડ મેળવી લીધી. આ ગોલ બાદ કેપ વર્ડેના ખેલાડીઓ મેદાન પર જ નિરાશ થઈને બેઠા રહી ગયા, કારણ કે તેઓ ફિફા વર્લ્ડ કપમાં (FIFA World Cup) ઇતિહાસ રચવાથી માત્ર થોડા જ મિનિટ દૂર હતા.
અંતિમ ક્ષણ સુધી કેપ વર્ડેએ હાર સ્વીકારી નહીં
ઓન ગોલ પછી પણ કેપ વર્ડેએ હિંમત હારી નહીં. ઈન્જરી ટાઈમ (Injury Time) દરમિયાન ફરી એકવાર સિડની કેબ્રાલે જોરદાર શોટ ફટકાર્યો, પરંતુ આર્જેન્ટીનાના ગોલકીપર એમિલિયાનો માર્ટિનેઝ (Emiliano Martinez) એ શાનદાર સેવ કરીને પોતાની ટીમને બચાવી લીધી અને મેચને પેનલ્ટી શૂટઆઉટ સુધી જવા દીધી નહીં.
મેસીના નામે વધુ એક ઐતિહાસિક રેકોર્ડ
આ મેચમાં ગોલ નોંધાવતાં જ લિયોનેલ મેસીએ સતત 8 ફિફા વર્લ્ડ કપ મેચોમાં ગોલ કરવાનો પોતાનો અનોખો રેકોર્ડ વધુ મજબૂત બનાવ્યો. સાથે જ ટૂર્નામેન્ટમાં સૌથી વધુ ગોલ કરનાર ખેલાડીઓની યાદીમાં તેણે કિલિયન એમ્બાપ્પે (Kylian Mbappe) સામે પોતાની લીડ પણ વધારી દીધી. કેપ વર્ડે માટે આ પ્રથમ ફિફા વર્લ્ડ કપ હતો, છતાં ટીમે પોતાના શાનદાર પ્રદર્શનથી સમગ્ર વિશ્વનું ધ્યાન ખેંચ્યું છે.
ગ્રુપ સ્ટેજ (Group Stage) દરમિયાન તેણે સ્પેન (Spain), ઉરુગ્વે (Uruguay) અને સાઉદી અરેબિયા (Saudi Arabia) જેવી મજબૂત ટીમોને ડ્રો પર રોકીને નોકઆઉટ (Knockout) સુધીનો સફર કર્યો હતો. ત્યારબાદ વિશ્વ ચેમ્પિયન આર્જેન્ટીનાને પણ 120 મિનિટ સુધી જોરદાર ટક્કર આપીને કેપ વર્ડેએ સાબિત કરી દીધું કે ફૂટબોલમાં માત્ર મોટા નામ નહીં, પરંતુ મોટો જુસ્સો અને સંઘર્ષ કરવાની ક્ષમતા પણ જીત-હાર નક્કી કરે છે.
આ પણ વાંચો : Ronaldo Retirement FIFA World Cup 2026: ક્રિસ્ટિયાનો રોનાલ્ડો લેશે સંન્યાસ? બહેને કર્યો મોટો દાહો, કહ્યું- આ વર્લ્ડ કપ હશે 'લાસ્ટ ડાન્સ'
