FIFA World Cup 2026 : 2026 FIFA વર્લ્ડ કપ (2026 FIFA World Cup) 11 જૂનથી શરૂ થવાનો છે અને આ ટૂર્નામેન્ટને લઈને વિશ્વભરના ફૂટબોલ (Football) ચાહકોમાં ભારે ઉત્સાહ જોવા મળી રહ્યો છે. આ વખતે વર્લ્ડ કપ (World Cup)નું આયોજન સંયુક્ત રીતે અમેરિકા (USA), કેનેડા (Canada) અને મેક્સિકો (Mexico) દ્વારા કરવામાં આવશે. ખાસ વાત એ છે કે આ ટૂર્નામેન્ટ મહાન ફૂટબોલરો લિયોનેલ મેસ્સી (Lionel Messi) અને ક્રિસ્ટિયાનો રોનાલ્ડો (Cristiano Ronaldo) માટે છેલ્લો વર્લ્ડ કપ સાબિત થઈ શકે છે. બીજી તરફ, લિયોનેલ મેસ્સીની આગેવાની હેઠળ આર્જેન્ટિના (Argentina) પોતાની 2022માં જીતેલી ટ્રોફીનો બચાવ કરવા મેદાનમાં ઉતરશે. FIFA વર્લ્ડ કપના ઇતિહાસમાં અનેક દેશોએ શાનદાર પ્રદર્શન કર્યું છે, પરંતુ કેટલાક દેશોએ ગોલ (Goals) કરવાની બાબતમાં ખાસ છાપ છોડી છે. ચાલો જાણીએ વર્લ્ડ કપના ઇતિહાસમાં સૌથી વધુ ગોલ કરનારા ટોચના 5 દેશો વિશે.

બ્રાઝિલ : સૌથી વધુ ગોલ કરનાર દેશ

ફૂટબોલની દુનિયામાં બ્રાઝિલનું નામ સૌથી સફળ અને પ્રભાવશાળી ટીમોમાં લેવામાં આવે છે. બ્રાઝિલ એકમાત્ર એવો દેશ છે જેણે FIFA વર્લ્ડ કપની તમામ 22 આવૃત્તિઓમાં ભાગ લીધો છે. ટીમે કુલ 114 મેચ રમી છે અને 237 ગોલ કરીને સૌથી વધુ ગોલ કરનાર દેશનો રેકોર્ડ પોતાના નામે કર્યો છે. બ્રાઝિલે અત્યાર સુધીમાં 5 વખત વર્લ્ડ કપનો ખિતાબ જીત્યો છે. ટીમે 1958, 1962, 1970, 1994 અને 2002માં વિશ્વ ચેમ્પિયન બનવાનો ગૌરવ મેળવ્યો હતો. બ્રાઝિલ માટે દિગ્ગજ સ્ટ્રાઇકર રોનાલ્ડો નાઝારિયો (Ronaldo Nazário) એ વર્લ્ડ કપમાં સૌથી વધુ 15 ગોલ નોંધાવ્યા હતા.

જર્મની : ગોલ મશીન તરીકે ઓળખાતી ટીમ (FIFA World Cup 2026)

જર્મની FIFA વર્લ્ડ કપના ઇતિહાસમાં સૌથી વધુ સફળ ટીમોમાંની એક છે. જર્મનીએ 20 વખત વર્લ્ડ કપમાં ભાગ લીધો છે અને 112 મેચોમાં કુલ 232 ગોલ કર્યા છે. ગોલની સંખ્યાના મામલે તે બીજા ક્રમે આવે છે. જર્મનીએ 1954, 1974, 1990 અને 2014માં વર્લ્ડ કપનો ખિતાબ જીત્યો હતો. જર્મન ટીમ માટે મિરોસ્લાવ ક્લોઝે (Miroslav Klose) સૌથી સફળ ગોલ સ્કોરર રહ્યા છે. તેમણે વર્લ્ડ કપમાં કુલ 16 ગોલ કર્યા હતા, જે વ્યક્તિગત રીતે પણ એક ઐતિહાસિક રેકોર્ડ ગણાય છે.

આર્જેન્ટિના : મેસ્સીના નેતૃત્વમાં ગૌરવશાળી સફર

આર્જેન્ટિના વિશ્વ ફૂટબોલની સૌથી લોકપ્રિય ટીમોમાંની એક છે. ટીમે અત્યાર સુધીમાં 18 વખત FIFA વર્લ્ડ કપમાં ભાગ લીધો છે. આર્જેન્ટિનાએ 88 મેચોમાં કુલ 152 ગોલ કર્યા છે અને આ યાદીમાં ત્રીજા સ્થાને છે. આર્જેન્ટિનાએ 1978, 1986 અને 2022માં વર્લ્ડ કપ જીત્યો હતો. હાલના સમયના મહાન ખેલાડી લિયોનેલ મેસ્સીએ પોતાના દેશ માટે વર્લ્ડ કપમાં સૌથી વધુ 13 ગોલ કર્યા છે. 2026નો વર્લ્ડ કપ મેસ્સી માટે ખાસ બની શકે છે કારણ કે તે કદાચ તેમની અંતિમ વર્લ્ડ કપ ટૂર્નામેન્ટ હોઈ શકે છે.

ફ્રાન્સ : સતત મજબૂત દેખાવ કરનાર ટીમ

ફ્રાન્સે અત્યાર સુધીમાં 16 વખત FIFA વર્લ્ડ કપમાં ભાગ લીધો છે. ટીમે કુલ 73 મેચોમાં 136 ગોલ કર્યા છે અને સૌથી વધુ ગોલ કરનાર દેશોની યાદીમાં ચોથા સ્થાને છે. ફ્રાન્સે 1998 અને 2018માં વર્લ્ડ કપ ટ્રોફી જીતી હતી. ફ્રાન્સ માટે જસ્ટ ફોન્ટેન (Just Fontaine) સૌથી વધુ ગોલ કરનાર ખેલાડી છે. તેમણે વર્લ્ડ કપમાં 13 ગોલ કર્યા હતા, જે આજે પણ ફ્રાન્સ માટે એક મહત્વપૂર્ણ રેકોર્ડ માનવામાં આવે છે.

ઇટાલી : 4 વખતની વિશ્વ ચેમ્પિયન ટીમ

ઇટાલી પણ FIFA વર્લ્ડ કપના ઇતિહાસની સૌથી સફળ ટીમોમાં સામેલ છે. ટીમે 18 વખત વર્લ્ડ કપમાં ભાગ લીધો છે અને 83 મેચોમાં કુલ 128 ગોલ કર્યા છે. ઇટાલીએ 1934, 1938, 1982 અને 2006માં વર્લ્ડ કપનો ખિતાબ જીત્યો હતો. ઇટાલી માટે ક્રિશ્ચિયન વિએરી (Christian Vieri), પાઓલો રોસી (Paolo Rossi) અને રોબર્ટો બેગિયો (Roberto Baggio) સંયુક્ત રીતે સૌથી વધુ ગોલ કરનાર ખેલાડીઓ છે. ત્રણેય ખેલાડીઓએ વર્લ્ડ કપમાં 9-9 ગોલ કર્યા હતા.

2026 FIFA વર્લ્ડ કપ પર સૌની નજર

2026 FIFA વર્લ્ડ કપ ફૂટબોલ પ્રેમીઓ માટે અનેક યાદગાર ક્ષણો લઈને આવવાનો છે. એક તરફ આર્જેન્ટિના પોતાના ખિતાબનું રક્ષણ કરવાનો પ્રયાસ કરશે, તો બીજી તરફ ફૂટબોલ જગતના 2 મહાન સ્ટાર લિયોનેલ મેસ્સી અને ક્રિસ્ટિયાનો રોનાલ્ડોની સંભવિત અંતિમ વર્લ્ડ કપ સફર પર પણ સૌની નજર રહેશે. આ વચ્ચે બ્રાઝિલ, જર્મની, ફ્રાન્સ અને ઇટાલી જેવી દિગ્ગજ ટીમો ફરી એકવાર પોતાના ગૌરવશાળી ઇતિહાસમાં નવા અધ્યાય ઉમેરવા માટે મેદાનમાં ઉતરશે.

આ પણ વાંચો : ઈરાન FIFA World Cup 2026 માં રમવા નહીં જાય!, અમેરિકા સાથે યુદ્ધને કારણે લીધો નિર્ણય