• રોહિત શર્માની આગેવાનીમાં ભારતે ચેમ્પિયન્સ ટ્રોફી 2025 જીતી
• ODIમાંથી નિવૃત્તિ લેશે કે નહીં: રોહિત શર્માની સ્પષ્ટતા
• ભારતનો ઐતિહાસિક ત્રીજો ચેમ્પિયન્સ ટ્રોફી ખિતાબ
• ICC ટુર્નામેન્ટની ફાઇનલમાં રોહિત શર્માનો શાનદાર રેકોર્ડ
• રોહિત શર્માની કેપ્ટન્સીમાં સતત બીજા ICC ટૂર્નામેન્ટ પર કબજો કર્યો

Rohit Sharma Champions Trophy 2025 : ભારતીય ક્રિકેટ ટીમે કેપ્ટન રોહિત શર્માના નેતૃત્વ હેઠળ રવિવારે ન્યૂઝીલેન્ડને 4 વિકેટથી પરાજય આપીને ચેમ્પિયન્સ ટ્રોફી 2025નો ખિતાબ જીત્યો. આ જીત સાથે ભારતે આ પ્રતિષ્ઠિત ટૂર્નામેન્ટને ત્રીજી વખત પોતાના નામે કરી, વિશ્વમાં સૌથી વધુ ચેમ્પિયન્સ ટ્રોફી જીતનારી ટીમ બનવાનો રેકોર્ડ સ્થાપ્યો. આ જીત ભારત માટે ખાસ છે, કારણ કે ગયા વર્ષે 2024ના T20 વર્લ્ડ કપમાં બાર્બાડોસ ખાતે વિજય મેળવ્યા બાદ રોહિત શર્માની ટીમે સતત બીજી ICC ટૂર્નામેન્ટ જીતીને પોતાની શ્રેષ્ઠતા સાબિત કરી છે.

રોહિતની નિવૃત્તિ અંગે સ્પષ્ટતા

ચેમ્પિયન્સ ટ્રોફી 2025 નો ખિતાબ જીત્યા બાદ એવી અટકળો ચાલી રહી હતી કે કેપ્ટન રોહિત શર્મા વનડે ક્રિકેટમાંથી હવે નિવૃત્તિની જાહેરાત કરી શકે છે. જોકે, મેચ પૂર્ણ થયા બાદ જ્યારે રોહિત શર્માએ પ્રેસ કોન્ફરન્સ કરી ત્યારે તેણે આ અંગે સ્પષ્ટતા કરી અને કહ્યું કે, તે હાલમાં વનડે ક્રિકેટમાંથી નિવૃત્તિ લેવાના નથી. તેણે કહ્યું, "હું એક વાત સ્પષ્ટ કરવા માંગું છું કે હું ODI ફોર્મેટમાંથી નિવૃત્તિ લઈ રહ્યો નથી. અફવાઓને વધવા દેવા નથી માંગતો. અત્યારે મારી પાસે ભવિષ્યની કોઈ ચોક્કસ યોજના નથી, અને હું જે રીતે રમી રહ્યો છું તે રીતે આગળ વધતો રહીશ." રોહિતના આ નિવેદનથી ચાહકોમાં ખુશીની લાગણી છવાઈ ગઈ છે, કારણ કે તેની નેતૃત્વ ક્ષમતા અને બેટિંગ કૌશલ્ય હજી પણ ટીમ માટે અમૂલ્ય છે.

ભારતનો રેકોર્ડબ્રેક વિજય

આ જીત સાથે ભારતે ઓસ્ટ્રેલિયાને પાછળ છોડી દીધું છે, જેણે બે વખત ચેમ્પિયન્સ ટ્રોફી જીતી હતી. હવે ભારત ત્રણ ખિતાબ સાથે આ ટૂર્નામેન્ટની સૌથી સફળ ટીમ બની ગયું છે. રોહિત શર્મા એમએસ ધોની પછી બીજા એવા ભારતીય કેપ્ટન બન્યા છે, જેમણે એકથી વધુ ICC મેન્સ વ્હાઇટ-બોલ ટૂર્નામેન્ટ જીતી છે. ધોનીએ પોતાના નેતૃત્વમાં 2007નો T20 વર્લ્ડ કપ, 2011નો ODI વર્લ્ડ કપ અને 2013ની ચેમ્પિયન્સ ટ્રોફી જીતી હતી, જ્યારે રોહિતે 2024નો T20 વર્લ્ડ કપ અને 2025ની ચેમ્પિયન્સ ટ્રોફી પોતાના નામે કરી છે.

ફાઇનલમાં રોહિતનું શાનદાર પ્રદર્શન

ન્યૂઝીલેન્ડ સામેની ફાઇનલ મેચમાં રોહિત શર્માએ કેપ્ટન્સી ઇનિંગ રમીને ટીમને જીત તરફ દોરી હતી. તેણે 83 બોલમાં 76 રનની શાનદાર ઇનિંગ રમી, જેમાં 3 છગ્ગા અને 7 ચોગ્ગાનો સમાવેશ હતો. ખાસ કરીને કાયલ જેમીસનના બોલ પર બીજા જ બોલે તેના સિગ્નેચર પુલ શોટ સાથે ફટકારેલી સિક્સરે દર્શકોનું દિલ જીતી લીધું હતું. તેણે ICC ટુર્નામેન્ટ ફાઇનલમાં 41 બોલમાં ફિફ્ટી ફટકારીને પોતાનો પહેલો ફિફ્ટી પ્લસ સ્કોર બનાવ્યો. રોહિતની આ ઇનિંગે ભારતને મુશ્કેલ પરિસ્થિતિમાંથી બહાર કાઢીને વિજયનો પાયો નાખ્યો હતો.

રોહિતે ઇતિહાસ રચ્યો

રોહિત શર્મા આંતરરાષ્ટ્રીય ક્રિકેટમાં એક અનોખો રેકોર્ડ ધરાવે છે. તે વિશ્વનો પ્રથમ કેપ્ટન છે જેણે પોતાની ટીમને 4 મોટી ICC ટૂર્નામેન્ટની ફાઇનલમાં પહોંચાડી છે. આમાં T20 વર્લ્ડ કપ 2024, ODI વર્લ્ડ કપ 2023, વર્લ્ડ ટેસ્ટ ચેમ્પિયનશિપ 2023 અને હવે ચેમ્પિયન્સ ટ્રોફી 2025નો સમાવેશ થાય છે. જોકે, ઓસ્ટ્રેલિયા સામે WTC ફાઇનલ અને ODI વર્લ્ડ કપ ફાઇનલમાં તેને હારનો સામનો કરવો પડ્યો હતો, પરંતુ T20 વર્લ્ડ કપ અને ચેમ્પિયન્સ ટ્રોફીની જીતે તેની નેતૃત્વ ક્ષમતાને નવી ઊંચાઈએ પહોંચાડી છે.

ભારતની સતત ICC સફળતા

2024ના T20 વર્લ્ડ કપમાં ભારતે દક્ષિણ આફ્રિકાને હરાવીને ખિતાબ જીત્યો હતો, અને હવે ચેમ્પિયન્સ ટ્રોફી 2025માં ન્યૂઝીલેન્ડને પરાજય આપીને ટીમ ઈન્ડિયાએ સતત બીજી ICC ટૂર્નામેન્ટ પર કબજો કર્યો છે. આ સફળતા રોહિત શર્માના નેતૃત્વ, ટીમના સામૂહિક પ્રયાસો અને ખેલાડીઓની સતત મહેનતનું પરિણામ છે. ભારતનો આ ત્રીજો ચેમ્પિયન્સ ટ્રોફી ખિતાબ છે, જે 2002 (શ્રીલંકા સાથે સંયુક્ત), 2013 અને હવે 2025માં આવ્યો છે.

આ પણ વાંચો :   Champions Trophy 2025 : ટીમ ઈન્ડિયાના ઐતિહાસિક વિજય પર રાષ્ટ્રપતિ-વડાપ્રધાન સહિત અન્ય નેતાઓ શું કહ્યું?