349 રન બનાવ્યા છતાં ભારત A હાર્યું, વરસાદે બદલ્યો મેચનો આખો ખેલ
શ્રીલંકાના દાંબુલા સ્થિત રંગિરી દાંબુલા ઇન્ટરનેશનલ સ્ટેડિયમમાં રમાયેલી ભારત A અને અફઘાનિસ્તાન A વચ્ચેની મેચ રોમાંચક રહી હતી. ભારતીય ટીમે પ્રથમ બેટિંગ કરતા 49 ઓવરમાં 9 વિકેટે 349 રનનો મજબૂત સ્કોર ઉભો કર્યો હતો. ભારત Aના બેટર્સે શરૂઆતથી જ આક્રમક રમત બતાવી હતી. વૈભવ સૂર્યવંશી, પ્રભસિમરન સિંહ, રુતુરાજ ગાયકવાડ અને તિલક વર્માએ શાનદાર ઇનિંગ રમી ટીમને મોટા સ્કોર સુધી પહોંચાડી હતી.
વૈભવથી લઈને ગાયકવાડ સુધી બધાએ બતાવ્યો દમ
ભારત A તરફથી વૈભવ સૂર્યવંશીએ માત્ર 22 બોલમાં 44 રનની ઝડપી ઇનિંગ રમી હતી. પ્રભસિમરન સિંહે 69 બોલમાં 84 રન બનાવી ટીમને મજબૂત શરૂઆત આપી હતી. ત્યારબાદ રુતુરાજ ગાયકવાડ અને કેપ્ટન તિલક વર્માએ પણ મહત્વપૂર્ણ યોગદાન આપ્યું હતું. બંને ખેલાડીઓએ 66-66 રનની ઇનિંગ રમી હતી. અંતમાં સૂર્યવંશીને શેડગેએ ઝડપી 40 રન ફટકારી ભારતનો સ્કોર 349 સુધી પહોંચાડવામાં મદદ કરી હતી.
વરસાદ આવ્યા બાદ DLS નિયમ બન્યો નિર્ણાયક
349 રનના લક્ષ્યાંકનો પીછો કરતા અફઘાનિસ્તાન Aએ શરૂઆતથી જ ઝડપી બેટિંગ કરી હતી. હસન ઈસાખિલે 29 બોલમાં 34 રન બનાવી ટીમને સારી શરૂઆત અપાવી હતી. કપ્તાન ઇમરાન મીરે શાનદાર બેટિંગ કરતા 70 બોલમાં અણનમ 75 રન બનાવ્યા હતા. બહિર શાહે પણ અણનમ 51 રનની ઇનિંગ રમી હતી. જ્યારે વરસાદના કારણે મેચ અટકાવવામાં આવી ત્યારે અફઘાનિસ્તાન Aનો સ્કોર 25.5 ઓવરમાં 2 વિકેટે 177 રન હતો. DLS ગણતરી પ્રમાણે તે નિર્ધારિત સ્કોરથી 4 રન આગળ હતું, જેના કારણે તેને વિજેતા જાહેર કરવામાં આવ્યું.
ભારત A માટે મોટો ઝટકો, હવે આગામી મેચ પર નજર
ભારત A માટે આ હાર નિરાશાજનક રહી છે કારણ કે ટીમે બેટિંગમાં શાનદાર પ્રદર્શન કર્યું હતું. જોકે વરસાદ અને DLS નિયમના કારણે આખી મેચનું પરિણામ બદલાઈ ગયું. ભારત Aએ ટૂર્નામેન્ટની શરૂઆત શ્રીલંકા A સામે જીત સાથે કરી હતી. હવે ટીમ આગામી મેચોમાં વાપસી કરીને પોઈન્ટ ટેબલમાં પોતાની સ્થિતિ મજબૂત કરવાનો પ્રયાસ કરશે.
આ પણ વાંચો : Cricket Record : એક શાનદાર ઇનિંગ અને ગાયકવાડે કોહલીને પાછળ છોડ્યા, જાણો શેમાં બનાવ્યો રેકોર્ડ?
