India A Cricket News : દંબુલાના મેદાન પર ભારતીય યુવા બ્રિગેડનો દબદબો
શ્રીલંકાની ધરતી પર રમાયેલી વનડે ત્રિપાંખીયો જંગ (ટ્રાય સિરીઝ) હવે તેના અંજામ પર પહોંચી ગયો છે અને ભારતીય ક્રિકેટના ઉજ્જવળ ભવિષ્યની ઝલક ફરી એકવાર જોવા મળી છે. આ આખી ટૂર્નામેન્ટમાં ભારત, શ્રીલંકા અને અફઘાનિસ્તાનની એ ટીમો સામેલ હતી. ફાઇનલ મેચમાં ભારતીય ખેલાડીઓએ રમતની ત્રણેય પાંખોમાં એટલે કે બેટિંગ, બોલિંગ અને ફિલ્ડિંગમાં અસાધારણ પ્રદર્શન કરીને સ્થાનિક પ્રેક્ષકોને ચોંકાવી દીધા હતા. દંબુલાની પીચ પર ભારતીય બેટ્સમેનોએ રનનો પહાડ ખડકી દીધો હતો, જેની સામે શ્રીલંકાની ટીમ દબાણમાં આવી ગઈ હતી.
15 વર્ષના વૈભવ સૂર્યવંશીની વાવાઝોડા જેવી ઇનિંગ અને 377 રનનો સ્કોર
મેચની સૌથી મોટી હાઇલાઇટ માત્ર 15 વર્ષના ઓપનિંગ બેટ્સમેન વૈભવ સૂર્યવંશીની વિસ્ફોટક બેટિંગ રહી હતી. ફાઇનલના મોટા મંચ પર કોઈપણ દબાણ વગર રમતા વૈભવે માત્ર 29 બોલનો સામનો કરીને 94 રન ફટકારી દીધા હતા. આ ઇનિંગ દરમિયાન તેના બેટમાંથી 10 ચોગ્ગા અને 8 ગગનચુંબી છગ્ગા નીકળ્યા હતા.
તેનો સ્ટ્રાઇક રેટ 324 થી પણ વધુનો રહ્યો હતો, જેણે શ્રીલંકાના મુખ્ય બોલિંગ આક્રમણને સંપૂર્ણપણે વેરવિખેર કરી દીધું હતું. વૈભવની આ ઇનિંગને કારણે ભારતે 50 ઓવરમાં 9 વિકેટ ગુમાવીને 377 રનનો વિશાળ સ્કોર બનાવ્યો હતો.
તિલક વર્મા અને અનુકૂલ રોયનું મહત્વનું યોગદાન
વૈભવ ઉપરાંત અન્ય ભારતીય બેટ્સમેનોએ પણ ઉપયોગી યોગદાન આપ્યું હતું. ઓપનર પ્રિયાંશ આર્યાએ 39 રન બનાવીને ટીમને સારી શરૂઆત અપાવી હતી. મિડલ ઓર્ડરમાં કેપ્ટન તિલક વર્માએ પોતાની પરિપક્વતા દર્શાવતા 67 રનની શાનદાર ઇનિંગ રમી હતી. ઇનિંગના છેલ્લા તબક્કામાં ઓલરાઉન્ડર અનુકૂલ રોયે માત્ર 15 બોલમાં ઝડપી 39 રન ફટકારીને ટીમના સ્કોરને 377 ના મજબૂત સ્કોર સુધી પહોંચાડ્યો હતો. શ્રીલંકા તરફથી વાનુજા સહન અને કુગાથાસ મથુલને 2-2 વિકેટ ઝડપી હતી પરંતુ તેઓ રન રોકવામાં નિષ્ફળ રહ્યા હતા.
ભારતીય બોલરો સામે લંકન ટીમ નમી: યશ ઠાકુર અને વિપ્રજની કમાલ
378 રનના વિશાળ ટાર્ગેટનો પીછો કરવા ઉતરેલી શ્રીલંકા એ ટીમની શરૂઆત ખરાબ રહી હતી. મિડલ ઓવરોમાં વાનુજા સહનના 62 રન અને સદેરા સમરવિક્રમાના ૫૨ રનની મદદથી લંકન ટીમે વાપસી કરવાનો પ્રયાસ કર્યો હતો, પરંતુ રન રેટનું દબાણ સતત વધતું રહ્યું હતું. અંતે આખી ટીમ 47.1 ઓવરમાં 311 રન બનાવીને ઓલઆઉટ થઈ ગઈ હતી. ભારત તરફથી ઘાતક બોલિંગ કરતા યશ ઠાકુર અને વિપ્રજ નિગમે 3-3 વિકેટ લીધી હતી, જ્યારે અનુકૂલ રોયે 2 વિકેટ ઝડપીને શ્રીલંકાને જીતથી વંચિત રાખ્યું હતું.
આ પણ વાંચો : WTC 2027 Final: વર્લ્ડ ટેસ્ટ ચેમ્પિયનશિપ પર ICC મોટો નિર્ણય લેવાની તૈયારીમાં, ચોંકાવનારી અપડેટ આવી સામે
