India vs Pakistan Gold Medal Match : એશિયન ગેમ્સ 2026ના પુરુષ ક્રિકેટની ગોલ્ડ મેડલ મેચમાં ભારત અને પાકિસ્તાન વચ્ચે હાઈ-વોલ્ટેજ મુકાબલો ચાલી રહ્યો છે. શનિવાર, 3 ઓક્ટોબરે નિશીનના કોરોગી સ્પોર્ટ્સ પાર્ક ખાતે રમાઈ રહેલી આ મેચમાં ભારતે ટોસ જીતીને પ્રથમ બેટિંગ કરવાનો નિર્ણય લીધો છે. ભારત અને પાકિસ્તાન બંને ટીમો સેમિફાઇનલમાં જીત મેળવીને ફાઇનલ સુધી પહોંચી છે.
ભારતની બેટિંગની શરૂઆત
ટોસ જીત્યા બાદ ભારતીય ટીમે પ્રથમ બેટિંગ પસંદ કરી હતી. શરૂઆતમાં વૈભવ સૂર્યવંશી અને અભિષેક શર્માએ ટીમને ઝડપી શરૂઆત અપાવવાનો પ્રયાસ કર્યો હતો. જોકે, વૈભવ પોતાની ઇનિંગને મોટી બનાવી શક્યો નહોતો.
વૈભવ સૂર્યવંશી 9 બોલમાં 15 રન બનાવીને પેવેલિયન પરત ફર્યો હતો. તેની ઇનિંગમાં બે છગ્ગાનો સમાવેશ થયો હતો. સૈમ અયુબના બોલ પર પાકિસ્તાની વિકેટકીપર ઉસ્માન ખાને તેનો કેચ પકડ્યો હતો. વૈભવના આઉટ સમયે ભારતનો સ્કોર 28 રન પર એક વિકેટ હતો.
ભારત માટે ગોલ્ડ મેડલની ટક્કર
ભારત માટે આ મેચ પોતાના એશિયન ગેમ્સના ખિતાબને જાળવી રાખવાની તક છે. બીજી તરફ પાકિસ્તાનની નજર પુરુષ ક્રિકેટમાં પોતાનો પ્રથમ એશિયન ગેમ્સ ગોલ્ડ મેડલ જીતવા પર છે. જેના કારણે બંને ટીમો માટે આ ફાઇનલ ખાસ મહત્વ ધરાવે છે.
ભારતે સેમિફાઇનલમાં શ્રીલંકા સામે શાનદાર પ્રદર્શન કર્યું હતું અને 124 રનથી વિજય મેળવ્યો હતો. પાકિસ્તાને બીજી સેમિફાઇનલમાં બાંગ્લાદેશને 6 વિકેટે હરાવીને ગોલ્ડ મેડલ મેચમાં સ્થાન મેળવ્યું હતું.
બંને ટીમોની Playing XIમાં ફેરફાર નહીં
સેમિફાઇનલમાં વિજય મેળવ્યા બાદ ભારત અને પાકિસ્તાન બંનેએ ફાઇનલ માટે પોતાની Playing XIમાં કોઈ ફેરફાર કર્યો નથી. ભારતની ટીમમાં વૈભવ સૂર્યવંશી, અભિષેક શર્મા, સંજુ સેમસન, શ્રેયસ ઐયર, ઈશાન કિશન, તિલક વર્મા, શિવમ દુબે, અક્ષર પટેલ, વોશિંગ્ટન સુંદર, રવિ બિશ્નોઈ અને જસપ્રીત બુમરાહ સામેલ છે.
પાકિસ્તાન તરફથી સાહિબજાદા ફરહાન કેપ્ટન તરીકે ટીમનું નેતૃત્વ કરી રહ્યા છે. તેમની સાથે સૈમ અયુબ, ઉસ્માન ખાન, માઝ સદાકત, હસન નવાઝ, અબ્દુલ સમદ, અરાફત મિન્હાસ, અહમદ દાનિયાલ, મોહમ્મદ વસીમ જુનિયર, અબરાર અહમદ અને સુફિયાન મુકીમ ટીમમાં છે.
ભારત-પાકિસ્તાનનો તાજેતરનો રેકોર્ડ
તાજેતરના પાંચ મુકાબલાની વાત કરીએ તો ભારતનું પ્રદર્શન પાકિસ્તાન સામે મજબૂત રહ્યું છે. 15 ફેબ્રુઆરી 2026ના મુકાબલામાં ભારતે પાકિસ્તાનને 61 રનથી હરાવ્યું હતું.
આ ઉપરાંત 28 સપ્ટેમ્બર 2025ના મુકાબલામાં ભારતે 5 વિકેટે જીત મેળવી હતી. 21 સપ્ટેમ્બર 2025ના મેચમાં ભારતે 6 વિકેટે, જ્યારે 14 સપ્ટેમ્બર 2025ના મુકાબલામાં 7 વિકેટે વિજય મેળવ્યો હતો. 9 જૂન 2024ના મેચમાં પણ ભારતે પાકિસ્તાનને 6 રનથી હરાવ્યું હતું.
બ્રોન્ઝ મેડલ શ્રીલંકાના નામે
પુરુષ ક્રિકેટની બ્રોન્ઝ મેડલ મેચ પણ શનિવારે રમાઈ હતી. આ મુકાબલામાં શ્રીલંકાએ બાંગ્લાદેશને 63 રનથી હરાવીને બ્રોન્ઝ મેડલ પોતાના નામે કર્યો હતો.
હવે તમામ નજરો ભારત અને પાકિસ્તાન વચ્ચેની ગોલ્ડ મેડલ મેચ પર છે. ભારત ખિતાબ જાળવી રાખવા માટે મેદાનમાં છે, જ્યારે પાકિસ્તાન પ્રથમ વખત પુરુષ ક્રિકેટમાં એશિયન ગેમ્સનું ગોલ્ડ જીતવા માટે પ્રયાસ કરી રહ્યું છે.
આ પણ વાંચો : India Women Hockey Team નો ઐતિહાસિક વિજય, 44 વર્ષ પછી જીત્યો ગોલ્ડ મેડલ
