PBKS vs LSG Result : પંજાબ કિંગ્સે લખનૌને 54 રને આપી શરમજનક હાર

• આઈપીએલ 2026ની 29મી મેચમાં પંજાબ કિંગ્સે લખનૌ સુપર જાયન્ટ્સને 54 રને હરાવ્યું (PBKS vs LSG Result )
• પંજાબ કિંગ્સે નિર્ધારિત 20 ઓવરમાં 7 વિકેટે 254 રનનો વિશાળ સ્કોર બનાવ્ય
• પ્રિયાંશ આર્યાએ માત્ર 37 બોલમાં 9 છગ્ગા સાથે 93 રનની વિસ્ફોટક ઇનિંગ રમી

આઈપીએલ 2026ની 29મી મેચમાં પંજાબ કિંગ્સે શાનદાર પ્રદર્શન કરતા લખનૌ સુપર જાયન્ટ્સને 54 રને પરાજય આપ્યો છે. મુલ્લાનપુરના મેદાન પર રમાયેલી આ હાઈ-સ્કોરિંગ મેચમાં પંજાબના બેટ્સમેનોએ રનનો ગંજ ખડક્યો હતો, જેની સામે લખનૌની ટીમ નિર્ધારિત ઓવરોમાં લક્ષ્યાંક સુધી પહોંચી શકી નહોતી. પંજાબ માટે આ જીત પોઈન્ટ્સ ટેબલમાં મહત્વની સાબિત થશે, જ્યારે લખનૌને પોતાની બેટિંગ અને બોલિંગ વ્યૂહરચના પર ફરી વિચાર કરવાની જરૂર પડશે.

PBKS vs LSG Result : પ્રિયાંશ આર્યાની તોફાની બેટિંગ

ટોસ હારીને પ્રથમ બેટિંગ કરવા ઉતરેલી પંજાબ કિંગ્સની ટીમ માટે પ્રિયાંશ આર્યા મેચનો અસલી હીરો સાબિત થયો હતો. પ્રિયાંશે માત્ર 37 બોલમાં 9 છગ્ગા અને 4 ચોગ્ગાની મદદથી 93 રનની તોફાની ઇનિંગ રમી હતી. તેને ઓપનર કૂપર કોનોલી (87 રન) નો મજબૂત સાથ મળ્યો હતો. પંજાબે 20 ઓવરમાં 7 વિકેટે 254 રન બનાવી લખનૌ સામે પહાડ જેવો લક્ષ્યાંક મૂક્યો હતો. લખનૌ તરફથી પ્રિન્સ યાદવે 2 વિકેટ ઝડપી હતી, પરંતુ બાકીના બોલરો ઘણા મોંઘા સાબિત થયા હતા.

Indian Premier League 2026 | Punjab Kings defeated Lucknow Super Giants by 54 runs

(Photos: ANI Picture Service) pic.twitter.com/xje8flAIRl

— ANI (@ANI) April 19, 2026

લખનૌની લડત છતાં 54 રને હાર

255 રનના વિશાળ લક્ષ્યાંકનો પીછો કરવા ઉતરેલી લખનૌ સુપર જાયન્ટ્સની ટીમ 20 ઓવરમાં 5 વિકેટ ગુમાવીને 200 રન જ બનાવી શકી હતી. કેપ્ટન ઋષભ પંતે 43 રન અને એડન માર્કરામે 42 રન બનાવી સંઘર્ષ કર્યો હતો, પરંતુ રન રેટ સતત વધતો જતો હોવાથી લખનૌ દબાણમાં આવી ગયું હતું. મિશેલ માર્શે 40 રનનું યોગદાન આપ્યું હતું, પરંતુ તે જીત માટે પૂરતું નહોતું. અંતે પંજાબના બોલરોએ શિસ્તબદ્ધ બોલિંગ કરીને લખનૌને લક્ષ્યાંકથી 54 રન દૂર રોકી દીધું હતું.

બોલિંગમાં પંજાબનો દબદબો

પંજાબ કિંગ્સ તરફથી માર્કો જેન્સેને 2 વિકેટ ઝડપી હતી, જ્યારે અર્શદીપ સિંહ, વિજયકુમાર વૈશાખ અને યુઝવેન્દ્ર ચહલે 1-1 વિકેટ મેળવીને લખનૌની રન ગતિ પર બ્રેક લગાવી હતી.

આ પણ વાંચો:  IPL 2026: ધ્રુવ જુરેલનો ‘સુપરમેન’ અવતાર! વીજળીક ઝડપે કેમરૂન ગ્રીનને કર્યો સ્ટમ્પ આઉટ, જુઓ આશ્ચર્યજનક VIDEO