રુતુરાજ ગાયકવાડે વિરાટ કોહલીનો ઐતિહાસિક રેકોર્ડ કર્યો પોતાના નામે
શ્રીલંકા પ્રવાસે ગયેલી ભારત A ટીમ માટે રુતુરાજ ગાયકવાડ સતત શાનદાર ફોર્મમાં જોવા મળી રહ્યા છે. ટ્રાઇ-નેશન સિરીઝની શરૂઆતમાં શ્રીલંકા સામે સદી ફટકાર્યા બાદ હવે અફઘાનિસ્તાન A સામે પણ તેમણે મહત્વપૂર્ણ 66 રનની ઇનિંગ રમી હતી. આ ઇનિંગ સાથે ગાયકવાડના લિસ્ટ A ક્રિકેટમાં કુલ 5227 રન થઈ ગયા છે. સૌથી મોટી વાત એ છે કે આ રન તેમણે 59.39ની અદભૂત સરેરાશ સાથે બનાવ્યા છે, જે હવે વિશ્વમાં સૌથી શ્રેષ્ઠ છે.
લિસ્ટ A ક્રિકેટમાં સૌથી વધુ સરેરાશનો રેકોર્ડ ગાયકવાડના નામે
રુતુરાજ ગાયકવાડે આ ખાસ રેકોર્ડમાં ભારતના દિગ્ગજ બેટર વિરાટ કોહલીને પાછળ છોડી દીધા છે. કોહલીએ લિસ્ટ A ક્રિકેટમાં 16,447 રન બનાવ્યા છે અને તેમની બેટિંગ સરેરાશ 57.91 છે. 5000થી વધુ રન બનાવનારા બેટર્સની યાદીમાં હવે ગાયકવાડ પ્રથમ સ્થાને છે. આ યાદીમાં માઇકલ બેવન, ચેતેશ્વર પુજારા, એબી ડિવિલિયર્સ અને બાબર આઝમ જેવા મોટા ખેલાડીઓ પણ સામેલ છે.
5000થી વધુ લિસ્ટ A રન બાદ શ્રેષ્ઠ સરેરાશ
રુતુરાજ ગાયકવાડ – 59.39 (5227 રન)
વિરાટ કોહલી – 57.91 (16447 રન)
માઇકલ બેવન – 57.86 (15103 રન)
ચેતેશ્વર પુજારા – 57.01 (5759 રન)
એબી ડિવિલિયર્સ – 53.47 (11123 રન)
બાબર આઝમ – 53.39 (9772 રન)
શુભમન ગિલ – 51.25 (5228 રન)
એમએસ ધોની – 50.38 (13353 રન)
વૈભવ સૂર્યવંશી અને પ્રભસિમરન સિંહે પણ બતાવ્યો દમ
અફઘાનિસ્તાન A ટીમે ટોસ જીતીને પ્રથમ બોલિંગ કરવાનો નિર્ણય લીધો હતો. વરસાદ બાદની સ્થિતિને ધ્યાનમાં રાખીને આ નિર્ણય લેવામાં આવ્યો હતો. જોકે ભારત Aના ઓપનર્સે શાનદાર શરૂઆત કરી હતી. વૈભવ સૂર્યવંશીએ 21 બોલમાં 44 રન બનાવ્યા, જ્યારે પ્રભસિમરન સિંહે 69 બોલમાં 84 રનની ઝડપી ઇનિંગ રમી હતી. ત્યારબાદ રુતુરાજ ગાયકવાડે જવાબદારી સંભાળી ટીમનો સ્કોર મજબૂત બનાવ્યો હતો. ભારત Aની નજર અફઘાનિસ્તાન સામે મોટો લક્ષ્યાંક ઉભો કરવા પર હતી.
આ પણ વાંચો : Vaibhav Sooryavanshi vs Afghanistan A : ફિફ્ટી ચૂકી ગયો પણ દિલ જીતી લીધું! વૈભવ સૂર્યવંશીએ 200ના સ્ટ્રાઈક રેટથી ફટકાર્યા 9 ચોગ્ગા
