UEFA Champions League : ફ્રાન્સની જાણીતી ફૂટબોલ ક્લબ પેરિસ સેન્ટ-જર્મેન (Paris Saint-Germain - PSG) દ્વારા યુઇએફએ ચેમ્પિયન્સ લીગ (UEFA Champions League) જીત્યા બાદ સમગ્ર દેશમાં ખુશીનો માહોલ જોવા મળ્યો હતો. પરંતુ આ ઉજવણી અનેક સ્થળોએ હિંસક સ્વરૂપ ધારણ કરતાં ફ્રાન્સમાં કાયદો અને વ્યવસ્થા (Law and Order) સંભાળવું મોટો પડકાર બની ગયું છે. ઉજવણી દરમિયાન થયેલી અથડામણો અને તોડફોડની ઘટનાઓને કારણે પોલીસે દેશભરમાં 400થી વધુ લોકોની અટકાયત (Detention) કરી છે.

ઉજવણી દરમિયાન હિંસા, 416 લોકોની અટકાયત

ફ્રાન્સના ગૃહમંત્રી લોરેન્ટ નુન્સ (Laurent Nunez) દ્વારા આપવામાં આવેલી માહિતી અનુસાર, PSGની ઐતિહાસિક જીત બાદ દેશભરમાં કુલ 416 લોકોની ધરપકડ (Arrest) કરવામાં આવી હતી. તેમાં સૌથી વધુ કાર્યવાહી પેરિસ (Paris) માં થઈ હતી, જ્યાં એકલા 283 લોકોની અટકાયત કરવામાં આવી હતી. અહેવાલો મુજબ, PSGના સમર્થકો અને પોલીસ (Police) વચ્ચે અનેક સ્થળોએ તણાવપૂર્ણ સ્થિતિ સર્જાઈ હતી. ઉજવણી દરમિયાન કેટલાક વિસ્તારોમાં કાયદો અને વ્યવસ્થાની સ્થિતિ બગડતાં પોલીસને હસ્તક્ષેપ કરવો પડ્યો હતો.

7 પોલીસ અધિકારીઓ ઘાયલ

ગૃહમંત્રી લોરેન્ટ નુન્સે જણાવ્યું કે, હિંસક અથડામણોમાં 7 પોલીસ અધિકારીઓ (Police Officers) ઘાયલ થયા છે. તેમણે સ્પષ્ટ શબ્દોમાં કહ્યું કે હિંસા અને જાહેર સંપત્તિને નુકસાન પહોંચાડવાની કોઈપણ પ્રવૃત્તિ સહન કરવામાં આવશે નહીં. ઘટનામાં સામેલ લોકો સામે કડક કાનૂની કાર્યવાહી કરવામાં આવશે. સરકારે પરિસ્થિતિને નિયંત્રણમાં રાખવા માટે સમગ્ર દેશમાં સુરક્ષા દળોની મોટી સંખ્યામાં તૈનાતી કરી હતી. અધિકારીઓના જણાવ્યા પ્રમાણે, ફ્રાન્સભરમાં લગભગ 22,000 પોલીસ કર્મચારીઓને ફરજ પર મુકવામાં આવ્યા હતા, જ્યારે માત્ર પેરિસમાં જ 8,000 પોલીસ અધિકારીઓ તૈનાત કરવામાં આવ્યા હતા.

રસ્તાઓ પર ઉતર્યા હજારો સમર્થકો

PSGએ રોમાંચક પેનલ્ટી શૂટઆઉટ (Penalty Shootout) બાદ UEFA ચેમ્પિયન્સ લીગનો ખિતાબ પોતાના નામે કર્યો હતો. ટીમની જીત બાદ હજારો સમર્થકો રસ્તાઓ પર ઉજવણી કરવા માટે ઉતરી આવ્યા હતા. પોલીસના અંદાજ પ્રમાણે લગભગ 20,000 જેટલા સમર્થકો પેરિસની સડકો પર એકત્ર થયા હતા. ઉજવણી દરમિયાન કેટલાક સમર્થકોએ પેરિસ રિંગ રોડ (Paris Ring Road) પર ટ્રાફિક (Traffic) અવરોધિત કર્યો હતો. આ ઉપરાંત 6 વાહનોને નુકસાન પહોંચાડવામાં આવ્યું હોવાની પણ માહિતી સામે આવી છે. જેના કારણે શહેરના અનેક વિસ્તારોમાં અવરજવર પર અસર પડી હતી.

વિજય પરેડમાં 1 લાખ લોકો જોડાય તેવી શક્યતા

PSGની જીત બાદ હવે ક્લબ દ્વારા ભવ્ય વિજય પરેડ (Victory Parade)નું આયોજન કરવામાં આવ્યું છે. આ કાર્યક્રમ એફિલ ટાવર (Eiffel Tower) નજીક યોજાવાનો છે, જ્યાં અંદાજે 100,000થી વધુ સમર્થકો એકત્ર થઈ શકે છે. આટલી મોટી સંખ્યામાં લોકો ભેગા થવાના કારણે સુરક્ષા એજન્સીઓ માટે આ એક મોટો પડકાર માનવામાં આવી રહ્યો છે. જોકે, ગૃહમંત્રી લોરેન્ટ નુન્સે સુરક્ષા વ્યવસ્થા અંગે ઉઠી રહેલી ટીકાઓને ફગાવી દીધી છે. તેમણે જણાવ્યું કે, ફ્રાન્સની સુરક્ષા વ્યવસ્થા (Security System) સંપૂર્ણપણે સજ્જ છે અને પરિસ્થિતિ પર સતત નજર રાખવામાં આવી રહી છે.

ફ્રાન્સ માટે સુરક્ષા વ્યવસ્થાની મોટી કસોટી

PSGની ઐતિહાસિક જીતે ફૂટબોલપ્રેમીઓમાં ખુશીની લહેર ફેલાવી છે, પરંતુ તેની ઉજવણી દરમિયાન સર્જાયેલી હિંસાએ ફ્રાન્સની સુરક્ષા વ્યવસ્થા સામે અનેક પ્રશ્નો ઉભા કર્યા છે. હવે સૌની નજર PSGની વિજય પરેડ પર છે, જ્યાં લાખો સમર્થકોની ભીડ વચ્ચે શાંતિ અને સુરક્ષા જાળવવી ફ્રેન્ચ પોલીસ માટે સૌથી મોટી કસોટી સાબિત થઈ શકે છે.

આ પણ વાંચો : Vinesh Phogat ની Asian Games Trials માં જીત, જ્યોતિને 7-1 થી હરાવી