પાકિસ્તાનની ટીમ માત્ર 106 રનમાં ઓલ આઉટ

બર્મિંગહામના એજબેસ્ટન સ્ટેડિયમ ખાતે મહિલા T20 વર્લ્ડ કપ 2026 ના પોતાના પ્રથમ મુકાબલામાં ભારતીય મહિલા ટીમે ટોસ જીતીને પહેલા બેટિંગ કરતા પાકિસ્તાન સામે નિર્ધારિત 20 ઓવરમાં 170 રનનો પડકારજનક સ્કોર ઊભો કર્યો હતો. આ મેચમાં ટીમ ઈન્ડિયા તરફથી સ્ટાર બેટ્સમેન સ્મૃતિ મંધાનાએ શાનદાર પ્રદર્શન કરતા 44 બોલમાં 68 રનની આકર્ષક ઇનિંગ રમી હતી, જ્યારે કેપ્ટન હરમનપ્રીત કૌરે પણ 35 બોલમાં 36 રનનું મહત્વપૂર્ણ યોગદાન આપ્યું હતું. અંતિમ ઓવરોમાં સ્કોરબોર્ડને ઝડપથી આગળ વધારવાની જવાબદારી વિકેટકીપર-બેટ્સમેન રિચા ઘોષે ઉપાડી હતી, જેણે પોતાની વિસ્ફોટક શૈલીમાં માત્ર 17 બોલમાં 34 રન ફટકારીને ટીમને એક મોટા સ્કોર સુધી પહોંચાડી હતી. બીજી તરફ, પાકિસ્તાનની બોલિંગ લાઇન-અપમાં કેપ્ટન ફાતિમા સના અને સાદિયા ઇકબાલે સૌથી વધુ સફળતા મેળવતા 2-2 વિકેટ પોતાના નામે કરી હતી. જોકે, અંતમાં આ મેચમાં ટીમ ઈન્ડિયાએ જીત નોંધાવી હતી. ટીમ ઈન્ડિયાના 171 રનના લક્ષ્યનો પીછો કરવા ઉતરેલી પાકિસ્તાનની ટીમ માત્ર 106 રનમાં ઓલ આઉટ થઇ ગઇ હતી.

ભારતીય બેટિંગ પ્રદર્શન અને શાનદાર ભાગીદારી

પ્રથમ બેટિંગ કરવા ઉતરેલી ભારતીય ટીમની શરૂઆત ખૂબ જ ખરાબ રહી હતી. પાવરપ્લે (Powerplay) માં જ ટીમે પોતાની 2 અમૂલ્ય વિકેટ ગુમાવી દીધી હતી. વિસ્ફોટક ઓપનર શેફાલી વર્મા ઇનિંગની પહેલી જ ઓવરમાં સ્પિનર ​​સાદિયા ઇકબાલનો શિકાર બની હતી, જ્યારે જેમીમા રોડ્રિગ્સને ડાબા હાથની સીમર તસ્મિયા રૂબાબે આઉટ કરી હતી. જોકે, શરૂઆતી ઝટકાઓ બાદ સ્મૃતિ મંધાના અને કેપ્ટન હરમનપ્રીત કૌરે (Captain Harmanpreet Kaur) બાજી સંભાળી લીધી હતી. બંનેએ ત્રીજી વિકેટ માટે 91 રનની મજબૂત ભાગીદારી (Partnership) નોંધાવી હતી. મંધાનાએ 44 બોલનો સામનો કરીને 9 ચોગ્ગા અને 2 છગ્ગાની મદદથી શાનદાર 68 રન ફટકાર્યા હતા (તેની વિકેટ રમીન શમીમે લીધી હતી. કેપ્ટન હરમનપ્રીતે પણ 4 ચોગ્ગા સાથે 35 બોલમાં 36 રનનું મહત્ત્વનું યોગદાન આપ્યું, જેને ફાતિમા સનાએ આઉટ કરી હતી. ભારતી ફુલમાલી માત્ર 1 રન બનાવીને સાદિયા ઇકબાલના બોલ પર આઉટ થઈ હતી. અંતિમ ઓવરોમાં (Death Overs) વિકેટકીપર-બેટ્સમેન રિચા ઘોષે (Richa Ghosh) આક્રમક શૈલીમાં રમીને માત્ર 17 બોલમાં 5 ચોગ્ગા અને 1 છગ્ગાની મદદથી 34 રનની ઝડપી ઇનિંગ રમી હતી, જેનાથી ટીમનો સ્કોર 170 સુધી પહોંચી શક્યો. તે છેલ્લી ઓવરમાં ફાતિમા સનાનો શિકાર બની હતી.

પાકિસ્તાનનો નિષ્ફળ રન ચેઝ અને દીપ્તિની જાદુઈ બોલિંગ (Womens T20 World Cup 2026)

171 રનના લક્ષ્યનો પીછો કરવા ઉતરેલી પાકિસ્તાન ટીમની બેટિંગ લાઈન-અપ પત્તાના મહેલની જેમ ધરાશાયી થઈ ગઈ હતી. ફક્ત તેમની ઓપનર મુનીબા અલી (Muneeba Ali) જ ભારતીય બોલરોનો સામનો કરી શકી, જેણે 35 બોલમાં 5 ચોગ્ગાની મદદથી 41 રન બનાવ્યા અને અંતે રન આઉટ (Run Out) થઈ. તેના સિવાય માત્ર આલિયા રિયાઝ (18 રન), ગુલ ફિરોઝા (12 રન) અને આયેશા ઝફર (12 રન) જ બે આંકડાના સ્કોર (Double Digits) સુધી પહોંચી શકી. ભારતીય સ્પિન બોલરોએ (Spin Bowlers) પાકિસ્તાની બેટ્સમેનોને મેદાન પર ટકવા દીધા ન હતા. દીપ્તિ શર્માએ પોતાની કાતિલ બોલિંગથી પાંચ વિકેટ (Five Wickets) ઝડપીને પાકિસ્તાનની કમર તોડી નાખી હતી. જ્યારે શ્રી ચારાનીએ 3 વિકેટ અને શેફાલી વર્માએ એક વિકેટ લીધી હતી. કુલ મળીને 9 વિકેટ સ્પિનરોએ લીધી અને એક ખેલાડી રન આઉટ થઈ હતી.

વુમન્સ T-20 વર્લ્ડ કપમાં પાકિસ્તાન સામે ભારતની જીત | Gujarat First #WomenT20WorldCup #INDvsPAK #TeamIndia #IndiaWins #SmritiMandhana #DeeptiSharma #WomenInBlue #CricketVictory #PakistanvsIndia #T20Cricket #WomenCricket #IndianCricket #CricketFans #gujaratfirst pic.twitter.com/e6EJVBIMkY

— Gujarat First (@GujaratFirst) June 14, 2026

આગામી મેચ અને વર્લ્ડ કપનો ઇતિહાસ

આ શાનદાર જીત બાદ ભારતીય ટીમ પોતાની આગામી મેચ બુધવાર, 17 જૂનના રોજ નેધરલેન્ડ્સ (Netherlands) સામે રમશે. નોંધનીય છે કે ભારતીય મહિલા ટીમ હજુ સુધી એકપણ વખત T20 વર્લ્ડ કપ જીતી શકી નથી. તેમનું અત્યાર સુધીનું સર્વશ્રેષ્ઠ પ્રદર્શન વર્ષ 2020 ની આવૃત્તિમાં રહ્યું હતું, જ્યાં તેઓ ફાઇનલમાં (Finals) પહોંચ્યા હતા પરંતુ ઓસ્ટ્રેલિયા સામે ટાઇટલ મેચ હારી ગયા હતા. આ વખતે ટીમની નજર પોતાના પ્રથમ વર્લ્ડ કપ વિજય પર છે.

આ પણ વાંચો : ICC Womens T20 World Cup : હરમનપ્રીત કૌરે પાકિસ્તાન સામે રચ્યો ઇતિહાસ, મિતાલી રાજનો મહારેકોર્ડ તોડ્યો